ލަންޑަން (ސެޕްޓެމްބަރު 22) - އާސެނަލްގެ ކޯޗަކަށް 10 އަހަރު ހަމަވާ ގޮތަށް، ސްޕެއިނުގެ މިކޭލް އާޓެޓާ، އެ ޓީމުގެ ކޮންޓްރެކްޓް އާ ކޮށްފި އެވެ.
މެންޗެސްޓާ ސިޓީގެ އެސިސްޓަންޓް ކޯޗަކަށް ހުރި، އާޓެޓާ، އާސެނަލްގެ ކޯޗުކަމާ ހަވާލުވީ، 2019 ވަނަ އަހަރުގެ ޑިސެމްބަރު މަހުގަ އެވެ. ކުރިން އާސެނަލަށް ކުޅުނު އާޓެޓާ، އެންމެ ފަހުން، 2024 ވަނަ އަހަރު އާސެނަލާ އެކު ސޮއިކުރި އެއްބަސްވުން އޮތީ 2027 ވަނަ އަހަރުގެ ޖޫން މަހުގެ ނިޔަލަށެވެ.
އާސެނަލުން މިއަދު އިއުލާނުކުރި އާޓެޓާގެ ކޮންޓްރެކްޓްގެ މުއްދަތެއް ރަސްމީކޮށް ހާމަކޮށްފައެއް ނުވެ އެވެ. އެކަމަކު، ރިޕޯޓްތައް ބުނާގޮތުން، އާޓެޓާ، އެއްބަސްވުން އާ ކުރި، މަދުވެގެން އެ ކްލަބްގައި ހޭދަވާ މުއްދަތް 10 އަހަރަށް ވާ ގޮތަށެވެ. މާނަ އަކީ، 2029 ވަނަ އަހަރުގެ ޑިސެމްބަރަށް މިހާރު އޮތް ކޮންޓްރެކްޓްގެ މުއްދަތު އޮންނާނެ އެވެ.
އާޓެޓާެގެ މި ފަހަރުގެ ކޮންޓްރެކްޓްގައިވާ ގޮތުން، މުސާރަ އާއި ބޯނަހާ އެކު، އޭނާ އަށް އަހަރަކު 15 މިލިއަން ޑޮލަރުގެ އާމްދަނީއެއް ލިބޭނެ އެވެ.
އާސެނަލުން އާޓެޓާގެ ކޯޗުކަމުގައި ވަނީ މިދިޔަ އަހަރުތަކުގައި ބޮޑު ކުރިއެރުންތަކެއް ހޯދައިފަ އެވެ، އެ ގޮތުން، އާޓެޓާ ހަވާލުވި ފުރަތަމަ ސީޒަނުގައި އެ ޓީމުން ވަނީ 2020 ވަނަ އަހަރުގެ އެފްއޭ ކަޕްގެ ޗެމްޕިއަންކަން ހޯދައިފަ އެވެ. އޭގެ ފަހުން، މިދިޔަ ސީޒަނުގެ އިނގިރޭސި ޕްރިމިއާ ލީގުގެ ޗެމްޕިއަންކަން ހޯދައި، އާސެނަލުން 22 އަހަރަށް ފަހު ލީގު ތަށި އުފުލާލި އެވެ.
މިދިޔަ ސީޒަނުގެ ޗެމްޕިއަންސް ލީގުގެ ފައިނަލުގައި އާސެނަލުން ކުޅުނުއިރު، މިއީ، 20 އަހަރު ތެރޭ ޗެމްޕިއަންސް ލީގުގެ ފައިނަލެއްގައި އާސެނަލުން ކުޅުނު ފުރަތަމަ ފަހަރެވެ. އާސެނަލުން ޗެމްޕިއަންސް ލީގުގެ ފައިނަލުން ބަލިވީ ޕީއެސްޖީ އަތުންނެވެ.
މި ސީޒަން ފެށުމުގެ ކުރިން ކުޅުނު އިނގިރޭސި އެފްއޭ ޗެރިޓީ ޝީލްޑް މެޗުން އާސެނަލް ވަނީ މެންޗެސްޓާ ސިޓީ ބަލިކޮށްފަ އެވެ. މިއީ، އާޓެޓާ ހަވާލުވެ ހުއްޓައި، އާސެނަލުން ޗެރިޓީ ޝީލްްޑް އުފުލާލި ތިން ވަނަ ފަހަރެވެ. އެއީ، 2020، 2023 އަދި މި އަހަރު އެވެ.
މި ފަހަރުގެ އިނގިރޭސި ޕްރިމިއާ ލީގުގެ ފުރަތަމަ ހަތަރު މެޗުން އާސެނަލުން މޮޅުވި އެވެ. އެކަމަކު، ލީގުގައި އެންމެ ފަހުން ކުޅުނު މެޗުން ބްރައިޓަން ހޯލްވް އެންޑް އަލްބިއަން އަތުން ވަނީ 3-0 އިން ބަލިވެފަ އެވެ. މިއީ، މިދިޔަ ތިން ވަރަކަށް އަހަރު ތެރޭ އާސެނަލް، ލީގުގެ މެޗަކުން އެންމެ ފަރަގު ބޮޑުކޮށް ބަލިވި މެޗެވެ.
