އިންޑިއާ ކަނޑުގެ ސަލާމަތާއި ރައްކާތެރިކަން ކަށަވަރުކުރުމަށްޓަކައި ދުނިޔޭގެ ބޮޑެތި ބާރުތަކުންނާއި މެދުފަންތީގެ ބާރުތަކުން މި ސަރަހައްދަށް ބޮޑެތި އަސްކަރީ އާލާތްތައް ގެންނަން ޖެހޭ ކަމަށާއި، އެފަދަ ނުރައްކާތައް ހުއްޓުވުމުގެ ގާބިލުކަން ރާއްޖޭގެ ރަށްތަކުގައި ގާއިމުކުރުމަކީ މުހިންމު ކަމެއް ކަމަށް ކުރީގެ ރައީސް މުހައްމަދު ނަޝީދު ވިދާޅުވެއްޖެ އެވެ.
ކަނޑުފަޅުގެ ސަލާމަތާ ގުޅޭގޮތުން ވާހަކަދައްކަވަމުން ނަޝީދު ވިދާޅުވީ، މިހާރު މިއީ ބައިނަލްއަގުވާމީ ގޮތުން ބޮޑެތި ގޮންޖެހުންތަކެއް ކުރިމަތިވެފައިވާ ދުވަސްވަރެއް ކަމަށާއި، ހާއްސަކޮށް މެދުއިރުމަތީގެ މަސްލަހަތު ގޯސްވެފައިވާ ދަނޑިވަޅެއްގައި ރާއްޖޭގެ ކަނޑުގެ ސަރަހައްދަށް އޮތް ނުރައްކާ ބޮޑުވަމުންދާ ކަމަށެވެ.
ނަޝީދު ފާހަގަކުރެއްވި ގޮތުގައި ހޯރްމޫޒް ކަނޑުއޮޅިއާއި، ބާބުލް މަންދަބް އަދި ރަތްކަނޑަށް ވަންނަ ދޮރާށި ބަންދުވެފައި އޮތުމަށްފަހު، އެ ތަންތަން އަލުން ހުޅުވިއްޖެ ނަމަ، ހަނގުރާމަވެރި ޖަމާއަތްތަކުން ރާއްޖޭގެ ހުވަދޫ ކަނޑާއި ކާށިދޫ ކަނޑު ބަންދުކުރުމަކީ ވެދާނެ ކަމެކެވެ.
"މީގެ މާނައަކީ ހަނގުރާމަ އަޅުގަނޑުމެންގެ މި ސަރަހައްދާ ނުހަނު ގާތަށް އައުން ނުވަތަ ހަނގުރާމަ ސީދާ އަޅުގަނޑުމެންގެ ތެރެއަށް ވަނުން. އެހެންކަމުން، އަޅުގަނޑުމެން މި ތިބީ ނުހަނު ކަންބޮޑުވުމާއި ނުތަނަވަސްކަމެއްގެ ތެރޭގައި. އަދި، މި ދެންނެވި ދެ ކަނޑުއޮޅި ހުޅުވިއްޖެ ނަމަ ވެދާނެ ގޮތަކާ މެދު އަޅުގަނޑުމެން އެންމެން ވެސް ސަމާލުވާން ޖެހޭނެ ކަމަށް އަޅުގަނޑު ދެކެން،" ނަޝީދު ވިދާޅުވި އެވެ.
ރާއްޖޭގެ ރައްކާތެރިކަމާއި ސަލާމަތަށްޓަކައި އަވަށްޓެރި އިންޑިއާއަށާއި އެހެނިހެން އެކުވެރި ގައުމުތަކަށް ބޮޑަށް ބަރޯސާވާން ޖެހޭކަން ފާހަގަކުރައްވަމުން ނަޝީދު ވިދާޅުވީ އިންޑިއާއާއެކު މާނަހުރި މަޝްވަރާތަކެއް ކުރަން ޖެހޭ ކަމަށެވެ. އަދި، ކުރިމަތިވެދާނެ ކޮންމެ ހާލަތަކަށް ވެސް ތައްޔާރުވުމަކީ މުހިންމުކަމެއް ކަމަށް އެމަނިކުފާނު ވިދާޅުވި އެވެ.
