ދިވެހި ސަރުކާރަށް އާމްދަނީގެ ގޮތުގައި މިދިޔަ މަހުގެ ނިޔަލަށް 30 ބިލިއަން ރުފިޔާއަށް ވުރެ ބޮޑު އަދަދެއް ވަދެފައިވާ ކަމަށް ފިނޭންސް މިނިސްޓްރީގެ ތަފާސްހިސާބުތަކުން ދައްކައިފި އެވެ.
ފިނޭންސުގެ އެންމެ ފަހުގެ ވީކްލީ ފިސްކަލް ޑިވެލޮޕްމަންޓް ރިޕޯޓުގައިވާ ގޮތުގައި މި މަސް ފެށިއިރު 30.8 ބިލިއަން ރުފިޔާ ވަދެއްޖެ އެވެ. މިއީ މިދިޔަ އަހަރަށް ވުރެ އިތުރު އަދަދެއް ނަމަވެސް އެހެން އަހަރުތަކުގައި ފެންނަ ވަރަށް، އާމްދަނީގެ ކުރިއެރުމެއް ނުފެނެ އެވެ.
މިދިޔަ އަހަރުގެ މި މުއްދަތާ އަޅާ ބަލާއިރު، މި އަހަރު އިތުރަށް ވަދެފައި ވަނީ 536 މިލިއަން ރުފިޔާ އެވެ.
އާމްދަނީގެ ތެރެއިން ޓެކްސްގެ ގޮތުގައި 23.8 ބިލިއަން ރުފިޔާ ލިބިފައިވާއިރު، ޓެކްސް ނޫން އާމްދަނީގެ ގޮތުގައި 6.5 ބިލިއަން ރުފިޔާ ވަނީ ލިބިފަ އެވެ. ޓެކްސް އާމްދަނީ މިދިޔަ އަހަރަށް ވުރެ އިތުރު ނަމަވެސް ޓެކްސް ނޫން އާމްދަނީ މިދިޔަ އަހަރަށް ވުރެ އެއް ބިލިއަން ރުފިޔާ މަދެވެ.
ޓެކްސް ނޫން އާމްދަނީ މިދިޔަ އަހަރަށް ވުރެ މަދު ނަމަވެސް، މި އަހަރުގެ ތެރޭގައި ލިބޭނެ ކަމަށް އަންދާޒާކޮށްފައިވާ 8.7 ބިލިއަން ރުފިޔާގެ 75 ޕަސެންޓު ވަދެއްޖެ އެވެ. މިހެން ކަމުން އަހަރު ބާކީ އޮތް ބައިގައި ޓެކްސް ނޫން އާމްދަނީ ލިބޭނެ ކަމަށް ބަޖެޓުގައި އަންދާޒާ ކުރި ވަރަށް ލިބޭނެ ކަމަށް ބެލެވެ އެވެ.
މިދިޔަ އަހަރަށް ވުރެ ޓެކްސް އާމްދަނީ މި އަހަރު ދޮޅު ބިލިއަން ރުފިޔާ އިތުރުވީ ނަމަވެސް، ޓެކްސް އާމްދަނީ މަޑުޖެހެމުން އަންނަ ކަމަށް ތަފާސްހިސާބުތަކުން ދައްކަ އެވެ. ވަކިވަކި ޓެކްސްތަކަށް ބަލާއިރު، މި މަޑުޖެހުމުގެ ސަބަބަކީ ޓޫރިޒަމުން ވަންނަ އަދަދު މަދުވާން ފެށުމެވެ.
އެންމެ ފަހުގެ ރިޕޯޓަށް ބަލައިއިރު ޓޫރިޒަމް ޓެކްސްތަކުގެ ތެރެއިން މިދިޔަ އަހަރަށް ވުރެ މަދު ނުވަނީ އެއާޕޯޓު ޑިޕާޗާ ޓެކްސް އެކަންޏެވެ. މި ޓެކުހަށް ވުރެ ބޮޑު އާމްދަނީއެއް ވަންނަ ޓީޖީއެސްޓީ އާއި ގްރީން ޓެކްސް މި އަހަރު ލިބުނު ވަރު މިދިޔަ އަހަރަށް ވުރެ މަދެވެ.
އާމްދަނީއަށް މި އައި މަޑުޖެހުން ސީދާ ގޮތުން ގޮސް ގުޅެނީ ދިވެހި އިގުތިސޯދުގެ މައި ހަރަކާތް އަދި ދައުލަތަށް ވަންނަ އާމްދަނީގެ 60 ޕަސެންޓަށް ވުރެ ބޮޑު އަދަދެއް އެ ސިނާއަތަކާ ގުޅިފައިވާ ޓޫރިޒަމުގެ ހަރަކާތްތެރިކަމަށް އައި މަޑުޖެހުމާ އެވެ.
ޓޫރިޒަމަށް އަރާފައިވާ ލޮޅުމާއެކީ، މި އަހަރު އަންދާޒާ ކުރި ވަރަށް ޓޫރިސްޓުން ނާންނާނެ ކަމަށް ވަނީ ބެލެވެން ފަށާފަ އެވެ. މިއާ އެކީ ދައުލަތުން އަންދާޒާ ކުރި ވަރަށް އާމްދަނީ ނުލިބުމުގެ ފުރުސަތު ވެސް އަންނަނީ ދުވަހުންދުވަހަށް ބޮޑުވަމުންނެވެ.
