މިލާން (އޮކްޓޫބަރު 7) - ކަކުލަށް ލިބުނު އަނިޔާއަކާ ހެދި ދުނިޔޭގެ އެއް ވަނަ ޓެނިސް ކުޅުންތެރިޔާ، ޖަނިކް ސިނާ އަށް މި އަހަރުގެ ޓެނިސް ސީޒަން ނިމިއްޖެ އެވެ.
މިދިޔަ ޖުލައި މަހު، ވިމަބްލަޑަން ޓެނިސް ޗެމްޕިއަންޝިޕްގެ ތަށި ދިފާއުކުރި ފަހުން ސިނާ އަށް ރަސްމީ މެޗެއްގައި ކުޅެވިފައިނުވެ އެވެ. އެއީ، ކަކުލަށް ލިބުނު އަނިޔާ އިން ރިކަވާވެގެން އެނބުރި ކުޅުމަށް އަންނަން ކުރި މަސައްކަތުގައި ކުރިއެރުމެއް ލިބިފައިނުވާތީ އެވެ.
"އަހަރެން ދިގު ކެރިއަށް ބިނާކުރަން ކުރާ މަސައްކަތަށް ވިސްނާއިރު، އެންމެ މުހިންމު އެއް ކަމަކީ މިހެން ކުރިމަތިވާ އަނިޔާގެ މައްސަލަތަކުގައި ރަނގަޅު ރިކަވަރީއެއް. އެހެންވުމުން، މި ވަގުތަށް ވާދަވެރި ޓެނިސް މެޗުތަކެއް ކުޅުމަށް ވުރެން އިސްކަންދޭން ބޭނުންވަނީ ރަނގަޅަށް ރިކަވާވުމަށް،" އުމުރުން، 25 އަހަރުގެ ސިނާ، އިންސްޓަގްރާމްގައި ޕޯސްޓްކުރި ވީޑިއޯއެއްގައި ބުނެފައިވެ އެވެ.
"މިދިޔަ އަހަރުތަކުގައި ޓެނިހުގައި އަހަންނަށް ވަރަށް އުފާވެރި ހަނދާންތަކެއް ވަނީ ދީފައި. އެކަމަކު، މި އަހަރު ނިމެން މި ދަނީ އެ ކަހަލަ ގޮތަަކަށް ނޫން، އަހަރެން ކުރިން ހުރި 100 ޕަސެންޓް ލެވަަަލަށް ދިއުމަށް މަސައްކަތް ކުރާނަން،"
ސިނާ ވަނީ މި ސީޒަނުގައި އާދަޔާހިލާފު ފޯމެއް ދަމަހައްޓައިފަ އެވެ. އެ ގޮތުން، ޓެނިހުގެ ސިންގަލްސް އިވެންޓްތަކުގައި 44 މެޗުން މޮޅުވިިއިރު، ބަލިވީ އެންމެ ތިން މެޗުންނެވެ.
ފަސް ގްރޭންޑް ސްލޭމް ޓެނިސް މުބާރާތުގެ ޗެމްޕިއަންކަން ހޯދާފައިވާ ސިނާ ވަނީ މި ފަހަރުގެ ޓެނިސް ސީޒަނުގައި، މާސްޓާސް 1000 ގެ ޖެހިޖެހިގެން ފަސް މުބާރާތުގެ ޗެމްޕިއަންކަން ހޯދައިފަ އެވެ. އެއީ، މާޗް މަހުން ފެށިގެން، މެއި މަހުގެ ނިޔަލަށް ކުރިއަށްދިޔަ މުބާރާތްތަކުގަ އެވެ.
ކަކުލަށް ލިބުނު އަނިޔާއާ ހެދި، ސިނާ އަށް ދެން މި ފަހަރުގެ ޓެނިސް ސީޒަނުގައި ނުކުޅެވޭއިރު، ޖަރުމަނުގެ އަލެކްސަންޑަ ޒްވެރެވް އަށް ފަހު މުބާރާތްތަކުގައި ރަނގަޅު ނަތީޖާތަކެއް ނެރެގެން މި ސީޒަން ނިންމާއިރު ދުނިޔޭގެ ރޭންކިން އެއް ވަނަ އަށް އެރުމުގެ ފުރުސަތު އެބައޮތެވެ. ޒްވެރެވް ވަނީ މި ފަހަރުގެ ޓެނިސް ސީޒަނުގައި، ފްރެންޗް އޯޕަން އާއި ޔޫއެސް އޯޕަން ކާމިޔާބުކޮށްފަ އެވެ.
