އޮޅުވާލުމުގެ ފަރުދާގެ ފަހަތުން އިގުތިސޯދު އަނދަވަޅަކަށް!

ނޮވެމްބަރު 2023، ގެ ހަވީރު ޖުމްހޫރީ މައިދާނުގައި ހުންނަވައި ދިވެހި ރައްޔިތުންގެ ކުރިމަތީގައި ރައީސުލްޖުމްހޫރިއްޔާގެ ހުވާ ކުރެއްވުމަށް ފަހު ރައީސް މުހައްމަދު މުއިއްޒު އިފްތިތާހީ ތަގުރީރު ދެއްވިއިރު ވިދާޅުވީ އެމަނިކުފާނު ހުއްޓިވަޑައިގެން ހުންނެވީ "ޚުޠޫރަތްތެރި ވަޅުގަނޑެއްގެ ތުންފަތްމަތީގައި" ކަމަށެވެ. ހަވީރުގެ ފިނީގައި އެ މައިދާނަށް ޖަމާވެ ތިބި މީހުންނާއި، ޓީވީތަކާއި ރެޑިއޯތަކުން އެ ތަގުރީރު ކަނުލައި އަހަމުންދިޔަ ކޮންމެ މީހަކަށްމެ އެމަނިކުފާނު އެ އިޝާރަތް ކުރެއްވީ ކޮން ވަޅުގަނޑަކަށްކަން ސާފު ވާނެ އެވެ. 

"މި ދަންނަވާ ވަޅުގަނޑަކީ، ދިވެހިރާއްޖޭގެ އިޤުތިޞާދު މިއަދު ވެއްޓިފައި މި އޮތް ފުން އަނދަވަޅު. މިއަދު އަޅުގަނޑުމެން ދިވެހި ދައުލަތާ ހަވާލުވާއިރު، ދިވެހި ދައުލަތުގެ ދަރަނި ވަނީ އެކު ޖުމުލަ 119 ބިލިއަން ރުފިޔާއަށް އަރާފައި. މިއީ ރާއްޖޭގެ މުޅި މާލީ ހަޔާތުގައި ވެސް ދިވެހި ތާރީޚު ދުށް އެންމެ ބޮޑު ދަރަނި. އެހެން ނަމަވެސް، މިކަންކަމުން އަރައިގަތުމަށްޓަކައި އިރާދަކުރެއްވިއްޔާ، އަޅުގަނޑުމެން ނިކަން ހަރުދަނާ، ވަރަށް ހަލުވި ފިޔަވަޅުތައް އަޅާނަން،" މުއިއްޒު ވިދާޅުވި އެވެ. 

ރިޔާސީ ކެމްޕޭނުގެ ތެރޭގައި ވެސް މުއިއްޒު އެންމެ ބޮޑަށް ދެއްކެވީ އިގުތިސޯދު ހަމައަކަށް އެޅުވުމުގެ ވާހަކަ އެވެ. އިގުތިސޯދު މެނޭޖުކުަރަން އެނގޭ ކަމަށާއި އެކަމަށް ބޭނުންވާ ފައިސާ ލިބޭނެ ކަމުގެ ފެހި ސިގްނަލް ގައުމުތަކުން ދީފައިވާ ކަމަށް ތަކުރާރުކޮށް ވިދާޅުވަމުން ގެންދެވި އެވެ. ދަރަނި ކުޑަކުރަން ޖެހޭ ކަމަށާއި ސަރުކާރުގެ ހަރަދުތައް ކުޑަކުރަން ޖެހޭ ކަމަށް އެކި ޕޯޑިއަމްތަކުގައި ގެންދެވީ ވިދާޅުވަމުންނެވެ.

ވެރިކަމުގެ ފުރަތަމަ ތަގުރީރުގައި އިގުތިސޯދު އަވަސް ފަރުވާއަށް ބޭނުންވެފައިވާ ކަމަށާއި ހަރަދު ކުޑަކުރެވޭނެ އާ ގޮތްތައް އީޖާދުކުރައްވާނެ ކަމުގެ ވައުދު ވެވަޑައިގެންނެވި އެވެ. ދިވެހިންގެ އެތައް ބަޔަކު މި ރިޔާސީ ދައުރު ފެށީ ހަރަދު ކުޑަކޮށް، އިގުތިސޯދަށް މުއިއްޒު އަވަސް ފަރުވާ ދެއްވާނެކަމުގެ ފޮނި އުންމީދާއެކު އެވެ. 

