ލަންޑަން (އޮކްޓޫބަރު 8) - އާސެނަލްގެ 16 އަހަރުގެ ފޯވާޑް، މެކްސް ޑައުމަން، ގިނިސް އިން ހޮވާ ދުނިޔޭގެ ތިން ރެކޯޑެއް ހާސިލްކޮށްފި އެވެ.
މިދިޔަ މާޗް މަހު ޑައުމަން ވަނީ އިނގިރޭސި ޕްރިމިއާ ލީގުގެ މެޗެއްގައި ލަނޑު ޖެހި އެންމެ ހަގު ކުޅުންތެރިޔާގެ ރެކޯޑް ހަދައިފަ އެވެ. ގިނިސް އިން ވަނީ އެ ރެކޯޑް ވެސް އަގުވަޒަންކޮށްފަ އެވެ. ޑައުމަން އެންމެ ފުރަތަމަ އާސެނަލަށް މެޗެއް ކުޅެދިންއިރު އުމުރަކީ 15 އަހަރާއި 235 ދުވަހެވެ. އެއީ، މިދިޔަ އަހަރުގެ އޮގަސްޓް މަހު އެވެ.
އިނގިރޭސި ޕްރިމިއާ ލީގުގައި، އެވަޓަން މެޗުގައި ޑައުމަން ލަނޑު ޖެހިއިރު، އޭނާގެ އުމުރަކީ، 16 އަހަރާއި 73 ދުވަހެވެ. މީގެ ކުރިން މި ރެކޯޑް އޮތީ އެވަޓަންގެ ޖޭމްސް ވައުގަން އަތުގަ އެވެ. އޭނާ ރެކޯޑް ހެދީ 2005 ވަނަ އަހަރުގެ އޭޕްރީލް މަހު ކްރިސްޓަލް ޕެލަސް ކޮޅަށް ލަނޑު ޖަހައިގެންނެވެ. ވައުގަން، އެ މެޗުގައި ލަނޑު ޖެހިއިރު، އުމުރަކީ 16 އަހަރާއި 270 ދުވަހެވެ. އުމުރުން 16 އަހަރުގައި ދެން ޕްރިމިއާ ލީގުގައި ލަނޑު ޖަހާފައިވަނީ ޖޭމްސް މިލްނާ، ވޭން ރޫނީ އަދި ރަޔާން އެންގުމޯހާ އެވެ.
ގިނިސް ވޯލްޑް ރެކޯޑްސް އިން ދެން އަގުވަޒަންކޮށްފައިވާ ޑައުމަންގެ ރެކޯޑްތަކަކީ، ޕްރިމިއާ ލީގު ޗެމްޕިއަންކަން ހޯދި އެންމެ ހަގު ކުޅުންތެރިޔާގެ މަގާމާއި ޗެމްޕިއަންސް ލީގުގައި ކުޅުނު އެންމެ ހަގު ކުޅުންތެރިޔާގެ މަގާމެވެ. ޕްރިމިއާ ލީގު ހޯދި އެންމެ ހަގު ކުޅުންތެރިއަކަށް ޑައުމަން ހޮވުނީ، އާސެނަލުން ލީގު ތަށި އުފުލާލިއިރު، ޑައުމަންގެ އުމުރަކީ، 16 އަހަރާއި 144 ދުވަސް ކަމަށް ވުމުންނެވެ. މީގެ ކުރިން އެ ރެކޯޑް އޮތީ މެންޗެސްޓާ ސިޓީގެ ފިލް ފޯޑެން އަތުގަ އެވެ. އެއީ، 2018 ވަނަ އަހަރު ފޯޑެންގެ އުމުރުން 17 އަހަރާއި 350 ދުވަހުގައި ޕްރިމިއާ ލީގު ހޯދައިގެންނެވެ.
ޗެމްޕިއަންސް ލީގުގައި ކުޅުނު އެންމެ ހަގު ކުޅުންތެރިއަކަށް ޑައުމަން ވީ އުމުރުން 15 އަހަރާއި 308 ދުވަސް ތެރޭގައި ޗެމްޕިއަންސް ލީގު މެޗެއްގައި ކުޅެގެންނެވެ. އެއީ، މިދިޔަ އަހަރުގެ ނޮވެމްބަރު މަހު، ޗެމްޕިއަންސް ލީގުގެ މެޗެއްގައި ކުޅެގެން ޑައުމަން ހާސިލްކުރި ރެކޯޑެކެވެ. މީގެ ކުރިން އެ ރެކޯޑް އޮތީ ބޮރޫޝިއާ ޑޯޓްމަންޑްގެ ޔޫސުފާ މޫކޯކޯ އަތުގަ އެވެ. އޭނާ ވަނީ، 2020 ވަނަ އަހަރު އުމުރުން 16 އަހަރާއި 35 ދުވަސް ފުރިފައިވަނިކޮށް، ޗެމްޕިއަންސް ލީގުގެ މެޗެއްގައި ކުޅެގެން މޫކޯކޯ ހަދާފައި އޮތް ރެކޯޑެކެވެ.
މި ސީޒަނުގައި ޑައުމަން ވަނީ އާސެނަލުން ޕްރިމިއާ ލީގުގައި ކުޅުނު ތިން މެޗެއްގައި ބަދަލަކަށް ކުޅެން އަރައިފަ އެވެ. އަދި، އިނގިރޭސި ލީގު ކަޕް މެޗެއްގައި ފުރަތަމަ އެގާރައިގައި ހިމެނިގެން ޑައުމަން ވަނީ އިޕްސްވިޗް ޓައުން ކޮޅަށް ދެ ލަނޑު ޖަހައިފަ އެވެ.
