ސަރުކުރާރުން ކުރިއަށްގެންދާ ތަރައްގީގެ މަޝްރޫއުތަކުގެ ތަންފީޒީ ދުވެލި ހަލުވި ކުރުމާމެދު މަޝްވަރާ ކުރުމަށް ކެބިނެޓުގެ މަސައްކަތު ބައްދަލުވުމެއް ރައީސް އޮފީހުގައި މިއަދު ބާއްވައިފި އެވެ.
ރައީސް އޮފީހުން ބުނީ ކެބިިނެޓުން ބޭއްވި ބައްދަލުވުމުގައި ރައީސް މުހައްމަދު މުއިއްޒުގެ ރިޔާސީ ވައުދުތަކާއި، ރާއްޖޭގެ ހުރިހާ ރަށެއްގައި ކުރިއަށްގެންދާ މަޝްރޫއުތަކުގެ އަދާހަމަ މައުލޫމާތު ހިއްސާކޮށް، ކެބިނެޓުގެ މެންބަރުންނާއި ސަރުކާރު ހިއްސާވާ ކުންފުނިތަކުގެ ވެރިން ވަނީ ފުޅާ ދާއިރާއެއްގައި މަޝްވަރާ ކޮށްފައި ކަމަށެވެ.
މެދުއިރުމަތީގައި ހިނގަމުންދާ ހަމަނުޖެހުމާ ގުޅިގެން ދިމާވި ތަކެތީގެ ދަތިކަމަށް ގެނެވިފައިވާ ހައްލުތަކާއެކު، މަޑުޖެހިފައިހުރި ގިނަ މަޝްރޫއުތައް އަލުން ބާރު ދުވެއްޔެއްގައި ކުރިއަށްގެންދިއުމަށް ކެބިނެޓަށް މުއިއްޒު އިރުޝާދު ދެއްވާފައިވާ ކަމަށް ރައީސް އޮފީހުން ބުންޏެވެ.
މީގެއިތުރުން ވަކިވަކި މަޝްރޫއުތައް ކަނޑައެޅިފައިވާ މުއްދަތުތަކަށް ނިންމުމަށް އިތުރު ހިތްވަރަކާއެކު އަދި ގުޅިގެން ކުރުމަށްވެސް މުއިއްޒު ބާރުއަޅުއްވާފައިވާ ކަމަށްވެސް އެ އޮފީހުން ބުންޏެވެ.
ސަރުކާރުން ރަށްރަށުގައި ހިންގާ ގިނަ މަޝްރޫއުތައް ހުއްޓިފައިވާ ކަމަށް ރަށު ކައުންސިލްތަކުން އަންނަނީ ބުނަމުންނެވެ. އޭގެ ތެރޭގައި މި ސަރުކާރުން ފެށި މަޝްރޫއުތަކާއި މިދިޔަ ސަރުކާރުން ކުރިއަށްގެންދިޔަ މަޝްރޫއުތައް ހިމެނޭ ކަމަށް ކައުންސިލްތަކުން ބުންޏެވެ.
މުއިއްޒު މީީގެ ކުރިން ވިދާޅުވެފައިވަނީ މި ސަރުކާރުން ފެށި ހުރިހާ މަޝްރޫއެއް އެމަނިކުފާނުގެ ފަސް އަހަރުގެ ދައުރު ތެރޭގައި ނިމޭނެ ކަމަށެވެ. ނަމަވެސް އެމަނިކުފާނުގެ އެންމެ ބޮޑު ވައުދުގެ ތެރޭގައި ހިމެނޭ ބޯހިޔާވަހިކަމުގެ ވައުދު ފުއްދޭނެކަމާމެދު ގިނަ ބަޔަކު މިހާރު ދަނީ ސުވާލު އުފައްދަމުންނެވެ.
