މޯލްޑިވްސް އިންލެންޑް ރެވެނިއު އޮތޯރިޓީ (މީރާ) އަށް ޓެކްސް ނުދައްކާ ފަރާތްތަކުގެ ލިސްޓުގައި އެފްއޭއެމްގެ ފައިސާ ބޭނުންކޮށްގެން އަމިން އެވެނިއުގެ އެޕާޓްމަންޓެއް ގަތް މައްސަލައިގައި ހިޔާނާތުގެ ކުށް ސާބިތުވެ ޖަލަށްލި އެ އެސޯސިއޭޝަނުގެ ކުރީގެ ރައީސް ބައްސާމް އަދީލް ޖަލީލްގެ ނަން ހިމަނައިފި އެވެ.
މީރާއިން އިއްޔެ އާންމުކުރި ލިސްޓުގައި ބައްސާމްގެ އިތުރުން، މިދިޔަ ސަރުކާރުގައި ރައީސް އޮފީހުގެ ކޮމިއުނިކޭޝަން ސެކްރެޓްރީގެ މަގާމުގައި ހުންނެވި، ހަސަން އިސްމާއިލްގެ ބިޒްނެސް އިމޭޖް ގްރޫޕް ވެސް ހިމެނެ އެވެ.
އޭގެ އިތުރުން، މަޝްހޫރު ކޮމޭޑިއަން ޔޫސުފް ރަފީއު (ޔޫސޭ) އާއި ޝްވެކް ސިނަމާ ހިންގާ ޝްވެކް މޯލްޑިވްސް ކުންފުންޏާއި ޗީބޯ އިންވެސްޓްމެންޓްސް އަދި، ލަބަންބާ ކެފޭ ހިންގާ ބެވަރެޖް ޓްރިޕްލަ ކުންފުނި އެ ލިސްޓުގައި ހިމެނެ އެވެ.
އެ ކުންފުނިތަކުން ޓެކުހުގެ ގޮތުގައި ނުދައްކާ ހުރީ ކިހައި އަދަދެއްގެ ފައިސާކަމެއް މީރާއިން ހާމައެއް ނުކުރެ އެވެ. ނަމަވެސް، 33 ފަރާތެއްގެ ނަން ހިމެނޭ އެ ލިސްޓުގައި ހިމެނޭ ހުރިހާ ފަރާތެއްގެ އަތުން އެއް މިލިއަނަށްވުރެ ގިނަ ރުފިޔާ މީރާއަށް ލިބެންޖެހޭ ކަމަށް އެ އޮތޯރިޓީން ހާމަކުރި ލިސްޓުގައި ބަޔާންކޮށްފައިވެ އެވެ.
