މިއާމީ، ޔުނައިޓެޑް ސްޓޭޓްސް (އޮގަސްޓް 30) - ލިއޮނަލް މެސީގެ ހަތަރު ގޯލާ އެކު، 7-1 އިން މޮންޓްރެއަލް ސީއެފް އަތުން މޮޅުވެ، އިންޓަ މިއާމީން ފޯމަކަށް އެެޅުމުގެ މަސައްކަތް ވަރުގަދަކޮށްފި އެވެ.
ރޭގެ މެޗަށް ނުކުތްއިރު، މިއާމީން އެންމެ ފަހުން، ހުރިހާ މުބާރާތަކަށް ބަލާއިރު ކުޅުނު ހަތް މެޗުގެ ތެރެއިން މޮޅުވީ އެންމެ މެޗަކުންނެވެ. އެއީ، އެމެރިކާ، މެކްސިކޯ އަދި ކެނަޑާގައި ކުރިއަށްދިޔަ ފީފާ ވޯލްޑް ކަޕަށް ފަހު މެސީ، 39، ޓީމާ ގުޅުނު ފަހުން ކުޅުނު މެޗުތަކެވެ.
މިއާމީން ލީޑުނެގީ މި މެޗުގެ 20 ވަނަ މިނިޓްގައި ސެގޯވިއޯ ދިން ބޯޅައަކުން ކަސެމީރޯ ޖެހި ގޯލުންނެވެ. އެކަމަކު، މެޗުގެ 37 ވަނަ މިނިޓްގައި ފަބިއަން ހާބާސް ވަނީ ގޯލު ޖަހައި މޮންޓްރެއަލް އަށް އެއްވަރުކޮށްދީފަ އެވެ. މިއާމީ އަށް ދެ ވަނަ ފަހަރަށް މެޗުގައި ލީޑުނަގައިިދިނީ މެސީ އެވެ. އެއީ، 40 ވަނަ މިނިޓްގައި ޖެހި ގޯލުންނެވެ. ދެ ވަނަ ހާފު ކުޅުން ފަށައިގެން ހަތް މިނިޓް ތެރޭ މެސީ ވަނީ މެޗުގައި އޭނާގެ ދެ ވަނަ ގޯލު ޖަހައިފަ އެވެ.
މެސީ ދިން ބޯޅައަކުން މެޗުގެ 80 ވަނަ މިނިޓްގައި ލުއިސް ސުއަރޭޒް ވަނީ މިއާމީ ހަތަރު ވަނަ ލަނޑު ޖަހައިފަ އެވެ. އޭގެ ތިން މިނިޓް ފަހުން، މެސީ ވަނީ އިތުރު ލަނޑެއް ޖަހައި ހެޓްރިކް ފުރިހަމަކޮށްފަ އެވެ. މިއާމީން ހަ ވަނަ ލަނޑު ޖެހީ މެޗުގެ 89 ވަނަ މިނިޓްގަ އެވެ. މި ގޯލު ޖެހީ އަލެކްސަންޑަ ޝޯ އެވެ.
އިތުރު ވަގުތުގެ ހަ ވަނަ މިނިޓްގައި މެސީ ވަނީ މިއާމީގެ ހަތް ވަނަ ލަނޑު، އަދި އޭނާގެ ހަތަރު ވަނަ ލަނޑު ޖަހައިފަ އެވެ. މިއީ، މި ފަަހަރުގެ މޭޖަ ލީގު ސޮކާ (އެމްއެލްއެސް)ގައި މެސީ މި ސީޒަނުގައި ޖެހި 18 ވަނަ ގޯލެވެ. ލަނޑު ލިސްޓުގެ ކުރީގައި މެސީ އޮތްއިރު، ދެ ވަަނައިގައި އޮތީ އެފްސީ ޑަލަސް އަށް ކުޅޭ ކްރޮއޭޝިއާގެ ފޯވާޑް، ޕީޓާ މޫސާ އެވެ. މޫސާ ވަނީ 16 ގޯލު ޖަހައިފަ އެވެ. އެސިސްޓް ތާވަލަށް ބަލާއިރު، މެސީ އޮތީ 10 އެސިސްޓާ އެކު ދެ ވަނައިގަ އެވެ. އެއް ވަނައިގައި އޮތް ތިން ކުޅުންތެރިން ކޮށްފައިވަނީ 11 އެސިސްޓް އެވެ.
އެމްއެސްއެލް އީސްޓާން ކޮންފަރެންސްގެ ތާވަލަށް ބަލާއިރު، މިއާމީ އޮތީ ދެ ވަނައިގަ އެވެ. އެއީ، އެއް ވަނައިގައި އޮތް ނޭޝްވިލް އަށް ވުރެން 10 ޕޮއިންޓް ފަހަތުގަ އެވެ. ނޭޝްވިލް އަށް 22 މެޗުން 52 ޕޮއިންޓް ލިބިފައިވާއިރު، މިއާމީގެ އޮތީ 22 މެޗުން 42 ޕޮއިންޓް އެވެ.
