ރަސްމާލޭގެ 500 ހެކްޓަރުގެ ބިން ދޭން ސަރުކާރުން ނިންމާފައިވާ އީގަލް ހިލްސްގެ ބާނީ މުހައްމަދު އަލައްބާރަކީ މުސްލިމު ޒުވާނުންގެ ވިސްނުން ޔަހޫދީންނާ އެއްގޮތް ކުރުމުގެ މަޝްރޫއުއެއް ހިންގާ މީހެއް ކަމަށް މި ސަރުކާރުގައި އެމްޑަބްލިއުއެސްސީގެ މެނޭޖިން ޑިރެކްޓަރުގެ މަގާމު އަދާކުރެއްވި އަބްދުލް މަތީން ވިދާޅުވެއްޖެ އެވެ.
އެކްސްގައި އޭނާ ކުރެއްވި ދިގު ޕޯސްޓެއްގައި ވިދާޅުވީ އަލައްބާރަކީ ޔަހޫދީންނާއި މެދުއިރުމައްޗާ ދެމެދު ދާއިމީ ސުލްހަ ގާއިމުކުރުމުގެ އެއް މޭސްތިރިޔާ ކަމަށެވެ.
"މިފަދަ ކަންކަމަށް ނުވިސްނައި ހަމައެކަނި ފައިސާގެ އަދަދުތަކެއް ދައްކައިގެން ކުރިއަށް ދިޔައީމަ އޭގެ ގެއްލުމާ ކުރިމަތިލާންޖެހޭނީ މިހާރު ދައުލަތުގެ ވަޒީފާތަކުގައި ތިއްބެވި ބޭފުޅުންނެއް ނޫން. އަންނާން އޮތް ޖީލުތަކުގެ ދިވެހި ދަރީން،" މަތީނު ކުރެއްވި ޕޯސްޓުގައި ލިޔުއްވާފައިވެ އެވެ.
"މިފަދަ ކަންކަމުގެ މަންޒަރު ފެންނާނީ މުދަލާއި ފައިސާ އާއި މަގާމުގެ ނުފޫޒުން އެއްކިބާވެ، ފެއްސާއި ރަތާއި ހުދުގެ ލެންސަކުން ބެލީމަ."
މުސްލިމު ޒުވާނުންގެ ވިސްނުން ޔަހޫދީންނާ އެއްގޮތްކޮށް އެކުގައި އުޅުމަށް ހޭނުމުގެ ގޮތުން، އަލައްބާރު އާއި އީލައި އެޕްސްޓީން ކިޔާ ޔަހޫއްޖަކާއެކު "ދަ ޗިލްރެން އޮފް އަބްރަހަމް" ކިޔާ މަޝްރޫއުއެއް 2004 ވަނަ އަހަރުން ފެށިގެން ކުރިއަށް ގެންދިޔަ މީހެއް ކަމަށް ވެސް މަތީނު ވިދާޅުވި އެވެ.
އެ މަޝްރޫއުގެ ނަތީޖާއެއްގެ ގޮތުން، އަލައްބާރުގެ ގައުމު، ޔޫއޭއީ އިން 2020 ވަނަ އަހަރު އަބްރަހަމް އެކޯޑްސްގައި ސޮއިކޮށް އިޒްރޭލާއެކު ދާއިމަށް ގުޅުން ބަދަހި ކުރުމަށް އެއްބަސްވެފައިވާކަން އޭނާގެ ޕޯސްޓުގައި ފާހަގަކޮށްފައިވެ އެވެ.
"[އަލައްބާރަކީ] އެއީ ފަލަސްތީނުގެ ރައްޔިތުންނަށް ލިބެމުންދާ ލާއިންސާނީ އަނިޔާތަކަށް ލޯމަރާލައި އިޒްރޭލާއެކު ދާއިމީ ސުލްހައަށް މެދުއިރުމަތި ގެންދިޔުމަށް ޕީޕަލް ޓު ޕީޕަލް ހަރަކާތްތައް ހިންގައި އެ މަސައްކަތުގެ ނަތީޖާ ނެރެ މެދުއިރުމަތި އަބްރަހަމް އެކޯޑްއަށް ވާސިލުކުރުމުގެ އެއް މޭސްތިރި،" މަތީނުގެ ޕޯސްޓުގައި ލިޔުއްވާފައިވެ އެވެ.
"މި އެއްބަސްވުން ކާމިޔާބު ކުރުމަށް މިހާރު އިންވެސްޓުކުރާ އެއް ވިޔަފާރިވެރިޔާ. މި ގޮތުން އަބްރަހަމް އެކޯޑުގައި ސޮއިކުރުމަށްފަހު އިޒްރޭލުގައި އިންވެސްޓު ކުރުމަށް އުފެއްދި 10 ބިލިއަން ޑޮލަރުގެ ފަންޑުގައި އަލައްބާރު ބައިވެރިވާކަން ވަނީ ހާމަކޮށްފައި."
އެ ވަރުގެ ބޮޑު ފައިސާވެރިއަކަށް ރާއްޖޭގެ މަޖިލިސް މެންބަރުންނަށް މަހަކު 50،000ރ. އަށްވުރެ ބޮޑު އެއްޗެއް ހައިރާތެއްގެ ގޮތުގައި ދިއްކޮށްލުމަކީ އެއްވެސް ކަމެއް ނޫން ކަމަށް އޭނާގެ ޕޯސްޓުގައި ލިޔުއްވާފައިވެ އެވެ.
