ގިނަ ދަރިވަރުން އެއްތަންވާ ދަނޑިވަޅެއް ބަލައި، ތ. ތިމަރަފުށީ މަދުރުސާގެ ލެބޯޓަރީ ގޮއްވާލަން މަސައްކަތް ކުރި ކަމަށް ތުހުމަތު ކުރެވޭ މައްސަލައިގައި ދައުލަތުން ދައުވާ އުފުލި މީހުންގެ ތެރެއިން އެކަކު ފިޔަވައި އެންމެން މިނިވަންވެއްޖެ އެވެ.
ފެބްރުއަރީ 8، 2021 ގައި ކްރިމިނަލް ކޯޓަށް ހުށަހެޅި މި މައްސަލާގައި މިއަދު ވަނީ ހުކުމްކޮށްފަ އެވެ. މި މައްސަލައިގައި ދައުލަތުން ދައުވާ އުފުލީ އަށް މީހުންގެ މައްޗަށެވެ.
އެ މީހުންގެ މައްޗަށް އުފުލި ދައުވާތަކުގެ ތެރޭގައި ޓެރަރިޒަމްގެ އަމަލެއް ކުރުމަށް ރޭވުމާއި، ޓެރަރިޒަމްގެ އަމަލެއް ކުރުމަށް ހިތްވަރު ދިނުމާއި، ޓެރަރިސްޓު ޖަމާއާތަކަށް ތާއީދުކުރާ މީހެއްކަން ދޭހަވާފަދަ ލިޔުމެއް ގެންގުޅުމާއި، ހަނގުރާމައަށް ދާން އުޅުމާއި، ޓެރަރިޒަމްގެ އަމަލެއް ކުރުމަށް ބޭނުންވާ އުކުޅުތައް ދަސްކުރުން އަދި އަދުލު އިންސާފު ގާއިމުކުރުމަށް ހުރަސްއެޅުން ހިމެނެ އެވެ.
ދައުވާ އުފުލި އަށް މީހުން:
- ތ. ތިމަރަފުށި، ކެނެރީގެ، އަލީ މުނީޒު
- ތ. ތިމަރަފުށި، އަސުރުމާގެ، މުހައްމަދު އާސިރު
- ތ. ތިމަރަފުށި، ފެހިވިދުވަރުގެ، އަބްދުﷲ ޝަރީފް
- ތ. ތިމަރަފުށި، އަސްރަފީވިލާ، އަހްސަން މުހައްމަދު
- ރ. މަޑުއްވަރި، ބީޗްހައުސް، އަބްދުﷲ އިމާދު
- ތ. ތިމަރަފުށި، ސައިމާ، ޝަމާހު ޝަރީފް
- ނ. ކުޑަފަރި، ރޯޒްމީޑު، ޢިބްރާހިމް ލޫތު
- ރ. ކަނދޮޅުދޫ، އަލީ އަރުހަމް މުހައްމަދު
\އޭގެ ތެރެއިން އަބްދުالله އިމާދު އާއި އަލީ މުނީޒު އާއި އަލީ އަރުހަމް މުހައްމަދުގެ މައްޗަށް ޓެރަރިސްޓް ޖަމާއަތަކަށް ތާއިދުކުރުމުގެ ދައުވާ ވަނީ ސާބިތުވެފަ އެވެ. އަބްދުالله އިމާދު އާއި އިބްރާހިމް ލޫތުގެ މައްޗަށް އަދުލު އިންސާފު ގާއިމުކުރަން ހުރަސް އެޅުމުގެ ދައުވާ ސާބިތުވިއިރު އަލީ އަރުހަމްގެ މައްޗަށް ވަނީ ހަނގުރާމައަށް ދާން އުޅުނު ކަމުގެ ކުށް ސާބިތުވެފަ އެވެ. ދެން އުފުލި ދައުވާތައް ސާބިތުވެފައެއް ނުވެ އެވެ.
އެ މީހުންގެ ތެރެއިން އަރުހަމް ފިޔަވައި އެންމެން ވަނީ މިނިވަންވެފަ އެވެ. އެއީ ބަންދުގެ މުއްދަތުގައި ޖަލު ހުކުމަށްވުރެ ގިނަ ދުވަސް ހޭދަކޮށްފައިވާތީ އެވެ.
"މައްސަލާގައި ސާބިތުނުވާކަމަށް ނިންމާފައިވާ ދައުވާތައް އިސްތިއުނާފުކުރުމާމެދު، މައްސަލައިގެ ރިޕޯޓު ލިބުމުން މި އޮފީހުން ގޮތެއް ނިންމާނަން،" ޕީޖީ އޮފީހުން ބުނެފައިވެ އެވެ.
މި މީހުން ވަނީ، ދައުލަތުން ތުހުމަތު ކުރާ ގޮތުގައި، ޓެރަރިސްޓް ޖަމާއަތެއް ކަމަށްވާ އައިއެސްގެ އިރުޝާދުގެ ދަށުން ރާއްޖޭގައި ޓެރަރިޒަމްގެ އަމަލުތައްކުރުމަށް ރާވައި އެކަމަށް އައީޑީއެއް ތައްޔަރުކޮށް ރާއްޖޭގެ އެކި ސަރަހައްދުތަކުގައި ގޮއްވާލަން އުޅެފަ އެވެ. ފުލުހުން ކުރިން ބުނެފައިވަނީ، ގޮއްވާލަން އުޅުނު އެއް ތަނަކީ ތިމަރަފުށީގެ ސްކޫލުގެ ލެބޯޓްރީ ކަމަށެވެ.
ތިމަރަފުށި މައްސަލައިގައި ހިމެނޭ މީހުން ތިބީ ހައްޔަރުކުރި ދުވަހުން ފެށިގެން ޝަރީއަތް ނިމެންދެން ބަންދުކޮށްފަ އެވެ. މި މީހުން ބަންދުގައި ތިބި މުއްދަތު ދިގުލައިގެން ދިޔުމުން "އެންޑް ވާނުވާ" އެއްވުންތަކުގައި އާއިލާތަކުން ބައިވެރިވެ އަޑު އުފުލާފައިވެ އެވެ.