އެހެން ނަމަވެސް، އިގުތިސޯދީ ހަގީގަތާ ކުރިމަތިލުމުގެ ބަދަލުގައި މުއިއްޒު އިސްކުރެއްވީ ހަގީގަތް އޮޅުވާލުމަށެވެ. އިގުތިސޯދަށް ބޭނުންވި އަވަސް ފަރުވާ ލަސްކުރެއްވީ އެވެ. ދައުަލަތުގެ އާމްދަނީ އެތައް ގުނައެއް އިތުރުވިއިރު ހަރަދު ކުޑަ ނުކުރެއްވި އެވެ. ދަރަނި އިތުރުކުރެއްވީ އެވެ. އޭގެ ނަތީޖާ ޑޮލަރުގެ އަގަށް މިދިޔަ މުއްދަތުގައި އައި ބަދަލުން އެންމެނަށް ސާފެވެ. 

ހާސް އަހަރުވީ މި ދިވެހި ދައުލަތަކީ ނޮވެމްބަރު 17، 2023 ގައި ފެށުނު ދައުލަތެއް ނޫނެވެ. މި ދައުލަތަށް ލިބޭ ފައިސާ އާއި ކުރާ ހަރަދާއި ނަގާ ދަރަންޏަކީ އެކި ޒަމާނު އެކި ގޮތަށް ރެކޯޑުކޮށް ބަލަހައްޓަމުން އަންނަ މައުލޫމާތެކެވެ. ސަރުކާރުތައް ފުރޮޅި، އާ ބަޔަކު ވެރިކަމާ ހަވާލުވިޔަސް އެއީ ދިވެހި ދައުލަތުގެ ނަމުގައި ކުރާ މުއާމަލާތަކަށް ވާތީ ޒިންމާވާން ޖެހެނީ ދައުލަތުންނެވެ. އެއީ ދައުލަތެއްގެ އެންމެ އަސާސީ ސިފަ އެވެ. 

ރައްޔިތުންގެ މަޖިލީހުގެ ސުޕަ މެޖޯރިޓީ އާއި ދައުލަތުގެ ހުރިހާ މުއައްސަސާއަކާ ކުންފުންޏެއްގެ ކޮންޓްރޯލް ލިބުމަށްފަހު ވެސް މި ސަރުކާރު ދަމަމުން އައި  ހާސަރަކީ ބޮޑު ދަރަންޏަކާއެކު ވާރުތަވީ އިގުތިސޯދެއްގެ ވާހަކަ އެވެ. މިދިޔަ ސަރުކާރުން ފައިސާ ޗާޕުކުރުމުގެ ވާހަކަ އެވެ. މި އަހަރުގެ ރިޔާސީ ބަޔާނުގައި ވެސް އިގުތިސޯދާ ގުޅޭގޮތުން މުއިއްޒު ވިދާޅުވީ ހަމަ އެއް ލަވައެކެވެ. އިގުތިސޯދީ ދަތިކަމުގެ ޒިންމާ އެޅުވީ ކުރީ ސަރުކާރުގެ ބޮލުގަ އެވެ.

ހަރަދު ކުޑަކުރުމާއި މާލީ ރިފޯމްތަކުގެ ވާހަކަ އޮތީ މިލިއަނުން ހަރަދުކޮށްގެން ފަތުރާ ޕްރޮޕަގަންޑާ ހެޑްލައިންތަކުގަ އެވެ. ހޯމް ގްރޯން ރިފޯމް އެޖެންޑާއެއްގެ ވާހަކަ ވެސް ވަރަށް ބާރަށް ދެކެވުނެވެ. ނަމަވެސް، އަސްލު ހާލަތު އާންމުންނާއި ވިޔަފާރިތަކުން ދިޔައި ތަޖުރިބާ ކުރަމުންނެވެ. ޑޮލަރު މާރުކުރުން މަޖުބޫރުކުރުމާއި ޓެކްސް ބޮޑުކުރުން ފަދަ ބަދަލުތަކާއެކު ވެސް ރަސްމީ ރޭޓުގައި ޑޮލަރު ނުލިބޭކަމުގެ ޝަކުވާ އޮތީ ބޮޑުވެފަ އެވެ. ދައުރު ފެށުނުއިރު 17.50ރ. އަށް ލިބުނު ޑޮލަރު ހުރީ20ރ. ގަ އެވެ. 

