ގެއްލުވާލާފައިވާ ނޫސްވެރިޔާ އަހުމަދު ރިލްވާން އަބްދުﷲގެ އާއިލާއިން ރައީސް މުހައްމަދު މުއިއްޒުއާ ބައްދަލުކުރަން އެދިފައިވީ ނަމަވެސް، އެ ފުރުސަތު މިހާތަނަށް ލިބިފައިނުވާ ކަމަށާއި، ބަންޑާރަނައިބު އަހުމަދު އުޝާމްއާ ބައްދަލުކުރަން އެދި ސިޓީ ފޮނުވިތާ ހަތަރު މަސް ވެފައިވާ ކަމަށް އާއިލާއިން ބުނެފި އެވެ.
މިކަން ހާމަވެފައިވަނީ ސަރުކާރުގެ ވަޒީރުންނާ ސުވާލުކުރުމަށް ރޭ ބޭއްވި "އަހާ" ފޯރަމްގައި ރިލްވާންގެ ދައްތަ ފާތިމަތު ޝެހެނާޒް ކުރި ސުވާލުންނެވެ.
ޝެހެނާޒް ބުނީ، ރައީސް މުއިއްޒު ވެރިކަމަށް ވަޑައިގަތީއްސުރެ އެމަނިކުފާނާ ބައްދަލުކުރަން އާއިލާއިން ވަރަށް ބޮޑަށް މަސައްކަތް ކުރި ނަމަވެސް އެކަން ކާމިޔާބުވެފައި ނުވާ ކަމަށެވެ. އަދި މަރު ކޮމިޝަނުން ތައްޔާރުކޮށްފައިވާ ރިލްވާންގެ މައްސަލައިގެ ރިޕޯޓު މިހާރު އޮތީ ބަންޑާރަނައިބުގެ އަތުގައި ކަމަށް ނޫސްވެރިންގެ ބައްދަލުވުމެއްގައި މުއިއްޒު ވިދާޅުވެފައިވާތީ، ބަންޑާރަނައިބާ ބައްދަލުކުރަން އެޕޮއިންޓްމަންޓަކަށް އެދި ސިޓީލީތާ ހަތަރު މަހަށްވުރެ ގިނަ ދުވަސް ވެފައިވާ ކަމަށް އޭނާ ފާހަގަކުރި އެވެ.
ނަމަވެސް އެ ސިޓީއަށް އެއްވެސް ޖަވާބެއް ލިބިފައި ނުވާތީ، އާއިލާއިން ބޭނުންވަނީ އެ ރިޕޯޓު ލިބޭނެ ގޮތެއް ހަމަޖެހުން ކަމަށް ޝެހެނާޒް ބުންޏެވެ.
"ނޫސްވެރިއަކު ކުރެއްވި ސުވާލަށް ޖަވާބު ދެއްވަމުން ރައީސް [މުއިއްޒު] ވިދާޅުވީ އިބްރާހިމް މުހައްމަދު ސޯލިހް އުފެއްދި މަރު ކޮމިޝަނުން އުފައްދާ ރިލްވާނާ ބެހޭގޮތުން ހަދައި ނިންމާފައިވާ ރިޕޯޓް މިހާރު ވަނީ ވަނީ އުޝާމް އަތްޕުޅުގައި ކަމަށް. އެހެންވީމާ އަޅުގަނޑު ހަމަ ވަގުތުން އުޝާމްއާ ބައްދަލުކުރަންވެގެން އޮންނާނެ އެޕޮއިންޓެމްނޓަކަށް ވެސް ދެވިފައި. އެކަމަކު މިހާރު ހަތަރު މަހަށްވުރެ ގިނަ ދުވަސްވީ އަޅުގަނޑު އެ ސިޓީ ލާފައި އޮންނަތާ. އަޅުގަނޑަށް އެއްވެސް ޖަވާބެއްވެސް ނުދެއްވާ،" ޝެހެނާޒު ވިދާޅުވި އެވެ.
ޝެހެނާޒްގެ ސުވާލަށް ޖަވާބު ދެއްވަމުން އުޝާމް ވަނީ އާއިލާއާ ބައްދަލުނުކުރެވި ގިނަ ދުވަސްތަކެއް ވެފައިވާތީ އެކަމަށް މައާފަށް އެދިވަޑައިގެންފަ އެވެ. އަދި މި ހަފުތާގެ ތެރޭގައި އާއިލާއާ ބައްދަލުކުރެއްވުމަށް މަސައްކަތް ކުރައްވާނެ ކަމުގެ ޔަގީންކަން އުޝާމް ދެއްވި އެވެ.
