ސުޕްރީމް ކޯޓުގެ ކުރީގެ ފަނޑިޔާރު ޑރ. އަޒްމިރާލްދާ ޒާހިރު މަގާމުގެ ނުފޫޒު ނާޖާއިޒު ގޮތުގައި ބޭނުންކުރި ކަމަށް ބުނެ އެންޓި ކޮރަޕްޝަން ކޮމިޝަން (އޭސީސީ) އިން ފުލުހުންނަށް ހުށަހެޅި މައްސަލައިގައި ދައުވާ ނުކުރަން ޕްރޮސެކިއުޓާ ޖެނެރަލް އޮފީސް (ޕީޖީ) އިން ނިންމުމުން އެނގިގެންދަނީ އެ މައްސަލައަކީ ފެށުމުގައިވެސް ތުހުމަތު ކުރެވޭނެ އަސާސެއް އޮތް މައްސަލައެއް ނޫންކަން ކަމަށް އަޒްމިރާލްދާގެ ވަކީލުން ބުނެފި އެވެ.
އަޒްމިރާލްދާގެ ގާނޫނީ ޓީމުން ނެރުނު ނޫސް ބަޔާނެއްގައި ބުނީ ނުފޫޒު ފޯރުވި ކަމަށް ބުނާ މައްސަލައިގައި ޖިނާއީ ކުށުގެ އަމަލެއް ހިންގާފައިވާ ކަމަށް ބެލެވެން ވެސް ނެތްކަން ދޮޅު އަހަރުގެ ދިގު ތަހުގީގެއްކޮށް އެ މައްސަލަ ނިންމިއިރު، އޭނާއާ ތަހުގީގާ ގުޅިގެން އެއްވެސް ސުވާލެއްވެސް ކޮށްފައިނުވާ ކަމަށެވެ.
""ނުފޫޒު ފޯރުވިކަމަށް ބުނާ މައްސަލާގައި ޖިނާއީ ކުށުގެ އަމަލެއް ހިންގާފައިވާކަމަށް ބެލެވެންވެސް ނެތްކަން ދޮޅު އަހަރަށްވުރެ ދިގު ތަހުގީގަކަށްފަހު ނިންމާފައިވަނީވެސް ޑރ. އަޒްމިރާލްދާ ޒާހިރުއާ ސުވާލެއްވެސް ކުރުމެއްނެތި. މި މިންވަރުން އެކަނިވެސް މި މައްސަލައަކީ ފެށުމުގައިވެސް ތުހުމަތުކުރެވޭނެ އަސާސެއް އޮތް މައްސަލައެއް ނޫންކަން އިތުރަށް ސާފުވެގެންގޮސްފައިވާކަމަށް ދެކެން،" އަޒްމިރަލްދާގެ ގާނޫނީ ޓީމުން ބުންޏެވެ.
އަޒްމިރާލްދާގެ ގާނޫނީ ޓީމުން ބުނީ އޭނާގެ މައްޗަށް އޭސީސީން ތަހުގީގު ހިންގަން ފަށަފައި އެ މައްސަލަ ފުލުހުންނަށް ހުށަހެޅީ ޖޫން 11، 2026، ގައި ކަމަށެވެ. އެ މައްސަލަ ފުލުހުން ތަހުގީގުކޮށް ދައުވާކޮށްދޭން އެދުމުން މައްސަލައިގައި ދައުވާ ކުރެވޭ މިންވަރަށް ހެކި ނެތް ކަމަށް ޕީޖީން ވަނީ ކަނޑައަޅާފަ އެވެ.
"ތިޔަފަރާތުގެ މައްޗަށް ތުހުމަތުކޮށް މި ހިދުމަތަށް ހުށަހަޅާފައިވާ މައްސަލައިގައި ތަހުގީގަށް ހޯދާފައިވާ ހެއްކާއި ގަރީނާ ދިރާސާކޮށް ބެލިއިރު މި މައްސަލައިގައި ޖިނާއީ ކުށުގެ އަމަލެއް ހިނގާފައިވާ ކަމަށް ބެލެވެން ނެތުމުން މި މައްސަލަ ޕްރޮސެކިއުޓާ ޖެނެރަލް އޮފީހުން ދައުވާ ނުކުރުމަށް ނިންމާފައިވާތީ، މައްސަލަ މި ހިދުމަތުގައި ފައިލްކުރެވިފައިވާ ވާހަކަ ދެންނެވިން،" ފުލުހުން ބުންޏެވެ.
