ޓްރިވެންޑްރަމް، އިންޑިއާ (ސެޕްޓެމްބަރު 6) - މިދިޔަ އަހަރުގެ ނޮވެމްބަރު މަހު، ލިއޮނަލް މެސީ ހިމެނޭ ގޮތަށް އާޖެންޓީނާގެ ގައުމީ ޓީމުން ކެރަލާގައި ކުޅެން ހަމަޖެއްސި މެޗާ ގުޅޭ 13 މިލިއަން ޑޮލަރުގެ ކޮރަޕްޝަން މައްސަލައެއް ކެރަލާ ސަރުކާރުން އަންގައިގެން ހާއްސަ ތަހުގީގު ޓީމަކުން ބަލަން ފަށައިފި އެވެ.
އެތައް މަހެއް ވަންދެން މަޝްވަރާތައް ކުރުމަށް ފަހު، މިދިޔަ އަހަރުގެ ނޮވެމްބަރު 17 ވަނަ ދުވަހު، އޮސްޓްރޭލިއާ އާއި އާޖެންޓީނާ އިން ކެރަލާގެ ނެހްރޫ ސްޓޭޑިއަމްގައި ކުޅޭ ގޮތަށް ހުރިހާ ކަމެއް ހަމަޖެހިގެންދިޔަ އެެވެ. އަދި، މި މެޗު ހަމަޖައްސަން އާޖެންޓިނާ ފުޓްބޯލް އެސޯސިއޭޝަން (އޭއެފްއޭ) އަށް ފައިސާ ވެސް ދިން ކަމަށް މީޑިއާގައި ވަނީ ރިޕޯޓްކުރެވިފަ އެވެ.
މެސީގެ އާޖެންޓީނާ އިން މެޗެއް ކުޅެން އިންޑިއާގެ ކެރަލާ އަށް
އަންނަ އަހަރު އާޖެންޓީނާ އިން ލިއޮނަލް މެސީ ހިމެނޭ ގޮތަށް އިންޑިއާގެ ކެރަަލާގައި މެޗެއް ކުޅެން ހަމަޖެހިފައިވާ ކަމަށް ކެރަލާގެ ސްޓޭޓް ސްޕޯޓްސް މިނިސްޓްރީން ވަނީ އިއުލާނުކޮށްފައި.
މައްސަލަ ގޯސްވީ، މިދިޔަ އަހަރުގެ ޑިސެމްބަރު މަހު، މެސީ އިންޑިއާ އަށް ކުރި ދަތުރުގައި ކެރަލާގައި އެއްވެސް އިވެންޓެއް ނުހިމެނުނު ހިސާބުންނެވެ. ގޯޓްޓުއާގެ ނަމުގައި މެސީ އިންޑިއާގެ ގިނަ ސިޓީތަކެއްގައި ކުރިއަށްގެންދިޔަ ޓުއާ އަށް ގިނަ ބަޔެއްގެ ސަމާލުކަން ހުއްޓުނެވެ. އަދި، ކެރަލާގައި ކުޅެން ހަމަޖެއްސި މެސީ ހިމެނޭހެން އާޖެންޓީނާ އިން ކުޅޭ މެޗުގެ ވާހަކަތަކާ ގުޅޭ ހިޔާނާތުގެ ކަންކަން ފެންމަތިވާން ފެށި އެވެ.
ރިޕޯޓާ ބްރޯޑްކާސްޓިން ކޯޕަރޭޝަން (އާރްބީސީ)އާ ގުޅިގެން ކެރަލާ ސަރުކާރުން އާޖެންޓީނާގެ މެޗުގެ ކަންކަން ކުރިއަށްގެންދިޔަ ކަމަށް މީޑިއާތަކުގައި ރިޕޯޓްކުރެވިފައިވީ ނަމަވެސް، އާރްބީސީ އާއި ކެރަލާ ސަރުކާރު އަދި އާޖެންޓީނާ އެފްއޭއާ މެދުގައި މި ކަންކަމަށް އެއްބަސްވުމެއް ހެދިފައިވާކަން ފެންނަން ނެތެވެ. އަދި، އާރްބީސީން އާޖެންޓީނާ އެފްއޭ އަށް އެމެރިކާ ކުންފުންޏެއް މެދުވެރިކޮށް، 13 މިލިއަން ޑޮލަރު ދެއްކި ކަމަށް ބުނި ނަމަވެސް އޭގެއިން އެއްވެސް ލިޔެކިއުމެއް އަދި ބޭންކް ރެކޯޑެއް ވެސް ފެންނަން ނެތެވެ. މީގެ އިތުރުން، މި އިވެންޓާ ގުޅޭ އެކި ފައިސާގެ މުއާމަލާތްތަކަށް ދައްކަން ޖެހޭ، ދެ މިލިއަން ޑޮލުރު (23 ކްރޯޑް ރުޕީސް)ގެ ޖީއެސްޓީ ވެސް ވެސް ނުދައްކާ ކަމަށް ތަހުގީގަށް އެނގިފައިވެ އެވެ.
