ދިރާގު ދިވެހި ޕްރިމިއާ ލީގުގައި މިރޭ، އިތުރު ވަގުތުގެ ތެރޭގައި ބްރެޒިލް ފޯވާޑް، ޑޮރިއެލްޓަން ގޯމޭސް ނަސިމެންޓޯ (ޑޯރީ) ޖެހި ގޯލުން ނިއު ރޭޑިއަންޓް ސްޕޯޓްސް ކްލަބުން 3-2 އިން މާޒިޔާ ސްޕޯޓްސް އެންޑް ރެކްރިއޭޝަން ބަލިކޮށްފި އެވެ.
އެންމެ ފަހުން ފަސް ފަހަރު ލީގު ކާމިޔާބުކުރި، މާޒިޔާ ލީގުގެ މެޗަކުން ބަލިވެފައި މި ވަނީ ދެ ސީޒަން ފަހުންނެވެ. އެންމެ ފަހުން މާޒިޔާ ލީގު މެޗަކުން ބަލިވީ، 2022 ވަނަ އަހަރުގެ އޭޕްރީލް މަހު، އީގަލްސް އަތުން 1-0 އިންނެވެ. އޭގެ ފަހުން، މި ވީ މުއްދަތުގައި، ލީގުގައި މާޒިޔާ ކުޅުނު 46 މެޗުން ވެސް ބަލިވެފައިނުވެ އެވެ. އެ މެޗުތަކުގެ ތެރެއިން 42 މެޗުން މާޒިޔާ މޮޅުވިއިރު، ހަތަރު މެޗުން ވަނީ އެއްވަރުވެފަ އެވެ.
މި ސީޒަނުގައި މީގެ ކުރިން، ނިއު އާއި މާޒިޔާ ކުޅުނު ތިން މެޗު ވެސް 90 މިނިޓް ތެރޭ އެއްވަރުވިއިރު، މާޒިޔާ އިން ވަނީ ޕެނަލްޓީ ޖަހައިގެން ޗެރިޓީ ޝީލްޑް މެޗާއި ކަޕް ވިނާސް ކަޕް ފައިނަލުގައި ނިއު ބަލިކޮށްފަ އެވެ.
ގަލޮޅު ދަނޑުގައި މިރޭ ކުޅުނު މެޗު ފަށައިގެން ފުރަތަަމަ 11 މިނިޓް ތެރޭ ނިއުގެ ހަތަރު އެޓޭކް ފެނިގެންދިޔައިރު، އޭގެއިން އެއްވެސް ފުރުސަތެއްގައި ގޯލެއް ޖެހޭ ގޮތެއްނުވި އެވެ.
މެޗުގެ ފަސް ވަނަ މިނިޓްގައި ނިއުގެ ބްރެޒިލް މިޑްފީލްޑަރު، ގޯމޭސް ޑަ ސިލްވާ ޖެހި ގޯލު ވަނީ އޮފްސައިޑް ކަމަށް ނިންމައިފަ އެވެ. އޭގެ ދެ މިނިޓް ފަހުން، ނިއުގެ ޑޯރީ ދިން ބޯޅައަަކަށް އަރައި، ނިއުގެ ހަސަން ރާއިފް އަހުމަދު (ހަންނަ)، މުޅިން ހުސްކޮށް ހުރެފައި ޖެހި ބޯޅަ މާޒިޔާގެ ކީޕަރު، ހުސެއިން ޝަރީފް (ހުސެން) ވަނީ މަތަކޮށްފަ އެވެ. މެޗުގެ 10 ވަނަ މިނިޓްގައި، ނިއުގެ އީތަން އިބްރާހިމް ޒަކީ ހުސްކޮށްލާފަައި ޑަ ސިލްވާ އަށް ދިނުމުން ފޮނުވާލި ބޯޅަ ހުރަސް ދަނޑިމަތިން ދިޔައިރު، އޭގެ މިނިޓެއް ފަހުން، ޑަ ސިލްވާގެ ޝޮޓެއް ކީޕަރު ހުސެން އަތުޖެހިފައި ރީބައުންސަށް ނުކުތުމުން ޑޯރީ ޖެހި ބޯޅަ ދިޔައީ ބޭރުންނެވެ.
