ވިދިވިދިގެން ހަތަރު ވަނަ މަހު ބޭރު ފައިސާގެ ރިޒާވު ދަށަށް

އޭގެ ކުރީ ތިން މަހެކޭ އެއް ފަދައިން މިދިޔަ މަހު ވެސް ބޭރު ފައިސާގެ ޖުމްލަ ރިޒާވު ދަށަށް ގޮސްފައިވާ ކަމަށް މޯލްޑިވްސް މަނިޓަރީ އޮތޯރިޓީ (އެމްއެމްއޭ) ގެ ތަފާސްހިސާބުތަކުން ދައްކައިފި އެވެ. 

އެމްއެމްއޭއިން އާންމުކޮށްފައިވާ އެންމެ ފަހުގެ ރިޒާވު އަދަދުތަކުން ދައްކާ ގޮތުގައި މިދިޔަ މަސް ނިމުނުއިރު ޖުމްލަ ރިޒާވުގައި ހުރީ 638 މިލިއަން ޑޮލަރެވެ. މިއީ އޭގެ ކުރީ މަހު ހުރި އަދަދަށް ވުރެ 48.7 މިލިއަން ޑޮލަރު މަދު އަދަދެކެވެ. 

ޖުމްލަ ރިޒާވަށް އައި ހީނަރުކަމާއެކީ، ބޭނުންކުރެވޭ ރިޒާވު ވެސް ވަނީ ދަށަށް ގޮސްފަ އެވެ. މިދިޔަ މަހުގެ ނިޔަލަށް ބޭނުންކުރެވޭ ރިޒާވުގައި ހުރީ 22.8 މިލިއަން ޑޮލަރެވެ. މިއީ އޭގެ ކުރީ މަހު ހުރި އަދަދަށް ވުރެ 27 މިލިއަން ޑޮލަރު މަދު އަދަދެކެވެ.

މި އަހަރުގެ ފުރަތަމަ ތިން މަސް ދުވަހުގެ ތެރޭގައި ރެކޯޑު އަދަދުތަކަށް ރިޒާވު އިތުރުވުމަށް ފަހު، ކުއްލިއަކަށް ދަށަށް ދިޔައީ އޭޕްރިލް މަހުގައި 500 މިލިއަން ޑޮލަރުގެ ސުކޫކު ދެއްކުމާ ގުޅިގެންނާއި އިންޑިއާގެ ރިޒާވު ބޭންކުން ނަގާފައިވާ 400 މިލިއަން ޑޮލަރުގެ ކަރަންސީ ސްވޮޕް އެއްބަސްވުން ނިމުމަކަށް ގެނައުމާ ގުޅިގެންނެވެ. 

މި ފައިސާތައް ދެއްކުމާ ގުޅިގެން، ބަނގުރޫޓުވުމުން ސަލާމަތްވީ ނަމަވެސް ތަފާސްހިސާބުތަކުން ހާމަ ވަނީ، އެ ފައިސާތައް ދެއްކި ފަހުން ރިޒާވަށް މެދުކެނޑުމެއްނެތި ބާރުބޮޑުވެފައިވާ ކަމެވެ. މި ޕްރެޝަރު އިތުރަށް ބޮޑު ވެފައި ވަނީ މެދުއިރުމަތީގައި ހިނގަމުންދާ ހަނގުރާމައާ ގުޅިގެން މުޅި ދުނިޔޭގެ އިގުތިސޯދަށާ ރާއްޖޭގެ އިގުތިސޯދަށް އައިސްފައިވާ ހީނަރުކަމާ ގުޅިގެންނެވެ. 

ބޭނުންކުރެވޭ ރިޒާވު (2026)

• ޖެނުއަރީ - 301.4 މިލިއަން ޑޮލަރު
• ފެބްރުއަރީ - 337.2 މިލިއަން ޑޮލަރު
• މާޗު - 409 މިލިއަން ޑޮލަރު
• އޭޕްރިލް - 244.2 މިލިއަން ޑޮލަރު
• މެއި - 260.8 މިލިއަން ޑޮލަރު
• ޖޫން - 248.9 މިލިއަން ޑޮލަރު
• ޖުލައި - 221.8 މިލިއަން ޑޮލަރު

މިފަދަ ބޭރުގެ ބޮޑެތި ގޮންޖެހުންތަކާއި ބޭރުގެ ދަރަނި އަދާކުރަން ޖެެހިފައިވާ މިންވަރު އިތުރުވެފައިވާ ވުމާ ގުޅިގެން، ރިޒާވު ހަނިވަމުން ދިޔަ ނަމަވެސް މާނަވީ ގޮތެއްގައި ހަރަދު ކުޑަކުރުމުގެ ފިޔަވަޅުތައް އަޅަން ސަރުކާރު ނުކުޅެދިފައިވާ ކަމުގެ ކަންބޮޑުވުން ބޮޑެވެ. 

މާލީ މާހިރުން އިންޒާރުދޭ ގޮތުގައި، ހަރުދަނާ ފިޔަވަޅުތަކެއް އަޅައިގެން ހަރަދުތައް ކުޑަނުކޮށްފި ނަމަ އަދި ޓޫރިސްޓުން އަންނަ އަދަދު އިތުރުވެ، ދައުލަތަށް ލިބޭ އާމްދަނީ އިތުރު ނުކުރެވިއްޖެ ނަމަ ރިޒާވު އިތުރަށް ހީނަރުވެ، ގައުމުގެ އިގުތިސޯދަށް އިތުރު ނުރައްކާތަކާ ކުރިމަތިލާން ޖެހިދާނެ އެވެ. 

މި ތާށިކަމުގެ ތެރޭގައި ހަރަދުތައް ކުޑަކުރުމުގެ ބަދަލުގައި ސަރުކާރުން އަންނަނީ ޓޫރިޒަމުން ޓެކްސް ނަގާ ގޮތް ޑެސްޓިނޭޝަން ޕްރިންސިޕަލްއަށް ބަދަލުކޮށް، ރާއްޖެއަށް ޓޫރިސްޓުން ފޮނުވާ ބޭރުގެ ވިޔަފާރިތަކުން ޓެކްސް ނަގަން ޖީއެސްޓީ ގާނޫނު ބަދަލުކުރަން ފޮނުވާފަ އެވެ. ސަރުކާރުން ބުނަނީ މި ކަމުގެ ސަބަބުން ދައުލަތަށް އަހަރަކު 100 މިލިއަނަށް ވުރެ ގިނަ ޑޮލަރު ލިބޭނެ ކަމަށެވެ.