ނިއު ޔޯކް، ޔުނައިޓެޑް ސްޓޭޓްސް (އޮގަސްޓް 31) - ގްރޭންޑް ސްލޭމް ޓެނިސް މުބާރާތް، ޔޫއެސް އޯޕަންގެ ފުރަތަމަ ބުރުން ކަޓައި، ލެޖެންޑަރީ ޓެނިސް ކުޅުންތެރިޔާ، ސާބިއާގެ ނޮވަކް ޖޮކޮވިޗް، 20 އަހަރަށް ފަހު ދަށް ރެކޯޑަކާ ކުރިމަތިލާން ޖެހިއްޖެ އެވެ.
ގްރޭންޑް ސްލޭމް 24 މުބާރާތުގެ ތަށި ހޯދާފައިވާ ޖޮކޮވިޗް، 39، އެންމެ ފަހުން ގްރޭންޑް ސްލޭމް މުބާރާތެއްގެ ފުރަތަމަ ބުރުން ކަޓާފައިވަނީ 2006 ވަނަ އަހަރު އެވެ. އެއީ، އެ އަހަރުގެ އޮސްޓްރޭލިއަން އޯޕަންގައި ޕައުލް ގޯލްޑްސްޓެއިން އަތުންނެވެ. އޭގެ ފަހުން، ގްރޭންޑް ސްލޭމް ޓެނިސް މުބާރާތްތަކުގެ ފުރަތަމަ ބުރުގައި ކުޅެ، 78 މެޗުން މޮޅުވި ޖޮކޮވިޗަށް މި ފަހަރުގެ ޔޫއެސް އޯޕަންގެ ފުރަތަަމަ ބުރުގައި ވަނީ ނާކާމިޔާބުވެފަ އެވެ.
ދުނިޔޭގެ ރޭންކިން 48 ވަނައިގައި އޮތް އާޖެންޓީނާގެ މަރިއާނޯ ނަވޯންއާ ދެކޮޅަށް ކުޅެ، ފަސް ސެޓަށް ފަހު ޖޮކޮވިޗް ވަނީ ބަލިވެފަ އެވެ. މި މެޗުގެ ސެޓުތައް ގޮސްފައިވަނީ، 7-6 (7/5), 5-7, 4-6, 6-2, 6-1 އިންނެވެ. މުޅި މެޗަށް ބަލާއިރު، ޖޮކޮވިޗަށް ފިޒިކަލީ ގިނަ އުނދަގޫތަކެއް މި މެޗުގައި ކުރިމަތިވި އެވެ. އެ ގޮތުން، މެޗުގެ ތެރެއިން ޖޮކޮވިޗްގެ ހާލު ގޯސްވެ، ތުވާލި ބަހައްޓާ ބިން އަށް ހޮޑުލި މަންޒަރު ވެސް ކެމެރާ އިން ވަނީ ދައްކައިފަ އެވެ.
މެޗަށް ފަހު، ޖޮކޮވިޗް ބުނީ، މިއީ އޭނާ އަށް ވަރަށް ދަށްކޮށް ދިޔަ މެޗެއް ކަމުގައި ވިޔަސް، މަރިއާނޯ ދެއްކި ހިތްވަރަށް ތައުރީފު ކުރަން ޖެހޭ ކަމަށެވެ.
"އަހަންނަށް ރަނގަޅަށް ދިޔަ މެޗެއް ނޫން. އެކަމަކު، ހަމައެކަނި އަހަރެންގެ ވާހަކަ ދައްކަން ޖެހޭ މެޗެއްގެ ގޮތުގައި މި ވަގުތު ވެގެން ނުވާނެ. އަހަރެމެން އެބަޖެހޭ މަރިއާނޯ ކުރި ބުރަ މަސައްކަތުގެ އަގުވަޒަންކޮށް އެކަން ވެސް ފާހަގަކުރަން،" ޖޮކޮވިޗް ބުންޏެވެ.
މަރިއާނޯ ބުނީ، މިއީ އޭނާގެ ކެރިއަރުގައި މިހާތަނަށް ލިބުނު އެންމެ ބޮޑު މޮޅު ކަމަށެެވެ. އަދި، މި ކާމިޔާބާ އެކު، ކޮންފިޑެންސް ރަނގަޅުވާނެ ކަމަށާއި އެހެން ނަމަވެސް ކުޅުންތެރިއެއްގެ ގޮތުގައި ގިނަ ކަންކަން ދަސްކުރަން ޖެހޭކަން މަރިއާނޯ ވަނީ ފާހަގަކޮށްފަ އެވެ.
ހަތަރު ފަހަރަށް ޔޫއެސް އޯޕަން ތަށި ހޯދާފައިވާ ޖޮކޮވިޗަކީ، މި މުބާރާތުގައި 20 އަހަރު ކުޅުނު ހަތަރު ވަނަ ފިރިހެން ކުޅުންތެރިޔާ އެވެ.