ހާލަތު ދުވަހެއް ދުވަހަކަށް ގޯސްވަމުން ދަނިކޮށް މި އަހަރުގެ ފެބްރުއަރީ މަހުގެ ފަހުކޮޅު މެދުއިރުމަތީގައި ހަނގުރާމަ ފެށިއްޖެ އެވެ. ސައްތައިން ސައްތަ އިމްޕޯޓަށް ބަރޯސާވާ ގައުމަކަށްވީ ނަމަވެސް ކުރިއަށް އިންތިހާބެއް އޮތުމާއެކު ސަރުކާރަށް ސިޔާސީ ގޮތުން ބުރަ ނިންމުމެއް ނިންމަން ނުކުރުނެވެ. ޓޫރިސްޓުން މަދުވެ އާމްދަނީ ދަށްވާނެކަން އެނގުނުއިރު ވެސް ސަރުކާރުން ހިޔާރު ކުރީ ކަމެއް ނުވާ ކަމަށް ހެދިގެން ތިބުމަށެވެ. 

""ބޮޑު ހަނގުރާމައެއް މި އޮތީ އަޅުގަނޑުމެންގެ ތެރޭގައި. އަދި ހަނގުރާމަ މި އޮތީ އަޅުގަނޑުމެންގެ ސަރަހައްދާ ދުރު ނޫން ހިސާބެއްގައި. އަދި މި ހަނގުރާމަ ދެން ބަދަލުވެގެންދާނީ ތިން ވަނަ ބޮޑު ހަނގުރާމައަށް ނޫން ކަމެއް ވެސް ނޭނގޭ. އެވަރުގެ ނުރައްކާތެރި ކަމެއްގެ ތެރޭގައި އުޅޭއިރު ވެސް ހަމަ މި ވިދާޅުވަނީ އެއްވެސް ކަމަކާ ހާސްވާކަށް ނުޖެހެއޭ،" މާޗު 26، ގައި ކުރީގެ ރައީސް އަބްދުالله ޔާމީން ވިދާޅުވި އެވެ. 

އޭރު ވެސް ހާހުން ދިޔައީ ވަޒީފާ އުފައްދަމުންނެވެ. މުޅި ދުނިޔޭގެ އިގުތިސޯދު ރިސެޝަންއަކަށް ގޮސްދާނެކަމުގެ އިންޒާރު މާލީ ތަޖުރިބާކާރުން މެދުކެނޑުމެއްނެތި ދެމުންދިޔައިރު ވެސް ޕްރޮޖެކްޓުތައް ދިޔައީ ފަށަމުންނެވެ. ރަސްމީ ދަތުރުތައް މަދުކޮށްލުމާއި ޕީއެސްއައިޕީގެ ތަރުތީބައް ބަދަލު ގެނައުން ފިޔަވައި އިތުރު ފިޔަވަޅެއް އިންތިހާބު ނިމުމާ ހަމައަށް ސަރުކާރުން އަޅާފައިނުވެ އެވެ. 

ޑޮލަރު އާމްދަނީ ދެ ގުނަވީއިރު ދަރަނި ވެސް އިތުރުވެއްޖެ

ޑޮލަރުގެ މައްސަލަ ހައްދުން ނެއްޓިގެން ދިޔުމުގައި ވާރުތަވީ އިގުތިސޯދީ ހާލަތާއި ބޮޑު ދަރަނީގެ ބަހަނާ ސަރުކާރުން ދައްކަމުން އަންނައިރު އެކަމުގައި ސަރުކާރުން ނުދައްކާ ވާހަކައެއް އެބައޮތެވެ. އެއީ މި ސަރުކާރުގެ ދެ އަހަރާ ބައިގެ ތެރޭގައި ރާއްޖޭގެ އެއްވެސް ސަރުކާރަކަށް ޑޮލަރުން އާމްދަނީ ނުވަންނަ ވަރަށް މި ސަރުކާރަށް އެ މުއްދަތުގެ ތެރޭގައި ވަދެފައިވާ ކަމެވެ. އެ ވާހަކަ ސަރުކާރުން ނުދައްކަނީ ގަސްތުގައި އޮޅުވައިލުމުގެ ބޭނުމަށެވެ. 

