ފާއިިތުވި 24 ވަރަކަށް އަހަރު، ދުނިޔޭގެ ޓެނިހުގެ އެންމެ މަތީ ފަންތީގައި ހިފަހައްޓަައިލި ސްޕެއިނަށް އުފަން ކުޅަދާނަ ޓެނިސް ލެޖެންޑަކީ ރަފައެލް ނަޑާލް އެވެ. ޓެނިސް ކޯޓުގެ ނަމުންނަމަ ރަފާ އެވެ. ނަޑާލްގެ ލެވަލަށް ދާނެ ކަމަށް ގިނަ ބަޔަކު އުންމީދުކުރަމުން އަންނަ އެއް ކުޅުންތެރިއަކީ، މި ވަގުތު އަނިޔާގައި ހުރި ކާލޯސް އަލްކަރާޒް އެވެ.
އެކަމަކު، މިދިޔަ އަހަރެއްހާ ދުވަސް ތެރޭ ޓެނިހުގެ ރޭންކިންގައި 429 ދަރަޖައިގެ ކުރިއެރުމެއް ހޯދާފައިވާ އުމުރުން 19 އަހަރުގެ ސްޕެއިނުގެ ތަރި، ރަފައެލް ޖޮޑާ އަށް ގިނަ ބަޔެއްގެ ސަމާލުކަން ވަނީ ހުއްޓިފަ އެވެ. ޖޮޑާގެ ކުޅުން ފެނިފައި ގިނަ ބަޔަކު ސިފަކުރަނީ، މިއީ، ޓެނިހުގެ ދުނިޔޭގަައި ފެނިގެންދާ އާ "ރަފާ" އެއް ކަމަށެވެ.
މީގެ ކުރިން، ދުނިޔޭގެ ރޭންކިންގެ 540 ވަނައިގައި އޮވެ، ޖޮޑާ ވަނީ 2024 ވަނަ އަހަރުގެ ޔޫއެސް އޯޕަން ބޯއީސް ސިންގަލްސް ތަށި ހޯދައިފަ އެވެ. އެ ހިސާބުން މަޑުމަޑުން، މެންސް އޯޕަން ