އާންމު ދިރިއުޅުމުގެ ހަރަދުތައް ކުޑަކުރުމުގެ ގޮތުން ސަރުކާރުން ފޯރުކޮށްދޭ ސަބްސިޑީތަކަށް މި އަހަރު ހަތަރު ބިލިއަން ރުފިޔާއަށް ވުރެ އިތުރަށް ބަޖެޓުން ހަރަދުކޮށްފައިވާ ކަމަށް ފިނޭންސް މިނިސްޓްރީގެ ތަފާސްހިސާބުަތަކުން ދައްކައިފި އެވެ.
ފިނޭންސުން އެންމެ ފަހުން އާންމުކޮށްފައިވާ ވީކްލީ ފިސްކަލް ޑިވެލޮޕްމަންޓް ރިޕޯޓުގައިވާ ގޮތުގައި، މި އަހަރުގެ 38 ވަނަ ހަފުތާގެ ނިޔަލަށް ސަބްސިޑީތަަކަށް ވަނީ 4.1 ބިލިއަން ރުފިޔާ ހަރަދުކޮށްފަ އެވެ. މިއީ މުޅި މި އަހަރަށް ބަޖެޓުކުރި 2.8 ބިލިއަން ރުފިޔާއަށް ވުރެ 1.2 ބިލިއަން ރުފިޔާ ނުވަތަ 43.5 ޕަސެންޓު އިތުރު އަދަދެކެވެ.
ސަރުކާރުން ބުނެފައިވާ ގޮތުގައި، ބަޖެޓު ކުރި ވަރަށް ވުރެ އިތުރަށް ސަބްސިޑީތަކަށް ހަރަދުކުރަން ޖެހިފައި ވަނީ، އިރާނު ހަނގުރާމައާއެކީ ބައިނަލްއަގުވާމީ ބާޒާރުގައި ތެލުގެ އަގު އުފުލި، ތެލާއި ކަރަންޓުގެ ސަބްސިޑީގެ ހަރަދު ވަރަށް ބޮޑަށް އިތުރުވުމާ ގުޅިގެންނެވެ.
މިދިޔަ ޖުލައި މަހު ފިނޭންސުން ހާމަކުރި ތަފުސީލީ ހިސާބުތަކުގައި ބުނީ، ތެލުގެ ސަބްސިޑީއަށް އެހާތަނަށް 1.8 ބިލިއަން ރުފިޔާ ހަރަދުކޮށްފައިވާ ކަމަށެވެ. މިއީ މި އަހަރަށް ބަޖެޓުކުރި އަދަދުގެ ގާތްގަނޑަކަށް 65 ޕަސެންޓެވެ. އަދި މިދިޔަ އަހަރުގެ އެ މުއްދަތުގައި ހަރަދު ކުރި 702 މިލިއަން ރުފިޔާއަށް ވުރެ 1.1 ބިލިއަން ރުފިޔާ އިތުރު އަދަދެކެވެ.
ސަބްސިޑީތަކަށް ކުރި ހަރަދު
| Label | Value |
|---|---|
| 2021 | 1.1 Billion MVR |
| 2022 | 3.6 Billion MVR |
| 2023 | 3.6 Billion MVR |
| 2024 | 3.9 Billion MVR |
| 2025 | 4.4 Billion MVR |
| 2026 (38 ހަފުތާ) | 4.2 Billion MVR |
މި އަހަރު ސަބްސިޑީ އިތުރުވަމުންދާ ގޮތަށް ބަލާއިރު، މި ވޭތުވި އެއްވެސް އަހަރެއްގައި ހަރަދު ކުރި ވަރަށް ވުރެ އިތުރަށް ހަރަދުކުރަން ޖެހިދާނެ ކަމަށް ވަރަަށް ބޮޑަށް ބެލެވެ އެވެ.
ސަބްސިިޑީތަކަށް މިހާ ބޮޑު ހަރަދެއް ކުރަން ޖެހިފައިވާއިރު، އެންމެނަށް ލިބޭ ގޮތަށް ސަބްސިޑީ ދިނުން ހުއްޓާލަން ބައިނަލްއަގުވާމީ މާލީ އިދާރާތަކުން ލަފާ ދެމުން އަންނަތާ ގިނަ އަހަރުތަކެއް ވެއްޖެ އެވެ. އަދި، މިހާރު ވެސް އެ ގޮތަށް އެ ކަން ކުރަން އަންނަނީ ލަފާ ދެމުންނެވެ.