ނިއު އަށް ލަނޑެއް ޖަހަން ލިބުނު ފުރުސަތުތަކުގެ ބޭނުން ނުހިފުމުގެ ނަތީޖާ ފެނުނީ ހިތިކޮށެވެ. މާޒިޔާ އިން ކުރި ރަނގަޅު ފުރަތަމަ އެޓޭކުގައި މެޗުގެ 17 ވަނަ މިނިޓްގައި ލަނޑު ޖަހައި ލީޑުނެގި އެވެ. މިއީ، މާޒިޔާ އަށް އިބްރާހިމް އައިސަމް ޖަހައިދިން ލަނޑެކެވެ. މާޒިޔާގެ އަހުމަަދު އައިހަމް (ފަތޯ) އޭރިއާތެރެއަށް ވަދެ، ޖެހި ބޯޅަ ދަނޑީގައި ޖެހިފައި ކުޅުމުގެ ތެރެއަށް އައި ވަގުތު، މާޒިޔާގެ އަބްދުﷲ ލޫތު އިބްރާހިމް (ސާނޭ) އަށް ލިބުމުން، އޭނާ ތަނަވަސްކޮށްދިން ފުރުސަތެއްގައި އައިސަމް ވަނީ ތިރިތިރިން ގޯލަށް ބޯޅަ ވައްދާލައިފަ އެވެ.
މެޗުގެ 29 ވަނަ މިނިޓްގައި ނިއު އޭރިއާތެރެއިން މާޒިޔާގެ އައިހަމް ޖެހި ބޯޅަ ދިޔައީ ގޯލާ ސީދާނުވެ އެވެ. އަދި، ކައުންޓަ އެޓޭކުގައި މާޒިޔާގެ ބެނިން ފޯވާޑް، ކޮޑްޖޯ ގޯމޭސް އަށް ލިބުނު ފުރުސަތުގައި ބޯޅަ ކޮންޓްރޯލް ނުކުރެވުމުން، އެޓޭކުގެ ބޭނުމެއް ނުހިފުނެވެ.
ނިއު އަށް ފުރަތަމަ ހާފު ނިމުމުގެ ކުރިން އެއްވަރުކޮށްދިން ލަނޑު ޖެހީ ކުރިން މާޒިޔާ އަށް ކުޅުނު ހަންނަ އެވެ. މިއީ، 40 ވަނަ މިނިޓްގައި ޑޯރީ ހުސްކޮށްލާފައި އޭރިއާތެރެއިން ދިން ބޯޅައަކަށް އަރައި، ގޯލުގެ ދުރު ކަނަށް އަމާޒުކޮށްލައިގެން ހަންނަ ޖެހި ލަނޑެކެވެ. އޭގެ ހަަތަރު މިނިޓް ފަހުން، ނިއުގެ މުހައްމަދު ނާއިމްގެ ބާރު ޝޮޓެއް މާޒިޔާގެ ކީޕަރު ހުސެން ވަނީ މަތަކޮށްފަ އެވެ.
ދެ ވަނަ ހާފުގެ ފެށުން ވެސް ދިޔައީ ފުރަތަމަ ހާފެކޭ އެއްގޮތަށެވެ. އެ ގޮތުން، ނިއު އިން ރަނގަޅު ހަމަލާތަކެއް މި ހާފުގައި ވެސް ފޮނުވާލި އެވެ. މެޗުގެ 52 ވަނަ މިނިޓްގައި ޑޯރީ ބޮލުން ފޮނުވާލި ބޯޅައެއް ކީޕަރު ހުސެން މަތަކުރިއިރު، ދެ މިނިޓް ފަހުން، ނިއުގެ ލައިބީރިއާ މިޑްފީލްޑަރު، ޔާޔާ ބިލިޓީ ބޮލުން ފޮނުވާލި ބޯޅަ ދިޔައީ ބޭރުންނެވެ.
މާޒިޔާ އިން ވަނީ މި ހާފުގެ ފުރަތަމަ ކައުންޓަ އެޓޭކުގައި ވެސް ލަނޑު ޖަހައިފަ އެވެ. އެ ގޮތުން، 61 ވަނަ މިނިޓްގައި އައިހަމްގެ މޮޅު ކުޅުމަކަށް ފަަހު، އަރިމަތިން ލޫތު އަށް ދިނުމުން އޭނާ ވަނީ ހުސްކޮށްލާފައި ގޯލު ކުރިމައްޗަށް އައި އައިސަމް އަށް ދީގެން މި ގޯލު ޖަހައިފަ އެވެ. މާޒިޔާ އިން ލީޑުނެގިތާ ހަ މިނިޓް ފަހުން ނިއު އަށް އެއްވަރުކޮށްދިނީ ދެ ވަނަ ހާފުގައި ބަދަލަކަށް ކުޅެން އެރި އަލީ ފާސިރު (ސެންޓޭ) އެވެ. މިއީ، މެޗުގެ 67 ވަނަ މިނިޓްގައި ޑޯރީ ފޮނުވާލި ޝޮޓެއް ކީޕަރު ހުސެން ފައިން މަތަކުރުމުން ރީބައުންސަކުން ސެންޓޭ ޖެހި ގޯލެކެވެ.
