ރާއްޖެއަށް ޒިޔާރަތްކުރާ ޓޫރިސްޓުންގެ އަދަދު މިދިޔަ އަހަރާ އަޅައިބަލާއިރު މަދުވުމުގެ ސަބަބުން، ދައުލަތަށް ލިބޭ އާމްދަނީއަށް އޭގެ ނޭދެވޭ އަސަރު ކުރަން ފަށައިފި އެވެ.
ފިނޭންސް މިނިސްޓްރީގެ އެންމެ ފަހުގެ ފިސްކަލް ޑިވެލޮޕްމަންޓް ރިޕޯޓުން ދައްކާ ގޮތުގައި، ފަތުރުވެރިކަމުގެ ދާއިރާއިން ނަގާ ޓެކްސް ނުވަތަ ޓީޖީއެސްޓީގެ ގޮތުގައި މިދިޔަ މަހުގެ ނިޔަލަށް ލިބިފައިވަނީ 8،061 މިލިއަން ރުފިޔާ އެވެ. މިއީ މިދިޔަ އަހަރުގެ މި މުއްދަތުގައި ލިބުނު 8،172.4 މިލިއަން ރުފިޔާއާ އަޅައިބަލާއިރު 110.5 މިލިއަން ރުފިޔާގެ ދަށްވުމެކެވެ.
ޓޫރިޒަމް މިނިސްޓްރީގެ އެންމެ ފަހުގެ ތަފާސްހިސާބުތަކަށް ބަލާއިރު، އިއްޔެގެ ނިޔަލަށް ރާއްޖެއަށް ޒިޔާރަތްކޮށްފައި ވަނީ 1,637,890 ޓޫރިސްޓުންނެވެ. މިއީ މިދިޔަ އަހަރުގެ މި މުއްދަތާ އަޅައިބަލާއިރު 58,940 ޓޫރިސްޓުން މަދު އަދަދެކެވެ.
މި އަހަރުގެ ފުރަތަމަ ކުއާޓަރުގައި ޓޫރިސްޓު ނަމްބަރުތަކުގެ ރެކޯޑުތައް މުގުރާލުމަށް ފަހު ދެ ވަނަ ކުއާޓަރުން ފެށިގެން ޓޫރިޒަމްގެ ދުވެލި މަޑުޖެހުނީ، މެދުއިރުމާތީގައި އިރާނާ ދެކޮޅަށް ފެށި ހަނގުރާމައާ ގުޅިގެންނެވެ.
މި ހަނގުރާމައިގެ ސަބަބުން ރާއްޖެ އަންނަ ގިނަ ޓޫރިސްޓުން ޓްރާންސިޓު ކުރަން ބޭނުންކުރާ ޔޫއޭއީ އާއި ގަތަރު ފަދަ ގައުމުތަކުން ވައިގެ ދަތުރުފަތުރު ހުއްޓުނެވެ. އޭގެ ފަހުން ދަތުރުތައް ފަށައި، މި އަހަރުގެ ބައެއް މަސްމަހުގައި ޓޫރިޒަމް އާންމު ހާލަތަށް އެޅެނީ ކަމަށް ބެލެވުނަސް، އަދިވެސް އެ މަންޒަރެއް ނުފެނެ އެވެ.
ދޮޅު މިލިއަން ޓޫރިސްޓުން އަޔަސް، ކުރީ އަހަރު އައި ވަރަށް އަދި ނާދޭ
މެދުއިރުމަތީގެ ހަނގުރާމައިގެ ސަބަބުން ޓޫރިސްޓުން އައި އަދަދު ދަށްވެފައިވާއިރު، ބަޖެޓުގައި ކަނޑައަޅާފައިވާ 2.4 މިލިއަން ފަތުރުވެރިންގެ އަމާޒަށް ވާސިލުވުމުގެ ފުރުސަތު މިހާރު ވަރަށް ކުޑަ.
މި އަހަރުގެ ބަޖެޓު ތައްޔާރުކޮށްފައި ވަނީ 2.4 މިލިއަން ޓޫރިސްޓުން އައިސް، ޓީޖީއެސްޓީގެ ގޮތުގައި 11.4 ބިލިއަން ރުފިޔާ ލިބޭނެ ކަމަށް އަންދާޒާކޮށްގެންނެވެ.
ނަމަވެސް ޓޫރިސްޓު ނަމްބަރުތަކުގެ އަމާޒަށް ވާސިލުވުމަށްޓަކައި ކުރިއަށް އޮތް ތިން މަސް ދުވަހުގެ ތެރޭގައި އަށް ލައްކަ ޓޫރިސްޓުން ރާއްޖެ އަންނަން ޖެހެ އެވެ. އެއީ މަހަކު އެވަރެޖުކޮށް 268،000 ޓޫރިސްޓުންނެވެ.
މި އަދަދަކީ ރާއްޖޭގެ ތާރީހުގައި އެއް މަހެއްގެ ތެރޭގައި އެންމެ ގިނަ ޓޫރިސްޓުން އައި ކަމަށް ރެކޯޑު ކުރެވުނު މި އަހަރުގެ ފެބްރުއަރީގައި ޒިޔާރަތްކުރި 254،556 ޓޫރިސްޓުންނަށް ވުރެ ވެސް މަތީ އަދަދެކެވެ.
އެހެންކަމުން، ބަޖެޓުގައި ކަނޑައެޅި އަމާޒަށް ޓޫރިސްޓުން އައުމުގެ ވާސިލުވުމުގެ ފުރުސަތު ވަރަށް ކުޑަ އެވެ. މިއާއެކީ، ޓީޖީއެސްޓީން ދައުލަތަށް ލިބޭނެ ކަަމަށް އަންދާޒާކޮށްފައިވާ އަދަދަށް ނުލިބުމުގެ ފުރުސަތު ވެސް އެބައޮތެވެ.
ޓީޖީއެސްޓީއާއެކު ޓޫރިސްޓު ނަމްބަރުތަކާ ގުޅިފައި ހުންނަ ގްރީން ޓެކްސް އާއި އެއާޕޯޓު ޑިޕާޗާ ޓެކްސްގެ އިތުރުން ޓެކްސް ނޫން އާމްދަނީގެ ތެރޭގައި ހިމެނޭ އެއާޕޯޓު ޑިވެލޮޕްމަންޓް ފީއަށް ވެސް އަސަރު ކުރާނެ އެވެ. މިހެންކަމުން މި އަހަރު ދައުލަތަށް ލިބޭނެ ކަމަށް އަންދާޒާކޮށްފައިވާ 40.3 ބިލިއަން ރުފިޔާ ނުލިބުމުގެ ފުރުސަތު ވެސް ވަރަށް ބޮޑެވެ.
