މަނީ ލޯންޑަރިންގެ ކުށުގައި ކުރީގެ ނައިބުރައީސް، އަހުމަދު އަދީބުގެ މައްޗަށް އިއްވި ޖޫރިމަނާގެ ފައިސާ ދައުލަތަށް ދައްކައި ހަލާސްކޮށްފައިވާކަމަށް ސިވިލްކޯޓުން ނިންމައިފި އެވެ.
ކުރީގެ ރައީސް އަބްދުﷲ ޔާމީންގެ ވެރިކަމުގައި އެމްއެމްޕީއާރުސީއަށް ލިބެން ޖެހޭ ފައިސާގެ ތެރެއިން ދެ ބިލިއަނަށްވުރެ ގިނަ ރުފިޔާއަށް ހިޔާނާތްތެރިވިކަމުގެ ކުށް ސާބިތުވުމާއެކު އަދީބުއަށް 20 އަހަރުގެ ޖަލު ހުކުމެއް އިއްވީ އޮކްޓޫބަރު 5، 2020 ގަ އެވެ. އޭނާގެ މައްޗަށް ސާބިތުވާކަމަށް ކަނޑައެޅި ދެ ދައުވާގެ ތެރެއިން ކޮންމެ ދައުވާއަކަށް އެއް މިލިއަން ރުފިޔާ ދައުލަތަށް ދައްކަން ވެސް އޭނާގެ މައްޗަށް ހުކުމްކުރި އެވެ. އެ ފައިސާ ދައްކައި ހަލާސްކުރަން އޭރު ދިނީ އެއް މަސްދުވަހެވެ.
އެ ހުކުމާ އެއްގޮތަށް އަދީބު ދައުލަތަށް އޭރު ދެއްކީ އެއް މިލިއަން ރުފިޔާ އެވެ. ބާކީ ފައިސާ ދައްކައި ހަލާސް ނުކުރާތީ އެޓާނީ ޖެނެރަލް އޮފީހުން އެ މައްސަލަ ސިވިލް ކޯޓަށް ވެއްދީ މެއި، 2023 ގަ އެވެ.
އޭރު އަދީބުގެ ފަރާާތުން އެދިފައި ވަނީ ކޮމިޓްމެންޓުގެ ގޮތުގައި ފުރަތަމަ އެއްލައްކަ ރުފިޔާ ހުށަހެޅުމަށް ފަހު، ކޮންމެ މަހަކު 20،000ރ. ގެ މަގުން އެ ޖޫރިމަނާ ދައްކާ ހަލާސްކުރުމަށެވެ. އެކަމަކު ދައުލަތުން އޭރު އެދުނީ ކޮމިޓްމެންޓުގެ ގޮތުގާ ދެލައްކަ ދެއްކުމަށް ފަހު ބާކީ ބައި 36 މަހަށް ބަހާލައިގެން ދެއްކުމަށެވެ.
އެ މައްސަލައިގައި ދައުލަތުން ފަހުން ވަނީ އަދީބުގެ ފަރާތުން އެ ފައިސާ ދެއްކުމަށް ބޭނުންވާ ގޮތް ލިޔުމުން ހުށަހެޅުމުގެ ފުރުސަތަކަށެވެ. ނަމަވެސް ފަހުން ދައުލަތުން އެދުނީ އެ ފުރުސަތު އަދީބަށް ނުދީ މައްސަލައިގައި ޝަރީއަތުގެ އިތުރު އަޑުއެހުމެއް ނުބާއްވައި ހުކުމްކޮށްދިނުމަށެވެ.
ސިވިލްކޯޓުން އިއްޔެ ކުރި ހުކުމުގައި ބުނީ އަދީބު ދައްކަންޖެހޭ އެއް މިލިއަން ރުފިޔާ ދެ ބަޔަކަށް ބަހާލައިގެން ދައްކައި ހަލާސްކޮށްފައިވާކަމަށް މޯލްޑިވްސް އިންލެންޑް ރެވެނިއު އޮތޯރިޓީ (މީރާ) އިން ބުނެފައިވާތީ އެ ހުކުމް ތަންފީޒުކުރެވިއްޖެ ކަމަށް ކަނޑައަޅައިދިނުމަށް އޯގަސްޓު 19، 2026 ގައި ދައުލަތުން އެދިފައިވާ ކަމަށެވެ.
އެގޮތުން، ސެޕްޓެމްބަރު 11، 2025 ގައި 100،000ރ. އަދި އޯގަސްޓު 13، 2026 ގައި 900،000ރ. އަދީބު ދައްކާފައިވާ ކަމަށް އެ ހުކުމުގައިވެ އެވެ.
އެހެންކަމުން، ދައުލަތުން އެދުނުގޮތަށް ސިވިލްކޯޓުން އިއްޔެ ވަނީ އެ ހުކުމް ތަންފީޒުކުރެވިއްޖެ ކަމަށް ހުކުމްކޮށްފަ އެވެ.
