ބީނޯޒް އެރީޒް، އާޖެންޓީނާ (އޮކްޓޫބަރު 7) - އާޖެންޓީނާ ގައުމީ ޓީމަށް ކުޅެދިން ފަހު މެޗު ކުޅެފައިވާ ދުވަސް ފާހަގަކުރަން ޖެހެނީ، "ފުޓްބޯޅަ ކެރިއަރުގައި އެންމެ ދެރަވި ދުވަސް" ގެ ގޮތުގައި ކަމަށް ލިއޮނަލް މެސީ ބުނެފި އެވެ.
އުމުރުން 39 އަހަރުގެ މެސީ، އާޖެންޓީނާ ޓީމަށް ކުޅުން ހުއްޓާލިކަން އިއުލާނުކޮށް، ފަހު މެޗުގައި ކުޅެފައިވަނީ، ރޭ އެވެ. ބެނިންއާ ދެކޮޅަށް ކުޅެ، އާޖެންޓީނާ 3-0 އިން މޮޅުވި މެޗަކީ، މެސީގެ 21 އަހަރުވީ ގައުމީ ޓީމުގެ ކެރިއަރުގެ ފަހު މެޗެވެ.
"މި ޖޯޒީގެ ހައްގުގައި މިދިޔަ 20 އަށް ވުރެން ގިނަ އަހަރު ކުރެވުނު މަސައްކަތަކީ ފަހުރެއް،" ރޭ ބެނިން ކޮޅަށް އެއް ލަނޑު ޖަހައި، ދެ ލަނޑު ޖަހަން ފުރުސަތު ހޯދައިދިން މެސީ ބުންޏެވެ.
"އެންމެ ގޯސްކޮށްދިޔަ މުއްދަތުތަކުގައި ވެސް އަހަރެމެން އެންމެން އެއްކޮށް ތިބީ. ފައިޓްކުރިން، ގަބޫލުކޮށްގެން އުންމީދުތަކާ އެކު ކުރިއަށްދިޔައީ،"
މެސީ ބުނީ، ދެން މި ޖޯޒީގައި އިތުރު މެޗެއް ނުކުޅެވޭކަން އިހުސާސް ވުމަކީ އެންމެ ދެރަވާ ކަންތައް ކަމަށެވެ.
"ވަރަށް ހިތްދަތިވޭ އެހެން ހިތައް އެރީމަ. ހަގީގަތަކީ އަހަރެން މުޅި އުމުރަށް ވެސް ކުޅެން ބޭނުން. އެއީ، އާޖެންޓީނާ ގައުމީ ޓީމަށް ކުޅުމަކީ ކޮންމެ މީހަކަށް ވެސް ލިބޭނެ އާދަޔާހިލާފު ހިތްހަމަޖެހުމެއް. މި ވަގުތު، މިއީ އަހަރެންގެ ކެރިއަރުގެ އެންމެ ހިތްްދަތި ވަގުތު،"
މިދިޔަ މަހު ކުރީކޮޅުގައި މެސީގެ ބައްޕަ، ޖޯޖް މެސީ މަރުވުމާ އެކު، މެސީ ވަނީ ފުޓްބޯޅަ ކެރިއަރު އަވަހަށް ނިންމާލުމުގެ ވިސްނުން ގެންގުޅޭ ކަމަށް ހާމަކޮށްފަ އެވެ.
އާޖެންޓީނާއާ އެކު، ތިން ވޯލްޑް ކަޕެއްގެ ފައިނަލުގައި ކުޅެ މެސީ ވަނީ އެއް ފަހަރު މުބާރާތުގެ ތަށި އުފުލާލައިފަ އެެވެ. އެ ގޮތުން، އެންމެ ފުރަތަމަ 2014 ވަނަ އަހަރުގެ ވޯލްޑް ކަޕް ފައިނަލުގައި ޖަރުމަނު އަތުން ބަލިވިއިރު، 2022 ވަނަ އަހަރުގެ ވޯލްޑް ކަޕްގެ ފައިނަލުގައި ޗެމްޕިއަންކަން ހޯދި އެވެ. އެކަމަކު، މި ފަހަރު އެމެރިކާ، މެކްސިކޯ އަދި ކެނަޑާގައި ބޭއްވި ވޯލްޑް ކަޕްގެ ފައިނަލުގައި ސްޕެއިން އަތުން ބަލިވީ އެވެ.
އަށް ފަހަރު ބެލޮންޑިއޯ އެވޯޑް ހޯދާފައިވާ މެސީ ބުނީ، އޭނާ ގައުމީ ޓީމުން ރިޓަޔާކުރި މެސެޖު ލިޔެފައިވަނީ، ޖުލައި 21 ވަނަ ދުވަހު ކަމަށެވެ. އެއީ، ސްޕެއިން އަތުން ވޯލްޑް ކަޕް ފައިނަލުގައި ބަލިވިތާ ދެ ދުވަސް ފަހުންނެވެ.
ތަފާތު ހަ ވޯލްޑް ކަޕެއްގައި އާޖެންޓީނާ ތަމްސީލްކުރި މެސީ ވަނީ މީގެ ކުރިން ވެސް ކުއްލި ގޮތަކަށް ގައުމީ ޓީމުން ރިޓަޔާކޮށްފަ އެވެ. އެއީ، ޖެހިޖެހިގެން ތިން ފައިނަލުން (ވޯލްޑް ކަޕާއި ދެ ކޮޕަ އެމެރިކާ ފައިނަލުން) އާޖެންޓީނާއާ އެކު ބަލިވުމުން، މެސީ ވަނީ 2016 ވަނަ އަހަރު ރިޓަޔާކޮށްފަ އެވެ. އެކަމަކު، އެ ނިންމުން ބަދަލުކޮށް، ގައުމީ ޓީމަށް އެނބުރި އަންނަން ނިންމީ 2018 ވަނަ އަހަރުގެ ވޯލްޑް ކަޕަށް އާޖެންޓީނާ ކޮލިފައިކޮށްދިނުމަށެެވެ.
އަށް ފަހަރު ބެލޮންޑިއޯ އެވޯޑް ހޯދި، މެސީ ވަނީ އާޖެންޓީނާ އަށް ޖުމްލަ އެކު، 208 މެޗު ކުޅެދީ، ގައުމީ ޓީމަށް އެންމެ ގިނަ މެޗު ކުޅެދީ އެންމެ ގިނަ ގޯލު ޖެހި ކުޅުންތެރިޔާގެ ރެކޯޑް ހަދައިފަ އެވެ. މެސީ ވަނީ އާޖެންޓީނާ ގައުމީ ޓީމަށް ޖުމްލަ އެކު، 126 ގޯލު ޖަހައިފަ އެވެ.
ގައުމީ ޓީމާ އެކު މެސީގެ ކާމިޔާބީތަކަށް ބަލާއިރު، 2022 ވަނަ އަހަރުގެ ފީފާ ވޯލްޑް ކަޕްގެ އިތުރުން، 2021 އާއި 2024 ވަނަ އަހަރުގެ ކޮޕަ އެމެރިކާ ފުޓްބޯޅަ މުބާރާތާއި ޔޫރަޕާއި ދެކުނު އެމެރިކާގެ ޗެމްޕިއަނުންގެ މެދުގައި ކުޅޭ ފައިނަލިސިމާ ޓްރޮފީ ހިމެނެ އެވެ.