މިދިޔަ ބުރާސްފަތި ދުވަހު، ކެރަލާގެ ޗީފް މިނިސްޓަރު، ޝްރީ ވީ ޑީ ސަތީޝަން، ސޯޝަލް މީޑިއާގައި ކުރި ޕޯސްޓެއްގައި ލިޔުއްވާފައިވާ ގޮތުގައި، ހާއްސަ އިންވެސްޓިގޭޝަން ޓީމަކާއި ފުލުހުން ގުޅިގެން މި ތަހުގީގުގައި ގިނަ ހޯދުންތަކެއް ހޯދަމުން އަންނަ ކަމަށާއި އާންމުންނާއި ދައުލަތުގެ ފައިސާ ބޭނުންކޮށްގެން މި ފަދަ ހިޔާނާތުގެ ކަންކަން ކުރާ ފަރާތްތަކަށް ހައްގު އަދަބު ދޭން ޖެހޭ ކަމަށެވެ.
މެސީ ވަނީ 2011 ވަަނަ އަހަރު އިންޑިއާގައި މެޗެއް ކުޅެފަ އެވެ. އެއީ، ކަލްކަތާގެ ސޯލްޓް ލޭކް ސްޓޭޑިއަމްގައި ވެނެޒުއޭލާއާ ދެކޮޅަށް ކުޅެ 1-0 އިން މޮޅުވި އެކުވެރިކަމުގެ މެޗުގަ އެވެ.
ޓުއާގެ އަގަކީ 100 މިލިއަން ޑޮލަރު: މެސީ އަށް 18 މިލިއަން ޑޮލަރު!
ފާއިތުވި ތިން ދުވަހު، އިންޑިއާގެ ހަތަރު ސިޓީ އަކަށް އާޖެންޓީނާގެ ތަރި، ލިއޮނަލް މެސީ ގެންގޮސްގެން ކުރިއަށްގެންދިޔަ، "ގޯޓް ޓު އިންޑިއާ ޓުއާ"ގެ އަގަކީ 100 މިލިއަން ޑޮލަރު ކަމަށާއި މެސީ އަށް އެކަނި 18 މިލިއަން ޑޮލަރު ދީފައިވާ ކަމަށް ރިޕޯޓްތައް ބުނޭ
މިދިޔަ އަހަރުގެ ޑިސެމްބަރު މަހު، އިންޑިއާގެ ހަތަރު ސިޓީ އަކަށް އާޖެންޓީނާގެ ތަރި، މެސީ ގެންގޮސްގެން ކުރިއަށްގެންދިޔަ، "ގޯޓް ޓު އިންޑިއާ ޓުއާ"ގެ އަގު 100 މިލިއަން ޑޮލަރަށް އަރާނެ ކަމަށާއި މެސީ އަށް އެކަނި 18 މިލިއަން ޑޮލަރު ދީފައިވާ ކަމަށް އިންޑިއާގެ މީޑިއާތަކުން މީގެ ކުރިން ވަނީ ރިޕޯޓްކޮށްފަ އެވެ.
މި ފަހަރުގެ ދަތުރުގައި މެސީ އެންމެ ފުރަތަމަ ދިޔައީ ކަލްކަތާ އާއި ހައިދަރުއާބާދަށެވެ. އަދި، އެ އަށް ފަހު، މުމްބާއި އަށް ދިއުމަށް ފަހު، ޓުއާ ނިންމާލީ އިންޑިއާގެ ވެރިރަށް ދިއްލީންނެވެ.
ކެރަލާ ސަރުކާރުން އާޖެންޓީނާ ގެންނަން ހަމަޖެއްސި މެޗުގެ ކަންކަމާއި މެސީގެ "ގޯޓްޓުއާ" ދަތުރުގެ ކަންކަމަކީ އިންޑިއާގެ ފުޓްބޯޅަ ފެޑެރޭޝަން، އޭއައިއެފްއެފްގެ ބައިވެރިވުމެއް އޮތް އިވެންޓްތަކެއް ނޫނެވެ.
