ލަންޑަން (އޮކްޓޫބަރު 10) - އިނގިރޭސި ޕްރިމިއާ ލީގުަގައި މިރޭ އާސެނަލާއި ޗެލްސީ ކުޅުނު މެޗުތަކުން މޮޅުވިއިރު، މެންޗެސްޓާ ޔުނައިޓެޑުން 1-1 އިން ޓޮޓެންހަމް ހޮޓްސްޕާސްއާ އެއްވަރުވެއްޖެ އެވެ.
އާސެނަލުން ވަނީ އަމިއްލަ ދަނޑުގައި ފަހަތުން އަރައި 2-1 އިން ލީޑްސް ޔުނައިޓެޑް ބަލިކޮށްފަ އެވެ. އަމިއްލަ ދަނޑުގައި ޗެލްސީން ވަނީ 5-1 އިން ބޯންމައުތު އަތުން މޮޅުވެފަ އެވެ.
އެމިރޭޓްސް ސްޓޭޑިއަމްގައި އާސެނަލާއި ލީޑްސް ކުޅުނު މެޗުގެ ފުރަތަމަ ހާފު ނިމުނީ އެއްވެސް ޓީމަކަށް ލަނޑެއް ނުޖެހި އެވެ. އެކަމަކު، ދެ ވަނަ ހާފުގެ ކުޅުން ފެށިގެން 10 މިނިޓް ތެރޭ، މެޗުގެ 55 ވަނަ މިނިޓްގައި ޖޭމްސް ޖަސްޓިން ވަނީ ލީޑްސް އަށް ލީޑުނަގައިދީފަ އެވެ.
ލީޑްސް އަށް ލީޑުގައި އޮވެވުނީ ހަތް މިނިޓެވެ. މެޗުގެ 62 ވަނަ މިނިޓްގައި އާސެނަލުން ވަނީ އެއްވަރުކޮށްފަ އެވެ. މި ލަނޑު އެ ޓީމަށް ޖަހައިދިނީ މި ސީޒަނުގައި ތަފާތު ފޯމެއްގައި ކުޅެމުން އަންނަ އިޓަލީގެ ޑިފެންޑަރު، ރިކާޑޯ ކަލަފިއޯރީ އެވެ. މި ލަނޑު ޖަހަން ފުރުސަތު ހޯދައިދިނީ ބެން ވައިޓް އެވެ.
މެޗުގެ 70 ވަނަ މިނިޓްގައި އާސެނަލް، މި މެޗުން މޮޅުކޮށްދިން ލަނޑު ޖެހީ ބްރޫނޯ ގިމާރޭސް އެވެ. މިއީ، އާސެނަލްގެ މެދުތެރެއިން ރަނގަޅު ކުޅުމަކަށް ފަހު، އޭރިއާ ރޮނގުކައިރިން ލިބުނު ބޯޅައެއް ތިރީ ކަނަށް ފޮނުވާލައިގެން ގިމާރޭސް ޖެހި ލަނޑެކެވެ. އާސެނަލުން އިތުރު ލަނޑެއް ޖަހަން ކުރި މަސައްކަތުގައި ބުކާޔޯ ސަކާ ހުސްކޮށް އަރައި ފޮނުވާލި ބޯޅަ ލީޑްސް ކީޕަރު، ޖޭމްސް ޓްރަފޯޑް ވަނީ މަތަކޮށްފަ އެވެ.
އާސެނަލުން މި ވަނީ އެންމެ ފަހުން ލީޑްސްއާ ދެކޮޅަށް ކުޅުނު 11 މެޗުގެ ތެރެއިން 10 މެޗުން މޮޅުވެފަ އެވެ. އަނެއްކޮޅުން، މިއީ މި ފަހަރު ލީގުގައި ލީޑްސް ބަލިވި ފުރަތަމަ ފަހަރެވެ.
ޗެލްސީން ވަނީ ބޯންމައުތު ކޮޅަށް ފުރަތަމަ ތިން މިނިޓް ތެރޭ ދެ ލަނޑު ޖަހައިފަ އެވެ. މި ލަނޑުތައް ޖެހީ، މޯގަން ރޮޖާސް އާއި ޖޯޑަން ހެންޑަސަން އެވެ. މިއީ، ޗެލްސީއާ ގުޅުނު ފަހުން ހެންޑަސަން ޖެހި ފުރަތަމަ ގޯލެވެ.
