ދިރާގު ދިވެހި ޕްރިމިއާ ލީގުގައި މިއަދު ހަވީރު ކުޅުނު މެޗުގައި އެއް ކުޅުންތެރިއަކު މަދުކޮށް މެޗު ނިންމާލަން ޖެހުނު ނަމަވެސް ފަހު ވަގުތު ލަނޑު ޖަހައި، ބިސް ބުރު ސްޕޯޓްސް ކްލަބުން 2-1 އިން ބުރު ސްޕޯޓްސް ކްލަބް ބަލިކޮށްފި އެވެ.
ޕްރިމިއާ ލީގުގައި ބިސް ބުރުގެ ފުރަތަމަ މެޗުގައި ކްލަބް އީގަލްސް އަތުން 3-1 އިން ބަލިވީ އެވެ. ދެ ވަނަ މެޗުގައި، ބިސް ބުރުން ވަނީ 1-0 އިން ދިއްދޫ ސްޕޯޓްސް ކްލަބް ބަލިކޮށްފަ އެެވެ. އަދި، ބިސް ބުރުން މިއަދުގެ މެޗުގައި ބުރު ބަލިކުރީ ފަހަތުން އަރަ އެވެ. މި ނަތީޖާއާ އެކު މި ވަގުތު ބިސް ބުރު އޮތީ ލީގުގެ ހަތަރު ވަނައިގަ އެވެ. އެއީ، ތިން މެޗުން ހަ ޕޮއިންޓް ހޯދައިގެންނެވެ.
ގަލޮޅު ދަނޑުގައި މިއަދު ހަވީރު ކުޅުނު މެޗުގެ ފުރަތަމަ ހާފުގައި ބުުރުން ވަނީ ލީޑުނަގައިފަ އެވެ. ރަނގަޅު ކުޅުމަކާ އެކު މެޗު ފެށި ބުރުން ލީޑުނެގީ 30 ވަނަ މިނިޓްގަ އެވެ. މި ލަނޑު ޖަހައިދިނީ އަބްދުﷲ ޔާމީން (ޔާނު) އެވެ.
ފުރަތަމަ ޑިވިޝަނުގެ ގިނަ ކްލަބްތަކަށް ކުޅުނު މިސްރުގެ މިޑްފީލްޑަރު، ހަލީލް ޖަމާލް ދިން ބޯޅައަކަށް އަރައި ޔާނު މި ލަނޑު ޖެހީ ހަމަޖެހިލައިފައި ގޯލަށް ބޯޅަ ވައްދާލައިގެންނެވެ.
މެޗުގައި ބިސް ބުރަށް އުނދަގޫ ހާލަތެއް ކުރިމަތިވީ ކުޅުންތެރިއަކު މަދުވުމުންނެވެ. އެއީ، އެ ޓީމުގެ އުލޫފް އަހުމަދު އަށް ދެ ވަނަ ރީނދޫ ކާޑާ އެކު ރަތެއް ދެއްކުމުންނެވެ. އޭނާ އަށް ދެ ވަނަ ރީނދޫ ކާޑު ދެއްކީ، 76 ވަނަ މިނިޓްގަ އެވެ. އެކަމަކު ކުޅުންތެރިއަކު މަދުކޮށް ކުޅެ، ލަސްތަކެއް ނުވެ ބިސް ބުރުން އެއްވަރުކުރި އެވެ.
ބިސް ބުރުން ނަތީޖާ ހަމަހަމަކުރީ މެޗުގެ 80 ވަނަ މިނިޓްގަ އެެވެ. މި ލަނޑު އެ ޓީމަށް ޖަހައިދިނީ ކޯނަރަކުން ތަނަވަސްވި ފުރުސަތެއްގައި ބިދޭސީ ކުޅުންތެރިޔާ، އަލިއޫ އޮވޮލާބީ އެވެ. އޭނާ ފޮނުވާލި ބޯޅަ އަަމާޒުވީ ގޯލުގެ ކަނަށެވެ. އަދި، ބިސް ބުރުން ހިތްވަރު އެލުވާނުލައި ކުޅެ، އިތުރު ވަގުތުގެ ވެސް ފަހުކޮޅުގައި ލަނޑު ޖަހައި، ލީގުގައި ޖެހިޖެހިގެން ދެ ވަނަ މޮޅު މި ވަނީ ހޯދައިފަ އެވެ. މި ލަނޑު ޖަހައިދިނީ ފުރަތަމަ ޑިވިޝަނުގެ ކްލަބްތަކުން ފެނުނު، މަޖުދާން ސޯލިހު އެެވެ.
މި ނަތީޖާއާ އެކު، ބުރު މި ވަނީ މި ސީޒަނުގައި މިހާތަނަށް ކުޅުނު ހަ މެޗުން ވެސް ބަލިވެފަ އެވެ. ސީޒަން ފަށަން ކުޅުނު ކަޕް ވިނާސް ކަޕްގެ ތިން މެޗުން ބަލިވި ބުރު މި ވަނީ ދިވެހި ޕްރިމިއާ ލީގުގެ ފުރަތަމަ ތިން މެޗުން ވެސް ބަލިވެފަ އެވެ.
