ދިވެހިރާއްޖެއަކީ ޖިހާދީ ގައުމެއްކަމަށް ވިދާޅުވެ، ރަސްމާލޭގައި އީގަލް ހިލްސްއިން ތަރައްގީކުރާ ސަރަހައްދުގައި ޔަހޫދީން ވަޒަންވެރިވެދާތީ އެކަމާ ބިރުގަންނަން ނުޖެހޭ ކަމަށް ބިލެތްދޫ ދާއިރާގެ މެންބަރު، މުހައްމަދު އަސްލަމް ވިދާޅުވެއްޖެ އެވެ.
މަޖިލީހުގައި މިއަދު ބަހުސްކުރައްވަމުން އަސްލަމް ވިދާޅުވީ ރައީސް މުހައްމަދު މުއިއްޒުއަކީ ފަލަސްތީނުގެ ހައްގުގައި ވަރަށް ބޮޑަށް ވަކާލާތު ކުރައްވާ ބޭފުޅެއް ކަމަށެވެ. އެހެންކަމުން އެމަނިކުފާނު ހައްދަވާ އެއްވެސް އެއްބަސްވުމަކާ ގުޅޭގޮތުން ކަންބޮޑުވާން ނުޖެހޭނެ ކަމަށް އޭނާ ވިދާޅުވި އެވެ.
"މިއީ އިއްޒަތްތެރި ރައީސް، ޖިހާދީ ގައުމެއް، މުޖާހިދުން އުފަންވެފައި އޮތް ގައުމެއް. މި ގައުމުގެ ހައްގުގައި މި ގައުމުގެ ދީނުގެ ހައްގުގައި މުޖާހިދުން ވަނީ މާޒީގައި ތެދުވެފައި. ގައުމަށް ބޭނުންވި ހިނދު މި ގައުމުން ވަނީ ސަލާހުއްދީން އައްޔޫބީ އާއި ޖޯޖް ވޮޝިންޓަނާއި މަހަތުމާ ގާންދީ އެ ބޭފުޅުންގެ ގައުމަށްޓަކައި ކުރެއްވި ޖިހާދު ކުރައްވާނޭ އެތައް އަބުތާލުންނެއް އުފަންވެފައި،" އަސްލަމް ވިދާޅުވި އެވެ.
"އެހެންވެއްޖެއްޔާ އަޅުގަނޑުމެން ބިރުގަންނާކަށް ނުޖެހޭ މިއަދު."
ރަސްމާލޭގެ 500 ހެކްޓަރުގެ ބިން އީގަލް ހިލްސްއަށް ދޭން ސަރުކާރުން ނިންމި ނިންމުމަށް ފާޑުކިޔާ މީހުންނަށް ރައްދުދެއްވަމުން އަސްލަމް ވިދާޅުވީ ފަލަސްތީނުގައި ޔަހޫދީން ވަޒަންވެރިވި ގޮތަށް ރާއްޖޭގައި ވަޒަންވެރިވުމުގެ ފުރުސަތު އެ މީހުންނަށް ނުލިބޭނެ ކަމަށެވެ.
އެގޮތުން، ރާއްޖެ މިހާރު މި އޮތީ ފަލަސްތީނުގައި ޔަހޫދީން އެންމެ ފުރަތަމަ ޔަހޫދީން ވަޒަންވެރިވިއިރު، ފަލަސްތީނު އޮތް ހާލަތުގައި ނޫން ކަމަށް އޭނާ ވިދާޅުވި އެވެ.
"ފަލަސްތީނުގައި އެ ބުނާ ކަމެއް ހިނގައިދިޔައިރު، އޮތް ހާލަތުގައެއް ނޫން މިއަދު އަޅުގަނޑުމެން މިތިބީ. އަޅުގަނޑުމެންގެ އަތުގައި އެބައޮތް ފުރިހަމަ ގާނޫނުއަސާސީއެއް، މިއީ މިނިވަން ދައުލަތެއް، އަޅުގަނޑުމެންނަކީ އަމިއްލަވަންތަ، އަމިއްލަ ބަހަކުން ވާހަކަދައްކާ އެއް ދީނަކަށް ތަބާވެގެން ތިބި ބައެއް،" އަސްލަމް ވިދާޅުވި އެވެ.
ދެވަނަ ބޮޑުހަނގުރާމަ ނިމުނުއިރު، ފަލަސްތީނު އޮތީ އިނގިރޭސިންގެ އިސްތިއުމާރުގައި ކަމަށާއި އެތަނުގައި ހެދި އެއްބަސްވުމެއްވިއްޔާ ހެދީ އިނގިރޭސިން ކަމަށް އޭނާ ވިދާޅުވި އެވެ.