މެޗުގެ 73 ވަނަ މިނިޓްގައި ހަމަނުޖެހުމެއް ހިނގައިގެން މެޗު ހަތް ވަރަކަށް މިނިޓަށް ހުއްޓާލަން ޖެހުނެވެ. އެއީ، ރެފްރީ ފައުލަކަށް ކަށިގަނޑު ފުމެފައިވަނިކޮށް، ނިއުގެ ބިލީޓީ ޖެހި ބޯޅައެއް މާޒިޔާގެ ލޫތު ގައިގައި ޖެހުމުންނެވެ. އެ ވަގުތު ދަނޑަށް ދެ ޓީމުގެ ކުޅުންތެރިންނާއި އޮފިޝަލުން އެރިއިރު، ވަގުތުތަކަކަށް މެޗުގެ ކުޅުން ހުއްޓާލަން ޖެހުނެވެ. އެ ވަގުތުގައި ހިނގައިދިޔަ ކަންތައްތަކަށް ބަލައި، ނިއުގެ ބިލިޓީ އާއި އީތަން އަށް ރީނދޫ ކާޑެއް ދެއްކިއިރު، މާޒިޔާގެ ހަސަން ޝިފާޒް (ޑުންގާ) އާއި ނިއުގެ އަބްދުﷲ މައިސާން (މައި) އަށް ރަތް ކާޑެއް ދެއްކި އެވެ. އަދި، މާޒިޔާގެ އެސިސްޓަންޓް ކޯޗު އަހުމަދު ސުޒެއިރު އަށް ވެސް ރަތް ކާޑެއް ދެއްކި އެވެ.
ދެ ޓީމުގެ ވެސް ކުޅުންތެރިއަކު މަދުކޮށް، އަލުން ކުޅުން ފެށިގެން މެޗުގެ 81 ވަނަ މިނިޓްގައި، ނިއުގެ ޑޯރީ އަށް އެ ޓީމަށް ލީޑުނަގައިދޭން ލިބުނު ރަނުގެ ފުރުސަތު ބޭނުމެއް ނުކުރެވުނެވެ. ކުޑަ އޭރިއާތެރެއިން ހުސްކޮށް ލިބުނު ބޯޅަ އަކަށް އަރައި ޑޯރީ ޖެހި ޝޮޓް ދިޔައީ ހުރަސްދަނޑިމަތިންނެވެ.
މާޒިޔާ އިން ބަދަލަކަށް ކުޅެން އެރި އިބްރާހިމް މަހުދީ (ފޭދޫ އިއްބެ)ގެ މަސައްކަތުން މެޗުގެ އިތުރު ވަގުތުގައި ތަނަވަސްކުރި ފުރުސަތެއްގައި، އެ ޓީމުގެ ނައިޖީރިއާ ފޯވާޑް، ބެންޖަމިން ކުކޫ ޖެހި ޝޮޓް ނިއުގެ ކީޕަރު، އަހުމަދު ސަމީރު ވަނީ އަތަށް ނަގައިފަ އެވެ.
އޭގެ ފަހުން، ނިއުގެ ޑަ ސިލްވާ ނަގައިދިން ހުރަހަކަށް އަރައި ސެންޓޭ ފޮނުވާލި ބޯޅަ ދިޔައީ ހުރަސްދަނޑިމަތިންނެވެ.
އިތުރު ވަގުތުގެ ގޮތުގައި ދެއްކި ވަގުތުގެ ފަހު މިނިޓްގައި، ނިއު މޮޅުކޮށްދިން ލަނޑު ޑޯރީ ޖެހީ، އަަރިމަތިން ނެގި ހުރަހަކަށް އަރަ އެވެ. އޭނާ ފޮނުވާލި ބޯޅަ ގޯލަށް ވަނީ ކީޕަރު ހުސެން އަތުގައި ޖެހިފަ އެވެ.
