މި ސަރުކާރަށް ދެ އަހަރާއި ބައިން މިދިޔަ އެމްޑީޕީގެ ވެރިކަމުގެ ދެ އަހަރާ ބައިގައި ލިބުނު އާމްދަނީއަށް ވުރެ އިތުރަށް 48 ބިލިއަން ރުފިޔާ ލިބުނުއިރު އެ ފައިސާއިން ކުރި ކަމެއް ނުފެންނަ ކަމަށް ކުރީގެ ފިނޭންސް މިނިސްޓަރު އިބްރާހިމް އަމީރު ވިދާޅުވެއްޖެ އެވެ.
އަދަދު ނޫހުން ގެނެސްދޭ "އެތެރެފުށް" ޕްރޮގްރާމްގައި އަމީރު ވިދާޅުވީ އެމްޑީޕީގެ ވެރިކަމުގެ ދެ އަހަރާއި ބައިގެ ތެރޭގައި 33 ބިލިއަން ރުފިޔާ ލިބުނުއިރު، މި ސަރުކާރުގެ އެ މުއްދަތުގައި 85 ބިލިއަން ރުފިޔާ ލިބިފައިވާ ކަމަށެވެ. އެހެންކަމުން ދެ އަހަރާއި ބައިގެ ތެރޭގައި އެމްޑީޕީގެ ވެރިކަމަށްވުރެ އިތުރަށް 48 ބިލިއަން ރުފިޔާ ލިބުނުއިރު ހަރަދުކުރީ ކޮން ކަމަކަށްކަން ސާފުނުވާ ކަމަށް އޭނާ ވިދާޅުވި އެވެ.
"އަޅުގަނޑުމެންގެ ސަރުކާރުގައި ދެ އަހަރާއި ބައިގެ ތެރޭގައި ލިބުނީ ގާތްގަނޑަކަށް 33 ބިލިއަން ރުފިޔާ. ރައީސް ޔާމީން ސަރުކާރުގައިވެސް އަޅުގަނޑަށް ހަނދާންވާ ގޮތުން 30 ވަރަކަށް ބިލިއަން ރުފިޔާ. މި ސަރުކާރުގައި ކިހާވަރެއްކަން އެނގިލައްވާތޯ. 85 ބިލިއަން ރުފިޔާ،" ޕްރޮގްރާމުގައި އަމީރު ވިދާޅުވި އެވެ.
"ދެ އަހަރާއި ބައި ތެރޭގައި އާމްދަނީގެ ގޮތުގައި ޑޮލަރުވެސް ހިމަނައިގެން 85 ބިލިއަން ރުފިޔާ ޑޮލަރު އާމްދަނީގެ ގޮތުގައި ގާތްގަނޑަކަށް 40 ބިލިއަން ރުފިޔާ އެބައިން ލިބިފައި އެނގޭތޯ. އެހެންވީމަ މިދިޔަ ސަރުކާރާ އަޅާބަލާއިރު ދެ އަހަރާއި ބައިގެ ތެރޭގައި ގާތްގަނޑަކަށް 48 ބިލިއަން ރުފިޔާ އިތުރަށް މި ސަރުކާރަށް ލިބިފައި އެބަހުރި. ކޮބާ ކިހިނެއް ކޮން ތަނަކަށް ހަރަދުކުރީ."
އެހެން ސަރުކާރުތަކާ ހިލާފަށް މި ސަރުކާރުން ދަރަނި ދައްކަން ޖެހުމުން ދަތިތައް ދިމާވިކަން ފާހަގަކުރަމުންދާއިރު ދަރަނި ދެއްކުމަށްފަހުވެސް ގިނަ އަދަދެއްގެ ފައިސާ ދައުލަތުގައި ހުރިކަން އަމީރު ވިދާޅުވި އެވެ. ނަމަވެސް ޕްރޮޖެކްޓެއްވެސް ނުހިނގާއިރު އެ ފައިސާއިން ސަރުކާރުން ކުރި ކަމެއް ހަމަ އެއްގޮތަކަށްވެސް ނޭގުނު ކަމަށް އޭނާ ވިދާޅުވި އެވެ.
ދައުލަތުގެ ޓެކްސް އިދާރާ، މޯލްޑިވްސް އިންލެންޑް ރެވެނިއު އޮތޯރިޓީ (މީރާ) އިން މިދިޔަ މަހުގެ ތެރޭގައި އެކަނިވެސް 108.3 މިލިއަން ޑޮލަރު (1.6 ބިލިއަން ރުފިޔާ) އާ އެކީ، މިދިޔަ މަހުގެ ނިޔަލަށް 976.6 މިލިއަން ޑޮލަރު (15.1 ބިލިއަން ރުފިޔާ) ލިބިފައިވެ އެވެ.
މި އަހަރު ވެސް ދައުލަތުގެ އާމްދަނީ އިތުރުވެ، ރެކޯޑު އަދަދަކަށް ޑޮލަރު ލިބިފައި ވިޔަސް، ރާއްޖޭގެ ތާރީހުގައި މިހާ ޑޮލަރު ތާށި ދުވަސްވަރެއް ނާދެ އެވެ.
އެ ގޮތުން ރަސްމީ ރޭޓަކީ 15.42ރ. ނަމަވެސް، އާންމުންނާއި ވިޔަފާރިތަކުން ބޭނުންކުރާ ޑޮލަރުގެ ބޮޑު ބަޔެއް ހޯދަން ބަރޯސާވާ ކަޅު ބާޒާރު ނުވަތަ ޕެރެލަލް މާކެޓުގައި ޑޮލަރެއްގެ އަގު ހުރީ 23ރ. އަށެވެ. މިއީ ދިވެހި ތާރީހުގައި ދުވަހަކު ވެސް ޑޮލަރުގެ އަގު ނުއުފުލޭ ވަރެކެވެ.
ސަރުކާރުން ބުނަނީ މި ހުރިހާ ވެސް މައްސަލައަކީ ކުރިން ވެރިކަމުގައި އޮތް އެމްޑީޕީ ސަރުކާރުން އަށް ބިލިއަން ރުފިޔާ ޗާޕުކުރުމާ ގުޅިގެން އިގުތިސޯދުގައި އުފެދިފައިވާ ހާލަތަކެވެ. ނަމަވެސް ގިނަ މާހިރުން ބުނަނީ މިއީ އޭރު ފައިސާ ޗާޕުކޮށްފަ އޮއްވާ، އެ ޕްރެޝަރު ކުޑަކުރަން ސަރުކާރަށް ހަރަދުތައް ކޮންޓްރޯލް ނުކުރެވުމުގެ ސަބަބުން އިތުރަށް ގޯސްވީ ހާލަތެއް ކަމަށެވެ.
