ބީނޯޒް އެރީޒް، އާޖެންޓީނާ (އޮގަސްޓް 28) - އެމެރިކާ، މެކްސިކޯ އަދި ކެނަޑާގައި މި ފަހަރު ކުރިއަށްދިޔަ ފީފާ ވޯލްޑް ކަޕްގެ ފައިނަލް މެޗަށް ފަހު އާޖެންޓީނާ ކުޅުންތެރިން މާރާމާރީތަކެއްގައި ބައިވެރިވެފައިވާތީވެ، އެ ކުޅުންތެެރިންނަށް ފީފާ އިން ދިން އަދަބަށް ލުޔެއް ހޯދަން އާޖެންޓީނާގެ ފުޓްބޯލް އެސޯސިއޭޝަން (އޭއެފްއޭ) އިން ހުށަހެޅުމުން އެ ގޮތަށް ކުރިއަށްދިއުމަށް ފުރުސަތު ދޭން ފީފާ ޑިސިޕްލިނަރީ ކޮމިޓީން ނިންމައިފި އެވެ.
ފެރާން ޓޮރޭޒްގެ ގޯލުން 1-0 އިން އާޖެންޓީނާ ބަލިކޮށް ސްޕެއިނުން، މި ފަހަރުގެ ފީފާ ވޯލްޑް ކަޕްގެ ޗެމްޕިއަންކަން ދެ ވަނަ ފަހަރަށް ހޯދި ފައިނަލް މެޗުގެ ވަގުތު ހަމަވެގެން ސްޕެއިން ކުޅުންތެރިން ދަނޑަށް ދުވެފައި އެރި ވަގުތު ހަމަނުޖެހުންތަކެއް ހިނގި އެވެ. އެ ގޮތުން، ސްޕެއިންގެ އެރިކް ގާސިއާ އާއި ގަވީ އަށް އާޖެންޓީނާގެ ލެއަންޑްރޯ ޕަރޭޑޭސް، ހަމަލާ ދިން މަންޒަރު ޓިވީ އަށް އެރިއިރު، އާޖެންޓީނާގެ ނަހުއެލް މޮލީނާ ވަނީ ސްޕެއިނުގެ ރޮޑްރީގޯ (ރޮޑްރީ) ގައިގައި ޖަހައިފަ އެވެ. އަދި، އާޖެންޓީނާގެ އެސިސްޓަންޓް ކޯޗު، ރޮބާޓޯ އަޔާލާ ދަނޑަށް އަރައި، ސްޕެއިންގެ ޑެނީ އޮލްމޯ އަށް ހަމަލާ ދިން މަންޒަރުގެ ވީޑިއޯތައް ވެސް ވަނީ އާންމުވެފަ އެވެ.
މާރާމާރީ މައްސަލައިގައި ޕަރޭޑޭސް 10 މެޗަށް ސަސްޕެންޑް، އާޖެންޓީނާ 321،000 ޑޮލަރުން ޖޫރިމަނާކޮށްފި
ފީފާ ވޯލްޑް ކަޕް ފައިނަލަށް ފަހު ހިނގި ހަމަނުޖެހުންތަކާ ގުޅިގެން އާޖެންޓީނާގެ ފުޓްބޯޅަ އެސޯސިއޭޝަން 321,000 ޑޮލަރުން ޖޫރިމަނާކޮށް، އެ ގައުމުގެ ލެއަންޑްރޯ ޕަރޭޑޭސް 10 މެޗަށް ސަސްޕެންޑްކޮށްފި. އާޖެންޓީނާ އިން ވަނީ މި އަދަބާ ދެކޮޅަށް އެޕީލްކުރަން ނިންމައިފައި. އެޕީލް ނާކާމިޔާބުވެއްޖެނަމަ ކޯޓަށް ދާން ވެސް ތައްޔާރަށް ހުރި ކަމަށް ބުނެފައިވޭ.