އަޒްމިރާލްދާގެ އިތުރުން ސުޕްރީމް ކޯޓުގެ ކުރީގެ ފަނޑިޔާރު މަހާޒް އަލީވެސް މަގާމުގެ ނުފޫޒު ނާޖާއިޒްގޮތުގައި ބޭނުންކުރި މައްސަލައިގައި ތަހުގީގު ހިންގި އެވެ. އެ މައްސަލައިގައިވެސް ދައުވާކުރަން އެދުމުން ޕީޖީން ބުނެފައިވަނީ އެކަށީގެންވާ މިންވަރަށް ހެކި ނެތް ކަމަށެވެ. އެގޮތުން އެ މައްސަލަ ފުލުހުން ވަނީ ފައިލްކޮށްފަ އެވެ.
ސުޕްރީމް ކޯޓުގެ ފަނޑިޔާރުކަމުގެ މަގާމުން އަޒްމިރާލްދާ އާއި މަހާޒް އަލީ ގާމުން ވަކި ކުރީ އޭސީސީއަށް މައްސަލައެއް ހުށަހަޅައި، ފަހުން އެ މައްސަލަ ޖޭއެސްސީ އިން ބެލުމަށްފަހު މަޖިލީހަށް ފޮނުވި ރިޕޯޓަކަށް ބިނާކޮށެވެ.
އެ ދެ ބޭފުޅުން މައްސަލަ އޭސީސީގެ އިތުރުން ޖޭއެސްސީން ބަލަން ފެށީ ރައްޔިތުންގެ މަޖިލީހުގެ މެންބަރަކު ސިޔާސީ ޕާޓީއަކުން ވަކިކޮށްފި ނަމަ ގޮނޑި ގެއްލޭ ގޮތަށް ގާނޫނުއަސާސީއަށް އިސްލާހު ގެނައި މައްސަލަ ބަލަން ފެށުމުންނެވެ.
ސުޕްރީމް ކޯޓުގެ ފަނޑިޔާރުން ކަމަށްވާ ހުސްނުއްސުއޫދު އާއި މަހާޒް އަލީ ޒާހިރު އާއި އަޒްމިރާލްދާ ޒާހިރުގެ މައްސަލަ އޭސީސީ އިން ތަހުގީގު ކުރަން ފެށީ ފެބްރުއަރީ، 2024، ގަ އެވެ. އެ މައްސަލަ ބަލަން ކަމަށް ބުނެ އެ ތިން ފަނޑިޔާރުން ސަސްޕެންޑު ކުރީ، ގޮނޑި ގެއްލޭ މައްސަލައިގެ އަޑުއެހުމެއް ފަށަން ކުޑަތަންވެފައި އޮއްވަ އެވެ.
މައްސަލަ ތަހުގީގު ކުރަނިކޮށް ފަނޑިޔާރު ސުއޫދު ވަނީ އިސްތިއުފާ ދެއްވައިފަ އެވެ. އަދި މެއި، 2024، ގައި ސަރުކާރުގެ ކޮންޓްރޯލް އޮންނަ ރައްޔިތުންގެ މަޖިލީހުން، އެ މަޖިލީހުގެ ކައުންސެލް ޖެނެރަލްގެ ލަފަޔާ ހިލާފަށް ވަނީ ފަނޑިޔާރު މަހާޒް އާއި އަޒްމިރާލްދާ ވަކިކޮށްފަ އެވެ.
އަޒްމިރާލްދާ އާއި މަހާޒްއަށް ފުރުސަތު ޖޭއެސްސީގެ އިތުރުން ރައްޔިތުންގެ މަޖިލީހުގެ ކޮމިޓީ މަރުހަލާގައިވެސް ދިފާއުވުމުގެ ފުރުސަތު ދެއްވާފައެއް ނުވެ އެވެ.