މި ރިޕޯޓުގެ ބޭނުމަށް "ކުރީ ސަރުކާރު"ގެ ދެ އަހަރާ ބައިގެ ތެރޭގައި ލިބުނު ޑޮލަރު އާމްދަނީގެ ނަންބަރުތަކަށް ބަލާލިއިރު އެމްޑީޕީގެ ދެވަނަ ސަރުކާރަށް އެ މުއްދަތުގައި 1.3 ބިލިއަން ޑޮލަރުގެ އާމްދަނީ ލިބުނެވެ. ޓެކްސް ބޮޑުކުރުމާއި ޑޮލަރު މާރުކުރަން މަޖުބޫރުކުރުން ފަދަ ސިޔާސަތުތަކާއެކު މި ސަރުކާރަށް ޑޮލަރުން އާމްދަނީގެ ގޮތުގައި 3.6 ބިލިއަން ޑޮލަރު ލިބުނެވެ. 

"އާމްދަނީގެ ގޮތުގައި ޑޮލަރުވެސް ހިމަނައިގެން 85 ބިލިއަން ރުފިޔާ, ޑޮލަރު އާމްދަނީގެ ގޮތުގައި ގާތްގަނޑަކަށް 40 ބިލިއަން ރުފިޔާ އެބައިން ލިބިފައި އެނގޭތޯ. އެހެންވީމަ މިދިޔަ ސަރުކާރާ އަޅާބަލާއިރު ދެ އަހަރާއި ބައިގެ ތެރޭގައި ގާތްގަނޑަކަށް 48 ބިލިއަން ރުފިޔާ އިތުރަށް މި ސަރުކާރަށް ލިބިފައި އެބަހުރި. ކޮބާ ކިހިނެއް ކޮން ތަނަކަށް ހަރަދުކުރީ," އޮގަސްޓު 27، ގައި މިދިޔަ ސަރުކާރުގެ ފިނޭންސް މިނިސްޓަރު އަމީރު ވިދާޅުވި އެވެ. 

ދަރަނި ދެއްކުމަށް ހޭދަކުރުމަށްފަހު ވެސް އެހެން އެއްވެސް ސަރުކާރަކަށް ބޭނުންކުރަން ނުލިބޭ މިންވަރަށް މި ސަރުކާރުގެ ތިޖޫރިއަށް ޑޮލަރު ވަދެފައި އެބަހުއްޓެވެ. ފިނޭންސް މިނިސްޓްރީގެ ވެބްސައިޓުގައި ޝާއިއުކޮށްފައިވާ ޑެޓް ބުލެޓިން ރިޕޯޓުގައި ހުރި ނަންބަރުތަކަށް ބަލައިގެން އެ އަދަދުތައް ހިސާބުކުރުމުން ޔަގީންވެގެންދިޔައީ މިއަދު ރާއްޖޭގެ އިގުތިސޯދު އޮތް ހާލަތުގެ ޒިންމާ މި ސަރުކާރުން ވެސް އުފުލަން ޖެހޭ ކަމެވެ. 

އެމްޑީޕީގެ ދެވަނަ ސަރުކާރުން ދަރަނީގެ ގޮތުގައި ދެ އަހަރާ ބައިގެ ތެރޭގައި ދެއްކީ 874 މިލިއަން ޑޮލަރު ދައްކާފައިވެ އެވެ. މި ސަރުކާރުން މިހާތަނަށް 2.1 ބިލިއަން ޑޮލަރު ދަރަނީގެ ގޮތުގައި ދައްކާފައިވެ އެވެ. ދަރަނި ދެއްކުމަށްފަހު ހޭދަކުރުމަށް އެމްޑީޕީގެ ސަރުކާރަށް ލިބުނީ 471 މިލިއަން ޑޮލަރެވެ. މިދިޔަ މުއްދަތުގައި ދަރަނި ދެއްކުމަށްފަހު މި ސަރުކާރުގެ ތިޖޫރީގައި އެއަށްވުރެ 221 ޕަސެންޓު އިތުރަށް ހޭދަކުރަން ލިބުނެވެ. އެއީ 1.5 ބިލިއަން ޑޮލަރެވެ. 

