ގާނޫނުއަސާސީގައި ބަޔާންކޮށްފައިވާ ގޮތަށް ކޮންމެ އަހަރަކު ރައީސް މުހައްމަދު މުއިއްޒު އޮޑިޓަ ޖެނެރަލަށް މާލީ ބަޔާން ހުށަހަޅާފައިވޭތޯ އާއި އެ ހުށަހެޅުއްވި މާލީ ބަޔާން ހޯދުމަށް "އަދަދު" އިން ކުރި ސުވާލުތަކަށް މައުލޫމާތު ދޭން ރައީސް އޮފީހުން ދެކޮޅު ހަދައިފި އެވެ.
އަދަދު ނޫހުން ހުށަހަޅާފައިވަނީ އަންނަނިވި ދެ ސުވާލެވެ. އެއީ؛ 1. ރައީސް ޑރ. މުހައްމަދު މުއިއްޒު 2024، 2025، އަދި 2026 ވަނަ އަހަރު އޮޑިޓަ ޖެނެރަލް އޮފީހަށް މާލީ ބަޔާން ހުށަހެޅުއްވިތޯ؟ 2. ހުށަހެޅުއްވި މާލީ ބަޔާންގެ ކޮޕީއެއް ދިނުން.
ގާނޫނުއަސާސީގެ 120 ވަނަ މާއްދާގެ ދަށުން ކޮންމެ އަހަރަކުވެސް ރައީސުލްޖުމްހޫރިއްޔާގެ މުދަލާއި ފައިސާގެ ހިސާބުތަކާއި، ވިޔަފާރީގެ މަސްލަހަތުތަކާއި، އަރަންޏާއި ދަރަނި ހާމަކޮށް ތައްޔާރުކުރާ ބަޔާނެއް އޮޑިޓަ ޖެނެރަލަށް ހުށަހަޅުއްވަންޖެހެ އެވެ.
މި މައުލޫމާތު ނުދިނުމަށް ރައީސް އޮފީހުން ބަހަނާއެއްގެ ގޮތުގައި ބޭނުންކުރީ މައުލޫމާތު ހޯދައި ލިބިގަތުމުގެ ހައްގުގެ ގާނޫނުގެ 72 ވަނަ މާއްދާ އެވެ. އެ މާއްދާގެ (ރ) އަށް ރިއާޔަތްކޮށް ރައީސް އޮފީހުން ބުނެފައިވަނީ، "އަދަދު އޮންލައިން" އަކީ ގާނޫނީ ޝަހުސެއްކަން އެ އޮފީހަށް ކަށަވަރުވެފައިނުވާ ކަމަށެވެ. އަދި އެކަން ކަށަވަރުކޮށްދޭ ލިޔުމެއް ހިއްސާކުރުމުން ނޫނީ މައުލޫމާތު ފޯރުކޮށް ނުދެވޭނެ ކަމަށް އެ އޮފީހުން ޖަވާބުދީފައިވެ އެވެ.
ރައީސް އޮފީހުގެ މި ޖަވާބާ ގުޅިގެން އަދަދު ނޫހުގެ ސީއީއޯ ހުސައިން ފިޔާޒު މޫސާ ވިދާޅުވީ، މިއީ ރައީސް މުއިއްޒު ގާނޫނުއަސާސީގެ ދަށުން ކުރަން މަޖުބޫރުކޮށްފައިވާ ކަމެއްގެ މައުލޫމާތު ނުދިނުމަށް ދައްކާ ބަހަނާއެއް ކަމަށެވެ.
"ރައީސް އޮފީހަށް އަދަދު ނޫސް ވެއްދުން މަނާކޮށްފައި އެ އޮތީ ގާނޫނީ ޝަހުސަކަށް ނުވޭތީތޯ؟ މިއީ އެންމެ ސުވާލެއް. ޖަވާބުދާރީ ނުވުމަށްޓަކައި އެ ބޭފުޅުން އެ ދައްކަވަނީ ހުސް ބަހަނާ،" ފިޔާޒު ވިދާޅުވި އެވެ.
މި މައުލޫމާތު ނުދިނުމަކީ ރައީސް އޮފީހުގެ އިންފޮމޭޝަން އޮފިސަރު ސީދާ ގާނޫނުއަސާސީ އާއި ގާނޫނާ ކަނޑައެޅިގެން ހިލާފުވުން ކަމަށާއި މި މައްސަލަ މިހާރު އިންފޮމޭޝަން ކޮމިޝަނަރަށް ހުށަހަޅާފައިވާ ކަމަށް ވެސް ފިޔާޒު ވިދާޅުވި އެވެ.
