ޝަންހާއީ، ޗައިނާ (އޮކްޓޫބަރު 10) - ޝަންހާއީ މާސްޓާސް ޓެނިސް މުބާރާތުގެ ދެ ވަނަ ބުރުން، ސާބިއާގެ ލެޖެންޑަރީ ޓެނިސް ތަރި ނޮވަކް ޖޮކޮވިޗް ކަޓައިފި އެވެ.
އުމުރުން 39 އަހަރުގެ ޖޮކޮވިޗް ވަނީ މީގެ 10 ދުވަސް ކުރިން، ބެއިޖިންގައި ކުރިއަށްދިޔަ ޗައިނާ އޯޕަންގެ ތަށި އުފުލާލައިފަ އެވެ. މިއީ، މިދިޔަ 11 މަސް ދުވަސް ތެރޭ ޖޮކޮވިޗަށް ލިބުނު ފުރަތަމަ ތަށްޓެވެ. ކެރިއަރުގެ 102 ވަަނަ ޓައިޓަލް އެވެ. އެއީ، އެ މުބާރާތުގެ ފައިނަލުގައި އަލެކްސް ޑި މިނޯ، އަނިޔާވެގެން މެޗު ދޫކޮށްލުމުންނެވެ. މިއީ، ޓުއާ ލެވަލް މުބާރާތެއްގައި ޖޮކޮވިޗް ތަށި ހޯދި ޖެހިޖެހިގެން 21 ވަނަ އަހަރެވެ. އަދި، ބެއިޖިންގައި އޭނާ ވަނީ ޖެހިޖެހިގެން 34 މެޗުން މޮޅުވެފަ އެވެ.
އޭގެ ފަހުން، ޝަންހާއީ މާސްޓާސް އަށް ނުކުތް، ޖޮކޮވިޗަށް ފުރަތަމަ ރައުންޑުގެ މެޗު ކުޅެން ނުޖެހި، އަނެއް ބުރުން ފުރުސަތު ލިބުނީ 10 ވަނަ އަށް ސީޑްކޮށްފައިވުމުންނެވެ. ދެ ވަނަ ބުރުގެ މެޗުގައި ޖޮކޮވިޗް ނުކުތީ ޕޮލެންޑްގެ ހިއުބަޓް ހުކާޒްއާ ދެކޮޅަށެވެ. ފޯރިގަދަކޮށް ދިގުލައިގެންދިޔަ މެޗުގައި ހުކާޒް ކުރިހޯދިއިރު، ސެޓުތައް ދިޔައީ، 6-4 6-3 އިންނެވެ.
މި ވަގުތު ދުނިޔޭގެ ރޭންކިންގެ 34 ގައި އޮތް ހުކާޒް ވަނީ 2023 ވަނަ އަހަރު ޝަންހާއީ މާސްޓާސް ކާމިޔާބުކޮށްފަ އެވެ. ޖޮކޮވިޗް އަތުން ހިއުކާޒް މޮޅުވެފައި މި ވަނީ މި ދެ ކުޅުންތެރިން ކެރިއަރުގައި ނުވަ ފަހަރު ބަދަލުކުރިއިރު، ފުރަތަމަ ފަހަރަށެވެ. މެޗަށް ފަހު، ހުކާޒް ބުނެފައިވަނީ، މި މޮޅު ހާއްސަވާ އެންމެ ބޮޑު ސަބަބަކީ ހަތް އަހަރު މަސައްކަތްކޮށްގެން ފުރަތަމަ ފަހަރަށް ޖޮކޮވިޗް ބަލިކުރެވުމުން ކަމަށެވެ.
އަނެއްކޮޅުން، މިއީ ޝަންހާއީ މާސްޓާސްގެ ކުއާޓާ ފައިނަލުގެ ކުރިން ޖޮކޮވިޗް މުބާރާތުން ކެޓި ފުރަތަމަ ފަހަރެވެ. ޝަންހާއީ މުބާރާތުގެ ދެ ވަނަ ބުރުން ކެޓުމުން، މުބާރާތް ފެށިއިރު، ދުނިޔޭގެ އަށް ވަނައިގައި އޮތް ޖޮކޮވިޗް، 11 ވަނަ އަށް ވެއްޓުމުގެ ފުރުސަތު އެބައޮތެވެ. އިޓަލީގެ ޓިއުރިންގައި ކުޅޭ ސީޒަނުގެ ފަހު މާސްޓާސްގައި ކުޅުމުގެ ފުރުސަތު ލިބެނީ ރޭންކިންގެ ގަދަ 8 އަށެވެ.
