މެންޗެސްޓާ (ސެޕްޓެމްބަރު 24) - އޭސީ މިލާނުން ޕޯޗުގީސް ކޯޗު، ރުބެން އަމޮރިމް އެ ޓީމަށް ގެނައުމާ ގުޅިގެން މެންޗެސްޓާ ޔުނައިޓެޑަށް 11 މިލިއަން ޑޮލަރު ސަލާމަތްކުރެވިއްޖެ އެވެ.
ސްޕޯޓިން ލިޒްބަންގެ ކޯޗަކަށް ހުރެފައި، ޔުނައިޓެޑާ ހަވާލުވި އަމޮރިމް އެ ޓީމުގައި ހުރީ 14 މަސް ދުވަހު އެވެ. ޖެނުއަރީ މަހު، ޔުނައިޓެޑްގެ ކޯޗުކަމުން އަމޮރިމް ވަކިކުރިއިރު، އެ ކްލަބާ އެކު އޭނާ ހަދާފައި އޮތް އެއްބަސްވުން އޮތީ އަންނަ އަހަރުގެ ޖޫން މަހުގެ ނިޔަލަށެވެ. އެ ކޮންޓްރެކްޓްގައިވާ ގޮތުން، އަމޮރިމްގެ އެއްބަސްވުން ހަމަވުމުގެ ކުރިން އޭނާ ވަކިކުރާނަމަ ދެ ބަޔަކަށް ބަހާލައިގެން، ކޮންޓްރެކްޓްގެ މުއްދަތަށް މާލީ ބަދަލެއް ދޭން ޖެހޭ ގޮތަށް މާއްދާއެއް ހިމަނާފައިވެ އެވެ.
އެ ގޮތުން، ޔުނައިޓެޑުން އަމޮރިމް ވަކިކުރިއިރު، އެންމެ ފުރަތަަމަ ޕޭމަންޓް ވަނީ ދައްކައިފަ އެވެ. އެއީ، 10.8 މިިލިއަން ޑޮލަރެވެ. އެކަމަކު، އޭގެ ދެ ވަނަ ޕޭމަންޓް ދޭން އޮތީ ދެ ފަރާތް އެއްބަސްވެވޭ ގޮތަކަށް ކޮންޓްރެކްޓްގެ މުއްދަތު ހަމަވުމުގެ ކުރިންނެވެ. އެކަމަކު، އެ ޕޭމަންޓް ދޭން ޖެހެނީ އަމޮރިމް، އެ ކޮންޓްރެކްޓްގެ މުއްދަތު ހަމަވުމުގެ ކުރިން އެހެން ޓީމަކާ ހަވާލުނުވާނަމަ އެވެ. އެކަމަކު، މިލާނުގެ ކޯޗަކަށް ވާން އަމޮރިމް އަށް ދިން އޮފާ އޭނާ ގަބޫލުކުރުމާ އެކު، ޔުނައިޓެޑުން ދޭން ޖެހޭ 11 މިލިއަން ޑޮލަރުގެ ދެ ވަނަ ޕޭމަންޓް ދައްކަން ނުޖެހޭކަން އެނގިގެންދިޔައީ، ޔުނައިޓެޑުން އާންމުކުރި އެ ކްލަބްގެ މާލީ ހިސާބުތަކުންނެވެ.
މިލާނާ ހަވާލުވެ، އަމޮރިމް އަންނަނީ ރަނގަޅު މަސައްކަތެއް ކުރަމުންނެވެ. އިޓާލިއަން ލީގުގެ އާ ސީޒަނުގެ ފުރަތަމަ ފަސް މެޗު ނިމުނުއިރު، މިލާން މެޗަކުން ބަލިވެފައިނުވެ އެވެ. ތިން މެޗުން ވަނީ މޮޅުވެފަ އެވެ. އިންޓަނޭޝަނަލް ބްރޭކުގެ ކުރިން އެންމެ ފަހުން މިލާން ކުޅުނު މެޗުން ވަނީ ލެއްޗޭ އަތުން 3-0 އިން މޮޅުވެފަ އެވެ. މިލާން އޮތީ ލީގު ތާވަލުގެ ފަސް ވަނައިގަ އެވެ. އެކަމަކު، ޔޫރޮޕާ ލީގުގައި މިލާން ކުޅުނު ފުރަތަމަ މެޗުން ބެންފީކާ އަތުން ވަނީ 2-0 އިން ބަލިވެފަ އެެވެ.
ޔުނައިޓެޑުން މި ފަހަރު އާންމުކުރި މާލީ ތަފާސްހިސާބުތަކަށް ބަލާއިރު، ޖެހިޖެހިގެން ހަތް ވަނަ ސީޒަނަށް ވަނީ މާލީ ގޮތުން ގެއްލުމާ ކުރިމަތިލާން ޖެހިފަ އެވެ. އެ ގޮތުން، ޖޫން މަހުގެ ނިޔަލަށް ރެކޯޑް ކުރެވިފައިވާ ތަފާސް ހިސާބުތަކުން ދައްކާ ގޮތުގައި ޔުނައިޓެޑްގެ އެނުއަލް ލޮސް އަކީ 56 މިލިއަން ޑޮލަރެވެ.
ޔުނައިޓެޑްގެ ޖުމްލަ ދަރަަނި އުޅެނީ، 1.3 ބިލިއަން ޑޮލަރުގަ އެވެ. މިއީ، ޔުނައިޓެޑް ހިންގުމުގެ ތެރެއަށް ޖިމް ރެޓްކްލިފްގެ އިނިއޯސް އައިސް، ހަރަދުކުޑަކުރުމުގެ ފިޔަވަޅުތައް އެޅި ފަހުން ވެސް އެ ކްލަބްގެ ދަރަނި ރެކޯޑް ކުރެވިފައިވާ މިންވަރެވެ.
