ފުށިފިއްގަރުފަޅު ހިއްކައިގެން ބިނާ ކުރާ ރަސްމާލޭގެ 500 ހެކްޓަރު ޔޫއޭއީގެ އީގަލް ހިލްސްއަށް ދޫކޮށްލުމުގެ އެގްރިމެންޓުގެ ދަށުން ބިދޭސީންނަށް ބިން މިލްކު ކުރެވޭނެ ނަމަ އެކަން ހާމަ ކުރަން އިދިކޮޅު މޯލްޑިވިއަން ޑިމޮކްރެޓިކް ޕާޓީ އިން ގޮވާލައިފި އެވެ.
އެމްޑީޕީ އިން މިއަދު ނެރުނު ބަޔާނެއްގައި ބުނީ، ސެޕްޓެމްބަރު 21، ގައި ރާއްޖެއިން އީގަލް ހިލްސްއާއެކު ސޮއި ކުރި އެގްރިމެންޓުގެ ހިމެނޭ ކަންކަން ސަރުކާރުން ހާމަކުރަންޖެހޭ ކަމަށެވެ. ބިން މިލްކުވުމުގެ ފުރުސަތު ބިދޭސީއަކަށް އެގްރިމެންޓުގެ ދަށުން ލިބޭ ނަމަ އެކަން ވެސް ހާމަ ކުރަން އެމްޑީޕީ އިން ގޮވާލި އެވެ.
"މި ދެންނެވި މަޝްރޫއުގެ ދަށުން، ދިވެހިރާއްޖޭގެ ބިން ބިދޭސީންނަށް މިލްކުވާނެ އެއްވެސް އުސޫލަކަށް އެއްބަސްވެފައިވާކަން ނުވަތަ ނޫންކަން ކަށަވަރުކޮށްދިނުމަށް ސަރުކާރަށް ގޮވައިލަން،" އެމްޑީޕީގެ ބަޔާނުގައި ބުނެފައިވެ އެވެ.
"މި މަޝްރޫއުގެ ދަށުން ހިންގާ އެއްވެސް މުއާމަލާތެއްގެ ސަބަބުން، މުސްތަގުބަލުގައި ދިވެހި ބިމުގެ މައްޗަށް ބިދޭސީންގެ ދާއިމީ މިލްކުވެރިކަމުގެ ހައްގެއް އުފަންވެދާނެފަދަ އެއްވެސް ކަމެއްވެސް ހިމެނިފައިވާކަން ނުވަތަ ނޫންކަން ސާފުކޮށްދިނުމަށް ސަރުކާރަށް ގޮވައިލަން."
އޭގެ އިތުރުން އެމްޑީޕީ އިން ބުނެފައި ވަނީ، ދިވެހިރާއްޖޭގެ ބިން ބިދޭސީންނަށް މިލްކުވާނެ ފަދަ އެއްވެސް ސިޔާސަތެއް ކަނޑައެޅުމުގެ ބާރު ދިވެހި ސަރުކާރަށް ލިބިގެންނުވާ ކަމަށެވެ. އެފަދަ ކަމެއް ނިންމަންޖެހޭނީ ރައްޔިތުން ކަމަށް ވެސް އެ ޕާޓީ އިން ބުންޏެވެ.
"ދިވެހިރާއްޖޭގެ ބިން ބިދޭސީންނަށް މިލްކްވާނެ ފަދަ އެއްވެސް ސިޔާސަތެއް އެކަށައެޅުމުގެ ބާރު ނުވަތަ އެއްބަސްވުމެއް ހެދުމުގެ އިހުތިޔާރު ސަރުކާރަކަށް ނޯންނާނެ. އެ ކަމާމެދު ގޮތެއް ނިންމާނަމަ، އެކަން ނިންމަންވާނީ ސީދާ ދިވެހި ރައްޔިތުން،" އެމްޑީޕީ އިން ބުންޏެވެ.
އެމްޑީޕީގެ ބަޔާނުގައި، ރާއްޖެއަށް ބޭރުގެ އިންވެސްޓްމަންޓްސް މުހިންމުކަން ވެސް ފާހަގަކޮށްފައިވެ އެވެ. ނަމަވެސް އެފަދަ އިންވެސްޓްމަންޓްސް ގެންނަން ޖެހޭނީ ރައްޔިތުންނާ މަޝްވަރާކޮށް، ދެ ފުށްފެންނަ އުސޫލުތަކެއްގެ ތެރެއިން ކަމަށް އެ ޕާޓީ އިން ބުނެ އެވެ.
"ދިވެހި ރައްޔިތުންގެ ޑިމޮކްރެޓިކް ޕާޓީން ބޭރުގެ އިންވެސްޓަރުންނަށް އަބަދުވެސް މަރުހަބާ ކިޔަން. އަދި އެ ފަރާތްތަކަކީ ދިވެހި ރާއްޖޭގެ ތަރައްގީގައި ނުހަނު މުހިންމު ބައެއްކަމުގައި މި ޕާޓީން ދެކެން،" އެ ބަޔާނުގައި ބުނެފައިވެ އެވ.
"ދިވެހިރާއްޖޭގެ އިގްތިސާދު އެހެން ހަރުފަތަކަށް ގެންދިއުމަށްޓަކައި، ޕްރައިވެޓް ސެކްޓަރު ފުޅާކޮށް، މިނިވަން ވިޔަފާރީގެ ފުރުސަތުތައް އިތުރަށް ހުޅުވައިލުމުގެ ގޮތުން ހަރުދަނާ އުސޫލުތަކުން ކުރާ ކޮންމެ ކަމަކަށް މި ޕާޓީން ތަރުހީބުދެން."
ސަރުކާރުން ބުނަނީ ރަސްމާލެ އީގަލް ހިލްސްއަށް ދޫކޮށްލަނީ 99 އަހަރަށް ކަމަށެވެ. ނަމަވެސް އީގަލް ހިލްސް އާއި އެ ކުންފުނީގެ ވެރިޔާ މުހައްމަދު އަލައްބާރު ބުނެފައި ވަނީ ރަސްމާލެއިން ޕްރޮޕަޓީއެއް ގަންނަ މީހަކަށް 99 އަހަރުގެ ލީސްއެއް ލިބޭނެ ކަމަށާއި އެތަން ވިއްކާލާ ނުވަތަ ވާރުތަ ކުރާ ކޮންމެ ފަހަރަކު 99 އަހަރުގެ އާ ލީސް މުއްދަތެއް ފެށޭނެ ކަމަށެވެ.
ރަސްމާލޭގެ 500 ހެކްޓަރު ދޫކޮށްލަނީ އެކުއިޒިޝަން ކޮސްޓެއް އަދި ބިމު ކުއްޔެއް ނުނަގާ ގޮތަށެވެ. ސަރުކާރުން އަންދާޒާ ކުރަނީ އެ ޕްރޮޖެކްޓުން އުމުރުގައި ލިބޭނީ އެންމެ 45 ބިލިއަނެއްހާ ރުފިޔާ ކަމަށެވެ. ސަރުކާރަށް ލިބޭނެ ކަމަށް އެކި އޮފިޝަލުން ބުނާ އަދަދުތަކުގައި ވެސް ތަފާތުތަކެއް އެބަ ހުއްޓެވެ.
