ފިލްމީ ތަރިންނާއެކު ހައްޔަރުކުރި ޝާހިލް މުހައްމަދު، 42، އަކީ ދެ ކިލޯގެ ޑްރަގުގެ މައްސަލައެއްގައި ޝަރީއަތް ނިމެންދެން ބަންދުގައި ހުއްޓާ ޕްރޮސެކިއުޓާ ޖެނެރަލް (ޕީޖީ) އިން އެދިގެން ދޫކޮށްލި މީހެއްކަން އެނގިއްޖެ އެވެ.
އަދަދު އަށް އެނގިފައިވާ ގޮތުގައި ޝާހިލް ހައްޔަރުކުރީ ޖުލައި 24، 2024، ގައި ވެލާނާ އިންޓަނޭޝަނަލް އެއާޕޯޓަށް ޖެއްސި އިއްތިހާދު އެއާވޭސްގެ ފްލައިޓުން ރާއްޖެ އައި ޕާކިސްތާނުގެ ރައްޔިތެއްގެ ލަގެޖަކުން މަސްތުވާތަކެތި ފެނުނު މައްސަލައެއްގައި ޖުލައި 25، 2024، ގައި ހައްޔަރުކުރި މީހެކެވެ.
މި މައްސަލައިގައި ޖުލައި 25، 2024، ގައި ފުލުހުން ހިންގި ފުރަތަމަ ކޮންޓްރޯލް ޑެލިވަރީ އޮޕަރޭޝަނުގައި މަސްތުވާތަކެތި ހުރި ލަގެޖާ ހ. ކުމުންދޫ، ނަރުގިސްވިލާ، އަހްމަދު އައްފާން ހަވާލުވުމުން އޭނާ ހައްޔަރުކޮށް ހިންގި އިތުރު ކޮންޓްރޯލް ޑެލިވަރީ އޮޕަރޭޝަނުގައި ޝާހިލް ލަގެޖާ ހަވާލުމުން ހައްޔަރުކުރި އެވެ.
ޝާހިލް ހައްޔަރުކޮށް ލަގެޖު ބަލައި ފާސްކުރިއިރު އެ ލަގެޖުގެ އެއްފަޅީގައި އިތުރު ފުލެއް ހަދައި، ކޮންސީލްކޮށްފައިވަނިކޮށް ފެނުނު ޝީޓުގައި ދެ ކިލޯއަށްވުރެ ގިނަ ޑައިމޯފިން ހުރި ކަމަށް ތަހުލީލު ރިޕޯޓުން ދައްކަ އެވެ. މިއާއެކު މި މައްސަލައިގައި ޝާހިލްގެ މައްޗަށް ޖަދުވަލު 1 ގައިވާ މަސްތުވާއެއްޗެއް ރާއްޖެއަށް އެތެރެކުރުމުގައި ބައިވެރިވުމުގެ ދައުވާކުރި އެވެ.
މި މައްސަލައިގައި ޝާހިލް ޝަރީއަތް ނިމެންދެން ބަންދުކޮށްފައި ހުއްޓާ އޭނާގެ ބަންދު އަމުރު މުރާޖައާކޮށްދިނުމަށް ޕީޖީން އެދުމާ ގުޅިގެން މި އަހަރުގެ މާޗު 30، ގައި ޝަރީއަތުގެ އަޑުއެހުމެއް ބޭއްވި އެވެ. އެ އަޑުއެހުމުގައި ޕީޖީން އެދުނު ގޮތަށް ކޯޓުން ވަނީ އޭނާ ބަންދުކުރަން ކުރި އަމުރު ބާތިލުކޮށް ބަންދުން ދޫކޮށްލަން އަމުރުކޮށްފަ އެވެ.
ޕީޖީ އޮފީހުގެ ޕަބްލިކް ޕްރޮސެކިއުޓާ އަހުމަދު ޝަފީއު އަދަދު އަށް ވިދާޅުވީ ދެ ކިލޯގެ ޑްރަގް މައްސަލައިގައި ހައްޔަރުކުރި ތިން މީހުންގެ ތެރެއިން ދެ މީހުންގެ މައްސަލަ ނިމިފައިވާއިރު، ޝާހިލްގެ މައްސަލަ އޮތީ ހުލާސާ ބަޔާނުގެ ހިސާބުގައި ކަމަށެވެ. އެގޮތުން އޭނާ ބަންދުން ދޫކޮށްލަން އެދުނީ ބަންދުގައި ގިނަދުވަސްވެފައިވާތީ އާއި ބަލި ހާލަތަށް ރިއާއަތްކޮށް ޝަރުތުތަކާއެކު ކަމަށެވެ.
މިދިޔަ ބުރާސްފަތި ދުވަހު ފުލުހުން ހިންގި އޮޕަރޭޝަނެއްގައި ޝާހިލްއާއެކު ތިން ފިލްމީ ތަރިން ހައްޔަރުކުރި އެވެ. އެއީ އަހުމަދު އަޒްމީލް (އަޒޭ)، 44، އާއި އިސްމާއިލް ޖުމައިހު، 35، އާއި މުހައްމަދު ވިޝާލް (ރޯމަން)، 29، އެވެ.
އެ އެންމެން ވެސް ވަނީ މަސްތުވާތަކެއްޗަށް ޕޮޒިޓިވްވެފަ އެވެ. ޕޮޒިޓިވްވީ މެތާ ގުޅުންހުރި ސިންތެޓިކް އެހެން ދެ ބާވަތެއްގެ ޑްރަގަކަށެވެ. އެމީހުންގެ އަތުން ފެނުނު މަސްތުވާތަކެތި ޓްރެފިކިން އަށް ހަމަވާ މިންވަރަށް ހުރި ކަމަށްވެ އެވެ.
އެމީހުން ބަންދު ކުރަން ކޯޓުން ނެރުނު އަމުރުގައި ބުނެފައި ވަނީ، އެމީހުން ތިބި ކޮޓަރިއަށް ފުލުހުން ވަން އިރު އެތަނުގައި ހުރި މޭޒެއްގައި ހާމައަށް މަސްތުވާތަކެތި ހުރި ކަމަށެވެ. އެ މީހުންގެ ބަންދަށް ކޯޓުން ވަނީ 15 ދުވަސް ޖަހާފަ އެވެ.
ހައްޔަރު ކުރި އަޒޭ އާއި ޖުމާހަކީ މީގެ ކުރިން އެއް އާއިލާއެއްގެ ދެބެއިންނާ ކައިވެނިކޮށްގެން އުޅުނު ދެމީހުންނެވެ. އޭގެ ތެރެއިން ފިލްމީ ދާއިރާގައި އުޅޭތާ އެންމެ ގިނަދުވަސްވީ އަޒޭ އެވެ. އެންމެ ފަހުން ފިލްމު ކުޅެން ފެށީ ރޯމަން އެވެ.