ކޮވިޑު ފަދަ ބޮޑު އިގުތިސޯދީ ކާރިސާއެއް ކުރިމަައްޗެއް ނުވެ އެވެ. އެމްޑީޕީ ސަރުކާރަށް ފައިސާ ޗާޕުކުރަން މަޖުބޫރުވީ ބޯޑަރު ބަންދުކޮށް މުޅި އިގުތިސޯދު ބަރޯސާވެފައިވާ ފަތުރުވެރިކަން ހުއްޓުމަކަށް އައުމުންނެވެ. މި ސަރުކާރުން ފައިސާ ޗާޕުކުރީ ވަލު ދޮރަށިންނެވެ. ފައިސާ ޗާޕުކުރަން ޖެހޭ ފަދަ ގާނޫނީ ހާލަތެއް ނެތެވެ. އިރާން ހަނގުރާމައާ ގުޅިގެން ތެޔޮ ބިލު ބޮޑުވި ނަމަވެސް 2022 ވަނަ އަހަރު ޔޫކްރެއިން-ރަޝިއާ ހަނގުރާމަ ފެށުމުން ތެލުގެ އަގު މަތިވި މިންވަރަށް އަދިވެސް މައްޗެއް ނުވެ އެވެ.

"ހަގީގަތަކީ، ސަރުކާރަށް ޑޮލަރެއް ނުހޯދޭ. ފައިނޭންސިން ނުކުރެވޭ. ދިވެހި ރުފިޔާގެ ސަޕްލައި އިތުރުވެއްޖެ. އެހެންވީމަ އޭގެ ސަބަބުން އާންމުން ޑޮލަރަށް ޑިމާންޑު ކުރާ ވަރު ގިނަ ވެއްޖެ،" ސަރުކާރުން ފައިސާ ޗާޕުކުރުމާ ދެކޮޅު ހެދުމުގެ ގޮތުން ޕެންޝަން އޮފީހުގެ ބޯޑުން އިސްތިއުފާ ދެއްވި ފިނޭންސް މިނިސްޓްރީގެ ކުރީގެ ޗީފް ބަޖެޓު އެގްޒެކެޓިން މުހައްމަދު ސަރުވަޝް އާދަމް އަދަދު ނޫހުން ބޭއްވި ޑޮލަރު ސައްލާގައި ވިދާޅުވި އެވެ. 

ސުވާލަކީ ބޮޑު ރިޒާވެއް އޮތުމަށްފަހު ދުނިޔެއަށް ބޮޑު ކާރިސާއެއް ކުރިމަތިވެފައި ނެތް ދަނޑިވަޅެއްގައި އިގުތިސޯދީ ކަންކަން ބޮއްސުންލައިގެން ދިޔައީ ކީއްވެގެންތޯ އެވެ. 17.50ރ. ގައި ހުރި ޑޮލަރު ރޭޓު 20ރ. ފަހަނައަޅައި ގޮސް 23ރ. އަށް އެރީ ކީއްވެގެންތޯ އެވެ. ޖަވާބު ވަރަށް ސާފެވެ. 

މި ސަރުކާރުގެ ފުރަތަމަ އަހަރު ދައުލަތުގެ ބަޖެޓަކީ 50 ބިލިއަން ރުފިޔާ އެވެ. އެއްވެސް ޕްރޮޖެކްޓެއް ކުރިއަށްނުގެންދިޔަ ނަމަވެސް 50 ބިލިއަނުން ނުވެގެން އިތުރު ފަސް ބިލިއަން ރުފިޔާގެ ސަޕްލިމެންޓަރީ ބަޖެޓެއް ވެސް ފާސްކުރި އެވެ. ޖެހިގެން އައި އަހަރު 56 ބިލިއަން ރުފިޔާގެ ބަޖެޓެއް ފާސްކުރި އެވެ. މި އަހަރުގެ ބަޖެޓަކީ 64 ބިލިއަން ރުފިޔާގެ ބަޖެޓެކެވެ. 

