ލ. އިސްދޫ-ކަލައިދޫ މަގު ހެދުމުގެ މަޝްރޫއަށް ކަމަށް ބުނެ ހުއްދަ ނުނަގައި އެތައް ސަތޭކަ ރުއް ނަގައި ރަށުން ބޭރުކުރި މައްސަލައެއް ފެންމަތި ވެއްޖެ އެވެ.
އިސްދޫ އިން އަދަދު އަށް މި ކަމުގެ މައުލޫމާތު ދިން މީހަކު ބުނީ މަގު ހެދުމަށް 175 ރުއް ނަގަންވެގެން އުޅޭ ކަމަށް ބުނެ ރަށުގެ ދެ ކިލޯ މީޓަރު ދިގުމިނުގެ ދެ ފަރާތުގައި ހުރި 500 އަށް ވުރެ ގިނަ ރުއް ނަގާފައިވާ ކަމަށެވެ.
"މިހާރުގެ ކައުންސިލް އައި ގޮތަށް އައިސް ރަށުގެ ގާތްގަނޑަކަށް ދެ ކިލޯ މީޓަރު ދިގުމިނުގެ ދެ ފަރާތުގައި ހުރި 500 އަށްވުރެ ގިނަ ރުއް 175 ރުކުގެ ނަމުގައި ނަގައި މިހާރު ދަނީ ބޭރުކުރަމުން. މި ވަގުތުގައި ވެސް ނަގާފައި ބޭނުން ނުކޮށް މަރަން ދޫކޮށްލާފައި އެބައޮތް 200 އަށްވުރެ ގިނަ ރުއް،" އޭނާ ބުންޏެވެ.
ރުއްތައް ރަށުން ބޭރުކުރީ ދެ ލޭންޑިން ކްރާފްޓާއި ތިން ދޯނި ބޭނުންކޮށްގެން ކަމަށާއި އެކަމުގައި އުޅުނީ އާރްޑީސީގެ އިތުރުން އެމްޓީސީސީގެ މުވައްޒަފުން ކަމަށް އޭނާ ބުންޏެވެ.
އިސްދޫން މައުލޫމާތު ދިން މީހާ އިތުރަށް ބުނީ މަގުގެ ދެ ފަރާތުގައި ހުރި 40 އަހަރާއި 50 އަހަރު ވެފައި ހުރި ގަސްތަކާއި ނިކަގަސް ނަގައި އަންދަމުންދާ ކަމަށާއި ގާތްގަނޑަކަށް ތިން ލައްކައެއްހާ ގަސް ނައްތާލާފައިވާ ކަމަށެވެ.
"މަގުގެ ދެ ފަރާތުގައި ހުރި 40 އަހަރު، 50 އަހަރު ވެފައިހުރި ގަސްތަކާއި ނިކަގަހާއި އެކި ގަސްގަސް ދަނީ ނަގައި، މަރާ އަންދަމުން. ގާތްގަނޑަކަށް ތިންލައްކައަށްވުރެ ގިނަ ގަސް އަޅުގަނޑުމެން ކައުންޓްކުރިއިރު އެތަނުން އެދަނީ ނައްތާލަމުން،" އޭނާ ބުންޏެވެ.
މިކަމާ ގުޅިގެން އިސްދޫ ކައުންސިލްގެ ރައީސް އަހްމަދު ހަނީފް އަދަދު އަށް ވިދާޅުވީ ރަށުގެ މަގު ހެދުމަށް އާރްޑީސީން ކުރަމުންދާ މަސައްކަތުގެ ދަށުން ބައެއް ރުއްތައް ނަގައި ރަށުން ބޭރު ކުރަމުންދާ ކަމަށާއި އެކަމަކު އެ އަދަދު 500 އަށް ނާރާނެ ކަމަށެވެ.
އޭނާ ވިދާޅުވީ މަގު ހެދުމުގެ ބޭނުމަށް ރުކާއި ގަސްތައް ހުރި ސަރަހައްދުތައް ސާފުކުރަން ޖެހޭ ކަމަށާއި ކައުންސިލުން ބޭނުންވަނީ ޕްރޮޖެކްޓް އެއްވެސް ސަބަބަކާ ހެދި ނުހުއްޓި ކުރިއަށް ދިޔުން ކަމަށެވެ.
މިކަމާ ގުޅޭގޮތުން އެންވަޔަރަމަންޓް ރެގިއުލޭޝަން އޮތޯރިޓީ (އީއާރްއޭ) ގެ ޗީފް އެގްޒެކެޓިވް ހައްސާން މުހައްމަދު އަދަދު އަށް ވިދާޅުވީ އިސްދޫގައި ރުއްތަކާއި ގަސްތައް ނެގުމަށް އެއްވެސް ބަޔަކަށް ހުއްދައެއް ދީފައި ނުވާނެ ކަމަށެވެ.
މި ގޮތުން ރުއްތަކާއި ގަސްތައް ނަގަމުންދާ ކަމަށް ބުނެ އީއާރްއޭއަށް އަމިއްލަ ފަރާތަކުން މައްސަލައެއް ހުށަހެޅުމާއެކު އެ މައްސަލަ ބެލުމުގެ މަސައްކަތް ކުރަމުންދާކަން އޭނާ ފާހަގަކުރެއްވި އެވެ.
ރަށަކުން 50 އަށްވުރެ މަދުން ގަސްތައް އެއްވެސް ސަބަބަކާ ހެދި ކަނޑާނަމަ ކައުންސިލުން ހުއްދަ ހޯދަން ޖެހޭނެ އެވެ. 50 އަށްވުރެ ގިނަ ގަސްތައް ކަނޑާނަމަ ހުއްދަ ހޯދަން ޖެހޭނީ އީއާރްއޭއިންނެވެ. މިހެން ނަމަވެސް މި އުސޫލަށް ފަރުވާލެއް ނެތި ރާއްޖޭގެ އެކި ރަށްތަކުން ގަސްތައް ކަނޑަމުންދާތީ އާންމުންނާއި ތިމާވެށި ރައްކާތެރިކުރަން ވަކާލާތުކުރާ އަމިއްލަ ޖަމިއްޔާތަކުން ތަކުރާރުކޮށް އަންނަނީ ކަންބޮޑުވުން ފާޅުކުރަމުންނެވެ.
