މިއާމީ، ޔުނައިޓެޑް ސްޓޭޓްސް (އޮގަސްޓް 31) - އާޖެންޓީނާގެ ކެޕްޓަން، ލިއޮނަލް މެސީ ގައުމީ ޓީމަށް ކުޅުން ހުއްޓާލިކަން އިއުލާނުކޮށްފި އެވެ.
އުމުރުން 39 އަހަރުގެ މެސީ ގައުމީ ޓީމަށް ކުޅުން ހުއްޓާލިކަން އިއުލާނުކުރި ސޯޝަލް މީޑިއާގައި ކުރި ޕޯސްޓެއްގަ އެވެ. މެސީ ބުނީ، ގައުމީ ޓީމަށް 20 ވަރަކަށް އަހަރު ކުޅެދިނުމަށް ފަހު، ދެން އިތުރަށް ގައުމު ތަމްސީލް ނުކުރުމަށް ނިންމި ނިންމުމަކީ ހަގީގަތުގައި ކެރިއަރުގައި އުނދަގޫ ނިންމުމެއް ކަމަށެވެ.
މި މަހު ކުރީކޮޅުގައި މެސީގެ ބައްޕަ، ޖޯޖް މެސީ މަރުވުމާ އެކު، މެސީ ވަނީ ފުޓްބޯޅަ ކެރިއަރު އަވަހަށް ނިންމާލުމުގެ ވިސްނުން ގެންގުޅޭ ކަމަށް ހާމަކޮށްފަ އެވެ.
ބައްޕަގެ މަރާ އެކު މެސީގެ ކެރިއަރު އަވަހަށް ނިންމާލަން ވިސްނަނީ
ލިއޮނަލް މެސީގެ ބައްޕަ އަދި އޭޖެންޓް ޖޯޖް މެސީ މަރުވުމާ ގުޅިގެން، މެސީގެ ފުޓްބޯޅަ ކެރިއަރު ކުރިއަށްގެންދާނެ ގޮތަކާ މެދު އޭނާ ވަނީ ސުވާލު އުފައްދާފައި. ކެރިއަރުގެ ހުރިހާ ކަމެއްގައި އެންމެ ގާތުން އެހީތެރިވި ބައްޕަ ނެތުމުން، ކުޅުން ހުއްޓާލުމުގެ ވިސްނުން މެސީ ގެންގުޅޭކަން އޭނާގެ ސޯޝަލް މީޑިއާ ޕޯސްޓުން ހާމަވޭ
އާޖެންޓީނާއާ އެކު، ތިން ވޯލްޑް ކަޕެއްގެ ފައިނަލުގައި ކުޅެ މެސީ ވަނީ އެއް ފަހަރު މުބާރާތުގެ ތަށި އުފުލާލައިފަ އެެވެ. އެ ގޮތުން، އެންމެ ފުރަތަމަ 2014 ވަނަ އަހަރުގެ ވޯލްޑް ކަޕް ފައިނަލުގައި ޖަރުމަނު އަތުން ބަލިވިއިރު، 2022 ވަނަ އަހަރުގެ ވޯލްޑް ކަޕްގެ ފައިނަލުގައި ޗެމްޕިއަންކަން ހޯދި އެވެ. އެކަމަކު، މި ފަހަރު އެމެރިކާ، މެކްސިކޯ އަދި ކެނަޑާގައި ބޭއްވި ވޯލްޑް ކަޕްގެ ފައިނަލުގައި ސްޕެއިން އަތުން ބަލިވީ އެވެ.
އަށް ފަހަރު ބެލޮންޑިއޯ އެވޯޑް ހޯދާފައިވާ މެސީ ބުނީ، އޭނާ ގައުމީ ޓީމުން ރިޓަޔާކުރި މެސެޖު ލިޔެފައިވަނީ، ޖުލައި 21 ވަނަ ދުވަހު ކަމަށެވެ. އެއީ، ސްޕެއިން އަތުން ވޯލްޑް ކަޕް ފައިނަލުގައި ބަލިވިތާ ދެ ދުވަސް ފަހުންނެވެ.
"ގައުމީ ޓީމަށް ކޮށްދެވޭނެ ހުރިހާ ކަމެއް ކޮށްދީފިން. ވަގުތު ކުޑަތަން ވެއްޖެ، ކޮންމެ ޗެޕްޓަރެއްގެ ވެސް ނިމުމެއް އަންނާނެ. މިއީ، އެންމެ ހިތްދަތިވި އެއް ނިންމުން،" މެސީ، ރިޓަޔަމަންޓް އިއުލާނުކުރަމުން ލިޔެފައިވެ އެެވެ.
"ގައުމީ ޓީމަށް ކުޅުމަކީ އަބަދުވެސް ލޯބި ކުރާ ކަމެއް. އެކަމަކު، މިހާރު މި އޮތީ އެކަމަށް ނިމުން ގެންނަ ވަގުތު އަތުވެފައި،"
ތަފާތު ހަ ވޯލްޑް ކަޕެއްގައި އާޖެންޓީނާ ތަމްސީލްކުރި މެސީ ވަނީ މީގެ ކުރިން ވެސް ކުއްލި ގޮތަކަށް ގައުމީ ޓީމުން ރިޓަޔާކޮށްފަ އެވެ. އެއީ، ޖެހިޖެހިގެން ތިން ފައިނަލުން (ވޯލްޑް ކަޕާއި ދެ ކޮޕަ އެމެރިކާ ފައިނަލުން) އާޖެންޓީނާއާ އެކު ބަލިވުމުން، މެސީ ވަނީ 2016 ވަނަ އަހަރު ރިޓަޔާކޮށްފަ އެވެ. އެކަމަކު، އެ ނިންމުން ބަދަލުކޮށް، ގައުމީ ޓީމަށް އެނބުރި އަންނަން ނިންމީ 2018 ވަނަ އަހަރުގެ ވޯލްޑް ކަޕަށް އާޖެންޓީނާ ކޮލިފައިކޮށްދިނުމަށެެވެ.
މެސީ ވަނީ އާޖެންޓީނާ އަށް ޖުމްލަ އެކު، 207 މެޗު ކުޅެދީ، ގައުމީ ޓީމަށް އެންމެ ގިނަ މެޗު ކުޅެދީ އެންމެ ގިނަ ގޯލު ޖެހި ކުޅުންތެރިޔާގެ ރެކޯޑް ހަދައިފަ އެވެ. މެސީ ވަނީ އާޖެންޓީނާ ގައުމީ ޓީމަށް ޖުމްލަ އެކު، 125 ގޯލު ޖަހައިފަ އެވެ.
ގައުމީ ޓީމާ އެކު މެސީގެ ކާމިޔާބީތަކަށް ބަލާއިރު، 2022 ވަނަ އަހަރުގެ ފީފާ ވޯލްޑް ކަޕްގެ އިތުރުން، 2021 އާއި 2024 ވަނަ އަހަރުގެ ކޮޕަ އެމެރިކާ ފުޓްބޯޅަ މުބާރާތާއި ޔޫރަޕާއި ދެކުނު އެމެރިކާގެ ޗެމްޕިއަނުންގެ މެދުގައި ކުޅޭ ފައިނަލިސިމާ ޓްރޮފީ ހިމެނެ އެވެ.