މި ހަމަނުޖެހުންތަކާ ގުޅިގެން، އާޖެންޓީނާގެ ކުޅުންތެރިންނަށް އައި އަދަބުތަކަށް ބަލާއިރު، ޕަރޭޑޭސް، 10 މެޗަށް ސަސްޕެންޑް ކުރުމުގެ އިތުރުން 90،000 ޑޮލަރުގެ ޖޫރިމަނާއެއް ދައްކަން ޖެހޭނެ އެވެ. މޮލީނާ، ހަތް މެޗަށް ސަސްޕެންޑްވިއިރު، އޭނާ ވެސް 90،000 ޑޮލަރުގެ ޖޫރިމަނާއެއް ދައްކަން ޖެހެ އެވެ. ތިއާގޯ އަލްމާޑާ، އެއް މެޗަށް ސަސްޕެންޑްވިއިރު، ދައްކަން ޖެހެނީ، 30،000 ޑޮލަރެވެ. އާޖެންޓީނާގެ ކޯޗިން ސްޓާފް، އަޔާލާ ތިން މެޗަށް ސަސްޕެންޑްވިއިރު، 30،000 ޑޮލަރު ދައްކަން ޖެހެ އެވެ. މި ހަމަނުޖެހުމުގެ ތެރެއަށް ވަން، ސްޕެއިންގެ މިޑްފީލްޑަރު، ގަވީ އަށް ވަނީ އެއް މެޗުގެ ސަސްޕެންޝަނަކާއި 30،000 ޑޮލަރުގެ ޖޫރިމަނާއެއް އަތުވެފަ އެވެ.
އާޖެންޓީނާ ފުޓްބޯލް އެސޯސިއޭޝަން (އޭއެފްއޭ) އިން ފީފާގައި އެދުނީ، ކުޅުންތެރިންނަށް ދީފައިވާ ސަސްޕެންޝަން ގުނާއިރު، ހަމައެކަނި މުބާރާތްތަކުގެ މެޗުތައް އޮތްއޮތުމުގެ ބަދަލުގައި، ފީފާގަައި ރަޖިސްޓްރީކޮށްގެން ކުޅޭ އެއް ވަނަ ގިންތީގެ އެކުވެރިކަމުގެ މެޗުތައް ވެސް މީގައި ހިމެނުމަށެެވެ. ޑިސިޕްލިނަރީ ކޯޑުން އެ ފުރުސަތު ދެވޭގޮތަށް އޮތުމާ އެކު، އެ ލުއި އާޖެންޓީނާ ކުޅުންތެރިންނަށް ދޭން ވަނީ ނިންމައިފަ އެވެ.
މި މައްސަލައިގައި އާޖެންޓީނާގެ އެފްއޭ، 321،000 ޑޮލަރުން ޖޫރިމަނާކުރިއިރު، އޭގެއިން 100،000 ޑޮލަރު އިންވެސްޓްކުރާނީ ނަސްލީ ތަފާތުކުރުން ނަައްތާލުުމަށް ކުރެވޭ މަސައްކަތްތަކުގަ އެވެ. އަދި، އިތުރު 100،000 ޑޮލަރު މި ފަހަރުގެ ޖޫރިމަނާ ތެރޭގައި ދައްކަން ނުޖެހޭނެ އެވެ. އެއީ، މި ފަދަ ކުށެއް ތަކުރާރުކޮށްފިނަމަ، އަންނާނެ އަދަބަކަށް ވަނީ ކަނޑައަޅައިފަ އެވެ. މި ޖޫރިމަނާތަކުގެ އިތުރުން، ފީފާ އިން ވަނީ، އާޖެންޓީނާ އިން ދެން ކުޅޭ ފީފާ ރަޖިސްޓާޑް ހޯމް ދެ މެޗުގައި، ސަޕޯޓަރުންނަށް ދަނޑަށް ވެއްދޭނީ 50 ޕަސެންޓް ޖާގަ އަށް ކަމަށް ކަނޑައަޅައިފަ އެވެ.
އާޖެންޓިނާ އެފްއޭ އިން ވަނީ، ފީފާ އިން މި ފިޔަވަޅުތައް އެޅުމުގައި ބަލާފައިވާ ކަންކަމާއި ގަވާއިދުތައް ހިމެނޭހެން ލިޔުމުން ރިޕޯޓެއް ދޭން އެދިފަ އެވެ. އެއީ، މި މައްސަލައިގައި ކުޅިވަރުގެ އެންމެ މަތީ ކޯޓު، ކޯޓް އޮފް އާބިޓްރޭޝަން ފޯ ސްޕޯޓްސް (ކާސް) އަށް ދާން ވެސް އާޖެންޓީނާ އިން ތައްޔާރަށް އޮތުމުންނެވެ.
