މާޒިޔާގެ އެސިސްޓަންޓް ކޯޗު ސުޒެއިރުގެ މައްސަލަ ނިއު ރޭޑިއަންޓުން އެފްއޭއެމް އަށް ހުށަހަޅައިފި

ދިރާގު ދިވެހި ޕްރިމިއާ ލީގުގައި ރޭ ނިއު ރޭޑިއަންޓް ސްޕޯޓްސް ކްލަބާއި މާޒިޔާ ސްޕޯޓްސް އެންޑް ރެކްރިއޭޝަން ބައްދަލުކުރި މެޗުގެ ތެރެއިން ހިނގައިދިޔަ ހަމަނުޖެހުންތަކުގެ ތެރޭގައި، މާޒިޔާގެ އެސިސްޓަންޓް ކޯޗު، އަހުމަދު ސުޒެއިރު، ނިއުގެ އެސިސްޓަންޓް ކޯޗު، ސްޕެއިނުގެ ލޫޝިއާނޯ ސިގޭރާ ބާބޯސާ އަށް ހަމަލާދީފައިވާތީ އެ މައްސަލަ އެފްއޭއެމް އަށް ހުށަހަޅައިފި އެވެ. 

ނިއު އިން ވަނީ ރޭ ކުޅުނު މެޗުގެ އިތުރު ވަގުުތުގެ ފަހު މިނިޓްގައި ލަނޑު ޖަހައި، 3-2 އިން މާޒިޔާ ބަލިކޮށްފަ އެވެ. މިއީ، 2022 ވަނަ އަހަރުގެ އޭޕްރީލްގެ ފަހުން ލީގުގެ މެޗަކުން މާޒިޔާ ބަލިވި ފުރަތަމަ ފަަހަރެވެ. އަނެއްކޮޅުން، 2018 ގެ ފަހުން ލީގުގެ މެޗަކުން ނިއު އަށް މާޒިޔާ އަތުން ލިބުނު ފުރަތަމަ މޮޅެވެ. 

ނިއު ރޭޑިއަންޓުން ފަހު ވަގުތު މާޒިޔާ ބަލިކޮށްފި

މިރޭ ކުޅުނު ފޯރިގަދަ މެޗުގައި ނިއު ރޭޑިއަންޓުން މާޒިޔާގެ މައްޗަށް ކުރިހޯދީ 3-2 ގެ ނަތީޖާއަކުންނެވެ. މާޒިޔާ އިން ދެ ފަހަރު ލީޑުނެގި މި މެޗުގައި ނިއު އިން ދެ ފަހަރު ވެސް އެއްވަރުކުރި. ނިއު މޮޅުވީ މެޗުގެ އިތުރު ވަގުތުގެ ތެރޭގައި އެ ޓީމުގެ ބްރެޒިލް ފޯވާޑް ޑޯރީ ކާމިޔާބުކޮށްދިން ގޯލުން.

ރޭގެ މެޗުގައި އިތުރު ވަގުތުގައި ގިނަ ވަގުތުތަކެއް ކުޅެން ޖެހުނީ، މެޗުގެ 73 ވަނަ މިނިޓްގައި ހިނގަދިިޔަ ހަމަނުޖެހުމެއްގެ ސަބަބުން، ހަތް ވަރަކަށް މިނިޓަށް މެޗުގެ ކުޅުން މެދުކަނޑާލަން ޖެހުމުންނެވެ. ހަމަނުޖެހުން ހިނގީ، ރެފްރީ ފައުލަކަށް ކަށިގަނޑު ފުމެފައިވަނިކޮށް، ނިއުގެ ލައިބީރިއާ މިޑްފީލްޑަރު ޔާޔާ ބިލީޓީ ޖެހި ބޯޅައެއް މާޒިޔާގެ އަބްދުﷲ ލޫތު އިބްރާހިމް ގައިގައި ޖެހުމުންނެވެ. އެ ވަގުތު ދަނޑަށް ދެ ޓީމުގެ ކުޅުންތެރިންނާއި އޮފިޝަލުން އެރިއިރު، ވަގުތުތަކަކަށް މެޗުގެ ކުޅުން ހުއްޓާލަން ޖެހުނެވެ.

އެ ވަގުތުގައި ހިނގައިދިޔަ ހަމަނުޖެހުންތަކަށް ބަލައި، ނިއުގެ ބިލިޓީ އާއި އީތަން އަދި މާޒިޔާގެ އިޔާން އަބްދުލް އަލީމް އަށް ރީނދޫ ކާޑެއް ދެއްކިއިރު، މާޒިޔާގެ ހަސަން ޝިފާޒް (ޑުންގާ) އާއި ނިއުގެ އަބްދުﷲ މައިސާން (މައި) އަށް ރަތް ކާޑެއް ދެއްކި އެވެ.

މާޒިޔާގެ އެސިސްޓަންޓް ކޯޗު، ސުޒެއިރު އަށް ރަތެއް ދެއްކީ، ނިއުގެ އެސިސްޓަންޓް ކޯޗު، ލޫޝިއާނޯ އަށް ހަމަލާ ދިނުމުން ކަމަށް ނިއު އިން ނެރުނު ބަޔާނުގައި ވަނީ ބުނެފަ އެވެ. 

ނިއު އިން ބުނީ، ޖިސްމާނީ ގޮތުން ހަމަލާ ދިނުމަކީ ފުޓްބޯޅައިގައި އެއްވެސް ސިފައެއްގައި ހިނގައިގެންވާނެ ކަމެއް ނޫން ކަމަށާއި އެ ފަދަ އަމަލުތަކުގެ ސަބަބުން ފުޓްބޯޅައިގެ ތެރޭގައި އޮންނަ ރައްކާތެރި ކަމާއި ސަލާމަތަށް ހީނަރުކަން އަންނަ ކަމަށެވެ. އަދި، ކަމާބެހޭ ފަރާތަށް މާޒިޔާގެ އެސިސްޓަންޓް ކޯޗު ސުޒެއިރުގެ މައްސަލަ ހުށަހަޅާފައިވާ ކަމަށާއި މި މައްސަލައިގައި އެންމެ އެކަށޭނެ ފިޔަވަޅު އަޅަން ޖެހޭނެ ކަމަށް ނިއު އިން ވަނީ ގޮވާލައިފަ އެވެ. 

އެންމެ މުހިންމު ކަމެއްގެ ގޮތުގައި ނިއު އިން ކަށަަވަރުކުރަން ބޭނުންވަނީ، ލޫޝިއާނޯގެ އިތުރުން، އެ ކްލަބްގެ އެހެން އޮފިޝަލުންނަށް ކުޅުންތެރިންގެ ރައްކާތެރިކަން ކަމަށް ނިއުގެ ބަޔާނުގައި ބުނެފައިވެ އެވެ.