"އަޅުގަނޑު ހަމަ ވަރަށް މަސައްކަތްކުރާނަން މި ހަފްތާގައި އާއިލާ ބޭފުޅުންނާ ބައްދަލުކުރެވޭތޯ،" އުޝާމް ވިދާޅުވި އެވެ.
އުޝާމް ވިދާޅުވީ ކުރީގެ ސަރުކާރުން އުފެއްދި މަރު ކޮމިޝަންގެ މުއްދަތު މި ސަރުކާރުން އިތުރުކޮށްދީ، އެ ކޮމިޝަނުން ނިންމި މައްސަލަތަކުގެ ރިޕޯޓުތައް މިހާރު ރައީސް އޮފީހުން އޭނާއާ ހަވާލުކޮށްފައިވާ ކަމަށެވެ.
ރިލްވާންގެ މައްސަލައިގެ ރިޕޯޓު އާންމުކުރުމާ ގުޅޭގޮތުން ބަންޑާރަނައިބު ވިދާޅުވީ، އެ ރިޕޯޓުގައި ފުލުހުންނާއި ސަލާމަތީ ބާރުތަކުގެ އިންޓެލިޖެންސްގެ ސިއްރު މައުލޫމާތުތަކެއް ހިމެނޭ ކަމަށެވެ. އެހެންކަމުން އެ ރިޕޯޓުން ހާމަކުރެވޭނީ ކޮން މިންވަރެއްގެ މައުލޫމާތެއްތޯ ބެލުމަށް އެޓަރނީ ޖެނެރަލްގެ އޮފީހުގެ ހާއްސަ ޓީމަކުން ދިރާސާ ކުރަމުންދާ ކަމަށް އޭނާ ވިދާޅުވިއެވެ. މި ދިރާސާގެ މަސައްކަތް ކުރިއަށް އޮތް މަހެއްހާ ދުވަހުގެ ތެރޭގައި ނިންމާލެވޭނެ ކަމަށް އުންމީދު ކުރައްވާ ކަމަށާއި، އެއަށްފަހު ރައީސަށް ލަފާ އަރުވާނެ ކަމަށް އުޝާމް ވިދާޅުވިއެވެ.
މަރު ކޮމިޝަނުގެ ހޯދުންތައް އެއްވެސް ބަޔަކާ ހިއްސާ ނުކުރަން ރައީސް އޮފީހުން އަންގައިފި
ރިޔާސީ ކޮމިޝަންތަކުގެ ގާނޫނުގެ ދަށުން އެ މައުލޫމާތުތައް ހާމަނުކުރެވޭނެ ހުރަހެއް އޮތް ކަމަށް ގަބޫލުނުކުރާ ކަމަށް އާއިލާތަކުންނާއި ޖަމިއްޔާތަކުން ބުނޭ. ތަހުގީގުގެ ހޯދުންތައް ހަމައެކަނި ރައީސް އޮފީހާ ހިއްސާކުރުމަށް މަރު ކޮމިޝަނަށް މިހާރު ވަނީ އަންގާފައި.
ރިލްވާންގެ އާއިލާއާ ބައްދަލުކޮށް، ގާނޫނީ ގޮތުން މައުލޫމާތު ފޯރުކޮށްދެވެން އޮތް އެންމެ ފުޅާ ދާއިރާއެއްގައި އެ މައުލޫމާތުތައް ހިއްސާކުރުމަށް މަސައްކަތް ކުރައްވާނެ ކަމަށްވެސް އުޝާމް ވިދާޅުވިއެވެ. ނަމަވެސް އާއިލާއަށް ރިޕޯޓު ދިނުމާ ގުޅޭ ގޮތުން ގޮތެއް ނިންމާނީ ރައީސް ކަމަށް އުޝާމް ވިދާޅުވި އެވެ.
އޮގަސްޓު 2014 ގައި ރިލްވާން ގެއްލުވާލި މައްސަލައަކީ ދިވެހި މުޖުތަމައު ބޮޑު ސަމާލުކަމެއް ދީފައިވާ މައްސަލައަކަށް ވާއިރު، އެ އާއިލާއިން ދަނީ އިންސާފު ހޯދަން ކެނޑިނޭޅި މަސައްކަތް ކުރަމުންނެވެ.
