ރައީސް މުހައްމަދު މުއިއްޒު އާއި އެމަނިކުފާނުގެ އަނބިކަނބަލުން ސާޖިދާ މުހައްމަދުއަށް އެކި ފަރާތްތަކުން ލިބުނު ހަދިޔާގެ ތަފްސީލް ހާމަކުރަން ރައީސް އޮފީހުން ދެކޮޅު ހަދައިފި އެވެ.
މައުލޫމާތު ހޯދައި ލިބިގަތުން (އާރްޓީއައި) ގާނޫނުގެ ދަށުން އަދަދު ނޫހުން ރައީސް އޮފީހަށް ހުށަހެޅީ 2023، 2024، 2025 އަދި 2026 ވަނަ އަހަރުގެ ކޮންމެ މަހެއްގައި މުއިއްޒާއި ސާޖިދާއަށް ރާއްޖޭގެ އެކި ފަރާތްތަކުން އަދި ރާއްޖެއިން ބޭރުގެ އެކި ފަރާތްތަކުން ހަދިޔާގެ ގޮތުގައި ލިބިފައިވާ ތަކެތީގެ ތަފްސީލު ހޯދުމަށެވެ.
އެ އާރްޓީއައިގައި މުއިއްޒާއި ސާޖިދާއަށް ރާއްޖެ އާއި ރާއްޖެއިން ބޭރުގެ އެކި ފަރާތްތަކުން ލިބިވަޑައިގެންނެވި އެއްވެސް ހަދިޔާއެއް ބޭނުންކުރެއްވިތޯ ސާފުކޮށްދިނުމަށްވެސް އަދަދު ނޫހުން އެދިފައިވެ އެވެ.
އެކި އެކި ރަސްމީ މުނާސަބާތަކާއި ގުޅުވައި، ހަނދާނީ ހަދިޔާ ބަދަލު ކުރުމަކީ އޮންނަ ކަމެކެވެ. ގައުމުތަކުގެ ވެރީންނާއި އިއްޒަތްތެރީންގެ ބައްދަލުވުންތަކާއި ފުރަމާނަ ދަތުރުތަކުގައި ހަނދާނީ ހަދިޔާ ބަދަލު ކުރެ އެވެ. އެކަމަކު އެކަމުގެ ތަފްސީލްތައް އެކި އޮފީސްތަކުން ރައްކާކުރާ ކަމަށް މައުލޫމާތު ލިބެ އެވެ.
ނަމަވެސް އަދަދު ނޫހުން ހުށަހެޅި މި އާރްޓީއައިއަށް ގާނޫނުގައި ބުނާ ގޮތުގެ މަތިން ރައީސް އޮފީހުން އެއްވެސް ޖަވާބެއް ދީފައި ނުވެ އެވެ. އެކަމާ ގުޅިގެން އަދަދު ނޫހުން ވަނީ އެ މައްސަލަ ބަލަައިދިނުަމަށް އެދި އިންފޮމޭޝަން ކޮމިޝަން އޮފީހަށް މައްސަލަ ހުށަހަޅާފަ އެވެ.
މީގެއިތުރުން މި އާރްޓީއައިގައި 2023، 2024، 2025 އަދި 2026 ވަނަ އަހަރުގެ ކޮންމެ މަހެއްގައި މުއިއްޒުގެ މުސާރަ އާއި އިނާޔަތުގެ ގޮތުގައި މިހާތަނަށް ލިބިވަޑައިގެންފައިވަނީ ކިހާވަރެއްކަންވެސް އެދުމުން އެކަންވެސް ރައީސް އޮފީހުން ހާމަކޮށްފައެއް ނުވެ އެވެ.
ރައީސް އޮފީހުގައި އެދޭ މައުލޫމާތުތައް މުއްދަތު ފަހަނައަޅައިދާއިރުވެސް ޖަވާބު ނުދޭތީ އިންފޮމޭޝަން ކޮމިޝަނަރުގެ އޮފީހުން ރައީސް އޮފީސް މިދިޔަ ޖުލައި މަހުގެ ތެރޭގައި 2،000ރ. ޖޫރިމަނާވެސް ކުރި އެވެ.
ރައީސް އޮފީހުން ހޯދަން އެދޭ މައުލޫމާތުތައް އެ ކޮމިޝަނުން ފޯރުކޮށްދޭން އައިކޮމްއިން ތަކުރާރުކޮށް އެންގުމުންވެސް ފޯރުކޮށްނުދޭކަން ފާހަގަކުރެވެ އެވެ. އޭގެއިތުރުން ފޯރުކޮށްދޭ މައުލޫމާތުތައް ފުރިހަމަ ނުވުމާއި، ނުގުޅޭ ޖަވާބުތައް ދިނުންވެސް ހިމެނެ އެވެ.