މި ސަރުކާރު ހިމެނޭހެން ތިން ސަރުކާރެއްގައި ވަނީ މި ސިޔާސަތު ބަދަލުކުރަން މަސައްކަތްކޮށްފަ އެވެ. ނަމަވެސް އެއްވެސް ސަރުކާރަކަށް ބުނި ގޮތަށް އެ ސިޔާސަތު ތަންފީޒެއް ނުކުރެވެ އެވެ.
ސަބްސިޑީ ހަރަދު ވިދިވިދިގެން ފަސް ވަނަ އަހަރު ތިން ބިލިއަން ރުފިޔާއިން މައްޗަށް
މިއަހަރަށް ކަނޑައެޅި ބަޖެޓަށް ވުރެ އިތުރަށް ސަބްސިޑީއަށް ހަރަދުވެފައިވާއިރު، ބޭނުންޖެހިފައިވާ މީހުންނަށް އެކަނި ސަބްސިޑީ ދިނުމުގެ ސިޔާސަތު ތަންފީޒުކުރުން ވަނީ ހުއްޓާލާފަ. ސަބްސިޑީގެ ގޮތުގައި ހަރަދުކުރާ ހުރިހާ ފައިސާއެއް ދަނީ ސަރުކާރު ހިއްސާވާ ކުންފުނިތަކަށް.
މި ސަރުކާރުން ވަނީ މިދިޔަ އަހަރުގެ ތެރޭގައި ސަބްސިޑީ ސިޔާސަތު ތަންފީޒުކުރާނެ ކަމަށް ބުނުމަށް ފަހު އެ ސިޔާސަތު ދޫކޮށްލާފަ އެވެ. މިހާރު މި ސަރުކާރުން ބުނަނީ ސަބްސިޑީ ހަރަދު ކުޑަކުރާނީ ކަރަންޓު އުފެއްދުމުގެ އެފިޝަންސީ މަތިކޮށްގެން ކަމަށެވެ.
ސަބްސިޑީގެ ގޮތުގައި ބަޖެޓުން ހަރަދު ކުރާ ހުރިހާ ފައިސާއެއް ދަނީ ސަރުކާރު ހިއްސާވާ ކުންފުނިތަކަށެވެ.
އެ ގޮތުން ތެލާއި ކާޑު ސަބްސިޑީ ދަނީ އެއްކޮށް އެސްޓީއޯއަށެވެ. ކަރަންޓާއި ނަރުދަމާގެ ސަބްސިޑީ ލިބެނީ ފެނަކަ އާއި ސްޓެލްކޯ އާއި އެމްޑަބްލިޔުއެސްސީއަށެވެ. ދަތުރުފަތުރުގެ ސަބްސިޑީ ލިބެނީ އެމްޓީސީސީއަށެވެ. ކުނި މެނޭޖުކުރުމުގެ ސަބްސިޑީ ލިބެނީ ވެމްކޯއަށެވެ. އަދި، މަސްވެރިކަމުގެ ސަބްްސިޑީ ލިބެނީ މިފްކޯއަށެވެ.
އޭގެ އިތުރުން ސަރުކާރުން ވަނީ ސޯޝަލް ހައުސިން ޕްރޮޖެކްޓުތަކުން ތަރައްގީކޮށްފައިވާ ފްލެޓުތަކުގެ އަގު ހެޔޮކުރަން ހައުސިން ސަބްސިޑީގެ ގޮތުގައި ވެސް ފައިސާ ހަރަދުކޮށްފަ އެވެ.
ސަބްސިޑީ ބަޖެޓު ހުސްވެގެން އިތުރަށް ހަރަދުކުރަން ޖެހިފައިވާއިރު، 2022 ވަނަ އަހަރުގެ ފަހުން ސަބްސިޑީތަކަށް ކުރާ ހަރަދު ތިން ބިލިއަން ރުފިޔާއަށް އުފުލުނު ފަހުން ތިން ބިލިއަން ރުފިޔާއަށް ވުރެ މަދު ނުވެ އެވެ. މިއިން ކޮންމެ އަހަރެއްގައި ވެސް ބަޖެޓު ކުރި ވަރަށް ވުރެ އިތުރަށް އެތައް ބިލިއަން ރުފިޔާ ވަނީ ހަރަދުކޮށްފަ އެވެ.