ދެ ވަނަ ހާފުގައި ޗެލްސީން ވަނީ އިތުރު ތިން ލަނޑު ޖަހައިފަ އެވެ. މީގެ ތެރެއިން ދެ ލަނޑު ޖެހީ ޖޮއާއޯ ޕެޑްރޯ އެވެ. އަދި، ހެންޑަސަން ވަނީ މެޗުގައި އޭނާގެ ދެ ވަނަ ގޯލު ވެސް ޖަހައިފަ އެވެ. މެޗުގައި ބޯންމައުތުގެ ހަމައެކަނި ލަނޑު ޖެހީ އެވަނީލްސަން އެވެ.
ޔުނައިޓެޑްގެ އޯލްޑް ޓްރެފޯޑްގައި ކުޅުނު މެޗު ފަށައިގެން މެޗުގެ ކޮންޓްރޯލް ނަގައިގެން ކުޅުނު ޓޮޓެންހަމް އިން ލަނޑު ޖަހާނެ ގިނަ ފުރުސަތުތަކެއް ހޯދައި އޭގެ ބޭނުމެއް ކުރެވޭ ގޮތެއްނުވި އެވެ. އެ ގޮތުން، ޓޮޓެންހަމްގެ ސަވިއޯ އާއި ޑޮމިނިކް ސޮލާންކޭ އަދި މުހައްމަދު ކުޑޫސް އަށް ރަނގަޅު ފުރުސަތުތުަކެއް ފޮނުވާލި ޝޮޓްތައް ގޯލަކަށް ހަދާލެވޭގޮތެއްނުވި އެވެ.
މި މެޗުން ޔުނައިޓެޑަށް ލީޑުނަގައިދިން ލަނޑު ޖެހީ، 73 ވަނަ މިނިޓްގައި ބްރަޔަން އެމްބެއުމޯ އެވެ. ޓޮޓެންހަމް އޭރިއާތެރެއިން އެމްބެއުމޯ އަށް ލިބުނު ބޯޅަ އޭނާ ވަނީ ގޯލުގެ ދުރު ކަނަށް ފޮނުވާލައިފަ އެވެ. އެ ބޯޅަ ހުއްޓުވަން ޓޮޓެންހަމްގެ ކީޕަރު، އެންޓޮނިން ކިންސްކީ އަށް މާ ބޮޑު ކަމެއް ނުކުރެވުނެވެ.
ޔުނައިޓެޑުން ލީޑުނެގިތާ ފަސް މިނިޓް ފަހުން، ޓޮޓެންހަމްގެ ރޮޑްރީގޯ ބެންޓަންކޫރަށް ރަތް ކާޑެއް ދެއްކި އެވެ. އެއީ، ކުޅުމުން ބޭރުގައި ހިނގި ކަމެއްގައި ޔުނައިޓެޑްގެ ލޫކް ޝޯ އަށް ހަމަލާ ދިނުމުންނެވެ. އެކަމަކު ވެސް ޓޮޓެންހަމް އިން ހިތްވަރުކޮށް އެޓޭކަށް ޖެހިގެން ކުޅެމުންދިޔަ އެވެ. ނަތީޖާއެއްގެ ގޮތުން، މެޗުގެ އިތުރު ވަގުތުގެ ތިން ވަނަ މިނިޓްގައި ޓޮޓެންހަމްގެ ސޮލާންކޭ ވަނީ ލަނޑު ޖަހައި ނަތީޖާ ހަމަހަމަކޮށްދީފަ އެވެ.
މި މެޗުން އެއްވަރުވެ، ޓޮޓެންހަމް އިން ލީގުގެ ފުރަތަމަ ހަ މެޗު މޮޅެއް ނުލިބި ނިންމާލިއިރު، ޔުނައިޓެޑަށް ހަ މެޗުގެ ތެރެއިން މޮޅުވެވުނީ އެއް މެޗުންނެވެ.
ލީގުގައި ކުޅުނު އެެހެން މެޗުތަކުގެ ނަތީޖާ އަށް ބަލާއިރު، އެސްޓަން ވިލާ އާއި ބްރެންޓްފޯޑް 2-2 އިން ވަނީ އެއްވަރުވެފަ އެވެ. އިޕްސްވިޗް ޓައުން އިން 2-1 އިން ފުލަމް ބަލިކުރިއިރު، ސަންޑަލެންޑް އަތުން ބްރައިޓަން ވަނީ 2-0 އިން މޮޅުވެފަ އެވެ. ބްރައިޓަން. ލީގުގެ ތިން ވަަނައިގައި އޮތްއިރު، ބްރެންޓްފޯޑް އޮތީ ހަތަރެއްގަ އެވެ. އެއް ވަނައިގައި އޮތް މެންޗެސްޓާ ސިޓީ އާއި ދެ ވަނައިގައި އޮތް އާސެނަަލަށް ވަނީ 15 ޕޮއިންޓް ލިބިފަ އެވެ. ސިޓީން އާސެނަލަށް ވުރެން އެއް މެޗު މަދެވެ.