ރަތްކަނޑާއި ގަލްފް ސަރަހައްދު ބަންދުވެފައި އޮތުމުގެ ސަބަބުން ދުނިޔޭގެ ވިޔަފާރިވެރިން އާ މަގުތައް ހޯދަމުންދާ ކަމަށާއި، އެގޮތުން މޮމްބާސާއިން ރާއްޖެއަށް، އަދި ރާއްޖެއިން ޖަކާޓާއަށް އޮންނަ ވިޔަފާރި މަގުގެ ބޭނުން ބޮޑުވާނެ ކަމަށް ނަޝީދު ލަފާކުރެއްވި އެވެ. އެފްރިކާގެ އެއްގަމު މަގުތައް މެދުވެރިކޮށް ހުޅަނގުގެ މުދާ އިރުމައްޗަށް އުފުލުމުގެ އާ ފުރުސަތުތައް ހުޅުވިގެންދާނެ ކަމަށާއި، މެދުއިރުމަތީގެ ހަމަނުޖެހުންތަކުގެ ސަބަބުން އުފެދޭ އާ ވިޔަފާރި މަގުތަކުގެ ފައިދާ ރާއްޖެއަށް ކުރާނެ ކަމަށް ވެސް ނަޝީދު ވިދާޅުވި އެވެ.
ރާއްޖޭގެ ކަނޑުގެ ސަރަހައްދުގެ ނާޒުކުކަމާ ބެހޭގޮތުން ވާހަކަދައްކަވަމުން ނަޝީދު ވިދާޅުވީ، ކާށިދޫ ކަނޑާއި ހުވަދޫ ކަނޑަކީ މަދު ބަޔަކު ނުކުމެ ހުރަސްއެޅިދާނެ ފަދަ ތަންތަން ކަމަށެވެ.
"އޭކޭ-47 ބަޑި ހިފައިގެން ލޯންޗެއްގައި ނުކުންނަ ބާރަވަރަކަށް މީހުންނަށް ވެސް މި ދެ ކަނޑުއޮޅީގެ ދަތުރުފަތުރަށް ހުރަސްއެޅިދާނެ. އެކަން ހުއްޓުވުމަށްޓަކައި، ދުނިޔޭގެ ބޮޑެތި ބާރުތަކުންނާއި މެދުފަންތީގެ ބާރުތަކުން އިންޑިއާ ކަނޑަށް ބޮޑެތި އަސްކަރީ އާލާތްތައް ގެންނަން ޖެހޭ،" ނަޝީދު ވިދާޅުވި އެވެ.
ރާއްޖޭގައި ހަރުކަށި ފިކުރު ފެތުރުމަކީ ގައުމީ ސަލާމަތަށް އޮތް ބޮޑު ނުރައްކަލެއްކަން ފާހަގަކުރައްވައި ނަޝީދު ވިދާޅުވީ ހަނގުރާމަވެރި ޖަމާއަތްތައް އުފެދިގެން އަންނަނީ މިފަދަ ހަރުކަށި ގްރޫޕްތަކުގެ ތެރެއިން ކަމަށްވާތީ، އެ މައްސަލަ ހައްލުކުރުމަށް ހާއްސަ ސަމާލުކަމެއް ދޭން ޖެހޭ ކަމަށެވެ.
އިންޑިއާ ކަނޑުގައި ހަމައެކަނި ހަތިޔާރު ބޭނުންކޮށްގެން ހުރިހާ މައްސަލައެއް ހައްލުނުވާނެ ކަމަށާއި، އެންމެ މުހިންމު ކަމަކީ މުޖުތަމައު ރަނގަޅަށް ބަލަހައްޓައި، ހަމަނުޖެހުންތަކާ ކުރިމަތިލުމުގެ ބަދަލުގައި ސުލްހަވެރިކަމާއެކު ދިރިއުޅުމުގެ މާހައުލެއް ގާއިމުކުރުން ކަމަށް ނަޝީދު ވިދާޅުވި އެވެ.