"މި ސަރުކާރަކީ ދިވެހި ތާރީހުގައިވެސް އަހަރެއްގެ ތެރޭގައި އެންމެ ގިނައިން ޑޮލަރު ވަންނަ ސަރުކާރު. އެހެންނަމަވެސް، ކާޑުތަކުގެ ލިމިޓާއި، މުދާ އެތެރެކުރުމަށް ހުރި ދަތިތަކާއި، އަދި ޑޮލަރު ލިބުމުގެ ދަތިކަން އަދިވެސް އެބައޮތް. މިހާރު އުފެދޭ ސުވާލަކީ ދައުލަތަށް ޑޮލަރު ލިބޭތޯ ނުވަތަ ނޫންތޯއެއް ނޫން. ސުވާލަކީ އެ ޑޮލަރުތަކަށް ވަނީ ކިހިނެއްހޭ؟،" މާލީ ދާއިރާގެ ތަޖުރިބާކާރު އިސްމާއީލް ޒަރިޔަންދު ވިދާޅުވެފައިވެ އެވެ. 

މި ސަރުކާރަށް ރެކޯޑު އާމްދަނީ ލިބިއްޖެ އެވެ. ރައްޔިތުންގެ މަޖިލީހުން ފާސްކޮށްގެން 175 ބިލިއަން ރުފިޔާ ހަރަދުކުރަން މި ސަރުކާރަށް ލިބިއްޖެ އެވެ. ތަރައްގީގެ މަޝްރޫއުތަކެއް ރާއްޖޭގެ ރަށްރަށަކު ނުހިނގަ އެވެ. ޑޮލަރާއި ފައިސާ އެބަވަދެ އެވެ. މި އުޅެނީ ސަރުކާރަށް އިގުތިސޯދު މެނޭޖުނުކުރެވުމުގެ މައްސަލައެކެވެ. މަޝްރޫއުތަކަށް އިސްކަން ޖެހޭ ތަރުތީބު އޮޅުވާލައި ބޮޑެތި ވެނިޓީ ޕްރޮޖެކްޓުތައް ހިންގުމުގެ ނަތީޖާ އެވެ. 

"ޑޮލަރުގެ އަގު ތިރި ނުވަނީސް ސަރުކާރުން އަސާސީ ހިދުމަތްތަކަށް ކުރާ ހަރަދު ފިޔަވައި އެއްވެސް ހަރަދެއް ކުރުން ރަނގަޅެއް ނޫން. އުމްރާނީ ހުރިހާ މަސައްކަތެއް ހުއްޓާލަންޖެހޭ،" ސަރުކާރުން ހިންގާ ބޮޑެތި ޕްރޮޖެކްޓުތައް ހުއްޓާލުމަށް ގޮވާލައި އެމްޑީޕީގެ ޗެއާޕާސަން ރައީސް މުހައްމަދު ނަޝީދު ވިދާޅުވި އެވެ. 

އެހެން ނަމަވެސް، މި ސަރުކާރު ވެރިކަމަށް އައުމަށްފަހު ފެންނަމުންދަނީ ވަރަށް ބޮޑަށް މުއިއްޒުގެ ލެގަސީ ޕްރޮޖެކްޓުތަކަށް އިސްކަންދޭ މަންޒަރެވެ. މާލެ ސަރަހައްދުން އެތައް ފަޅެއް ހިއްކާފައި ވަނިކޮށް ރަސްމާލެ މަޝްރޫއު ފެށި އެވެ. އެއީ ހަމައެކަނި ހިއްކުމަށް ވެސް އެތައް ސަތޭކަ މިލިއަން ޑޮލަރު ހޭދަވާނެ މަޝްރޫއުއެކެވެ. މިއަދާ ހަމައަށް މި މަޝްރޫއަށް ހަރަދުވާ ވަރެއް ނޫނީ ފައިސާ ހޯދާ ގޮތެއް ސަރުކާރުން ހާމައެއް ނުކުރެ އެވެ. 

