ހުޅުމާލެ ފޭސް 2، ގައި ތިން މީހުން އަރުވައިގެން ވަންވޭއާ ދެކޮޅަށް ދުއްވި ސައިކަލެއް ފުލުހުންނަށް ފިލަން އުޅެނިކޮށް ސައިކަލެއްގައި ޖެހި ހިނގި އެކްސިޑެންޓުގައި ތިން މީހުން އަރުވައިގެން ދުއްވި ސައިކަލުގައި އިން އެކަކަކީ މުއްދަތު ހަމަނުވަނީސް ފުލުހުންގެ ބަންދުން ދޫކޮށްލި މީހެއްކަން އެނގިއްޖެ އެވެ.
އަދަދު ނޫހަށް މައުލޫމާތު ދެމުން ފުލުހުން ބުނީ ތިން މީހުން އަރުވައިގެން ދުއްވި ސައިކަލުގައި ހިމެނޭ ހ. ލާމިޔާ، އަހްމަދު އުވެއިސްއަކީ ގެސްޓްހައުސްއަކަށް ފައިސާ ދެއްކި ކަމަށް ބުނެ ފޭކް ސްލިޕެއް ފޮނުވި މައްސަލައެއްގައި ހައްޔަރުކޮށްފައި ހުރި މީހެއް ކަމަށެވެ. އޭނާ ހުރީ މި މަހުގެ 1 ވަނަ ދުވަހުން ފެށިގެން 15 ދުވަހަށް ބަންދުކޮށްފަ އެވެ.
މަކަރާއި ހީލަތުގެ މި މައްސަލައިގައި އުވެއިސްގެ ބަންދުގެ މުއްދަތު ހަމަވާ ގޮތަށް އޮތީ އޮކްޓޯބަރު 16، އަށެވެ. ނަމަވެސް ފުލުހުން އަދަދު ނޫހަށް ބުނި ގޮތުގައި އޭނާގެ މައްސަލައިގެ ތަހުގީގު ނިމުމުން އެ މުއްދަތު ހަމަވުމުގެ ކުރިން މި މަހުގެ 6، ގައި ދޫކޮށްލާފައިވާ ކަމަށެވެ.
އުވެއިސް ބަންދުކުރި ކޯޓު އަމުރުގައި އޭނާއަކީ ގިނަ އަދަދެއްގެ ކުށުގެ ރެކޯޑު އޮތް މީހެއް ކަމަށް އޮތީ ބަޔާންކޮށްފަ އެވެ. އޭގެ އިތުރުން އޭނާ ބަންދުގައި ބަހައްޓަން ޖެހޭ ސަބަބެއް ކަމަށް ކޯޓު އަމުރުގައި ބުނެފައި އޮތީ ބަންދުން ދޫކޮށްލައިފިނަމަ މުޖުތަމައުގެ ސަލާމަތަށް ނުރައްކަލެއް ކުރިމަތިވެދާނެ ކަމަށެވެ.
މި އެކްސިޑެންޓުގައި ޖުމްލަ ފަސް މީހުންނަށް އަނިޔާވި އެވެ. އައިޖީއެމްއެޗް އިން ބުނީ އޭގެ ތެރެއިން ވޯޑުގައި ފަރުވާދެމުންދިޔަ ތިން މީހުންގެ ތެރެއިން ދެ މީހަކު ފަރުވާއަށްފަހު ދޫކޮށްލާފައިވާއިރު، ދެ މީހަކަށް އައިސީޔޫގައި ވެންޓިލޭޓަރުގެ އެހީގައި ފަރުވާ ދެމުންދާ ކަމަށެވެ.
މައުލޫމާތު ލިބިފައިވާ ގޮތުގައި ވެންޓިލޭޓަރުގެ އެހީގައި ފަރުވާ ދެމުންދާ ދެ މީހުންގެ ތެރެއިން އެކަކުގެ ސިކުނޑިއަށް ވަނީ ލޭ އެޅިފަ އެވެ.
ފުލުހުން ބުނީ މި އެކްސިޑެންޓު ހިނގަން މެދުވެރިވި އެއް ސައިކަލުގައި ތިން މީހުން އަރައިގެން ދަތުރުކޮށްފައިވަނީ ވަންވޭއާ ހިލާފަށް ކަމަށާއި އެއީ ވަގަށް ނަގާފައިވާ ސައިކަލެއް ކަމަށްވެސް ބެލެވޭ ކަމަށެވެ. އޭގެއިތުރުން އެ ސައިކަލު ދުއްވަން އިން މީހާ އަތުގައި ލައިސަންސް ނެތް ކަމަށްވެސް ފުލުހުން ބުންޏެވެ.
