ބުރާސްފަތި ދުވަހު ފުލުހުން ހިންގި އޮޕަރޭޝަނެއްގައި މަސްތުވާތަކެއްޗާއެކު އަތުލައިގަތް ފިލްމީ ތަރިން 15 ދުވަހު ޖަލުގައި ބަންދު ކުރަން ކޯޓުން އަމުރުކޮށްފި އެވެ.
އެ މައްސަލައިގައި ހައްޔަރު ކުރި ފިލްމީ ތަރިންނަކީ އަހުމަދު އަޒްމީލް (އަޒޭ)، 44، އާއި އިސްމާއިލް ޖުމައިހު، 35، އާއި މުހައްމަދު ވިޝާލް (ރޯމަން)، 29، އެވެ. އޭގެ އިތުރުން ދެން ހައްޔަރު ކުރީ ޝާހިލް މުހައްމަދު، 42، އެވެ.
އެ އެންމެން ވެސް ވަނީ މަސްތުވާތަކެއްޗަށް ޕޮޒިޓިވްވެފަ އެވެ. ޕޮޒިޓިވްވީ މެތާ ގުޅުންހުރި ސިންތެޓިކް އެހެން ދެ ބާވަތެއްގެ ޑްރަގަކަށެވެ. އެމީހުންގެ އަތުން ފެނުނު މަސްތުވާތަކެތި ޓްރެފިކިން އަށް ހަމަވާ މިންވަރަށް ހުރި ކަމަށްވެ އެވެ.
އެމީހުން ބަންދު ކުރަން ކޯޓުން ނެރުނު އަމުރުގައި ބުނެފައި ވަނީ، އެމީހުން ތިބި ކޮޓަރިއަށް ފުލުހުން ވަން އިރު އެތަނުގައި ހުރި މޭޒެއްގައި ހާމައަށް މަސްތުވާތަކެތި ހުރި ކަމަށެވެ.
ހައްޔަރު ކުރި އަޒޭ އާއި ޖުމާހަކީ މީގެ ކުރިން އެއް އާއިލާއެއްގެ ދެބެންނާ ކައިވެނިކޮށްގެން އުޅުނު ދެމީހުންނެވެ. އޭގެ ތެރެއިން ފިލްމީ ދާއިރާގައި އުޅޭތާ އެންމެ ގިނަދުވަސްވީ އަޒޭ އެވެ. އެންމެ ފަހުން ފިލްމު ކުޅެން ފެށީ ރޯމަން އެވެ.