"ޑޮލަރުގެ އަގު އުފުލެމުން އެ ދަނީ ސަރުކާރުގެ ބޮޑު އިސްރާފުގެ ސަބަބުން، ހަރަދު ކުޑަނުކުރާތީ. ރަސްމާލެ ހިއްކުމާއި، އަސްކަރީ ޑްރޯނާއި ހަތިޔާރު ގަތުމާއި، ބިލިއަނުން ހަރަދުކުރަން ޖެހިފައިވާ މުސާރައިގެ އިތުރުން ކޮރަޕްޝަނާއި ވައްކަމުގެ ސަބަބުން،" މިދިޔަ ސަރުކާރުގެ އިކޮނޮމިކް މިނިސްޓަރު ފައްޔާޒު އިސްމާއިލް މީގެކުރިން ވިދާޅުވެފައިވެ އެވެ. 

ރަސްމާލެ އެކަންޏެއް ނޫނެވެ. މިއަދާ ހަމައަށް ސަރުކާރުގެ ވަޒީފާތަކުގައި ތިބި މީހުންގެ އަދަދެއް ސާފެއް ނޫނެވެ. މުސާރައަށް ކުރާ ހޭދަ އަންނަނީ ކޮންމެ އަހަރަކު އެތައް ބިލިއަން ރުފިޔާއަކުން ބޮޑުވަމުންނެވެ. ދައުލަތަށް ލިބޭ އާމްދަނީގެ ބޮޑު ބައެއް ހޭދަކުރަން މަޖުބޫރުވެފައިވަނީ އުފެއްދުންތެރިކަން އިތުރުނުވާނެ ފަދަ ހަރަދުތަކަށެވެ. 

---

ސަރުކާރުން ވިޔަފާރިކުރަން ފެށުމުން ޕްރައިވެޓް ސެކްޓަރުގައި މަސައްކަތެއް ނެތެވެ. ސިޔާސީ ވަޒީފާއަކަށް ބަރޯސާނުވެ ދިރިނޫޅެވޭ މިންވަރަށް ދިވެހިންގެ އަތްމަތި ދަތިވެއްޖެ އެވެ. ކާޑުން ކެނޑޭ ކަމަށް މުއިއްޒު ވިދާޅުވި ނަމަވެސް ގިނަ ދިވެހިންނަށް ކޮންމެ ދުވަހެއްގެ އިރު އަރަނީ ފައިސާ ނުކެނޑިގެން ބީއެމްއެލްއިން ފޮނުވާ މެސެޖުތަކާއެކު އެވެ. މިއީ "ދިވެހީންގެ ރާއްޖެ"ގެ ހަގީގަތަށް ނުވި ނަމަވެސް މިއީ ދިވެހިރާއްޖޭގެ ހަގީގަތެވެ.

ނަމަވެސް، ސަރުކާރުން މަސައްކަތް ކުރަމުންދަނީ އަދިވެސް ކަމުގެ ހަގީގަތް އޮޅުވާލުމަށެވެ. މި ހުރިހާ ދައްޗެއްގެ ޒިންމާ ނަގަން ޖެހޭނީ ކުރީ ސަރުކާރުން ކަމަށް ބުނުމެވެ. މި ސަރުކާރުގެ އެއްވެސް މައްސަލައެއް ނެތް ކަމަށް ދެއްކުމަށެވެ. ރައްޔިތުންނަށް އެއްވެސް ދަތިކަމެއް ނެތް ކަމަށް ދެއްކުމަށެވެ. ބަހަނާ ދައްކައި ކަމުން ރެކިގަތުމަށް ސަރުކާރުން މަސައްކަތް ކުރި ނަމަވެސް ރާއްޖެ މިއަދު މި ދެކޭ އިގުތިސޯދީ ކާރިސާގެ ޒިންމާ މި ސަރުކާރުން ވެސް އުފުލަން ޖެހެ އެވެ. ސަރުކާރަށް އިގުތިސޯދު މެނޭޖުނުކުރެވުމުގެ އެންމެ ބޮޑު ބުރަ އުފުލަން ޖެހިފައިވަނީ އާންމު ދިވެހި ރައްޔިތުންނެވެ.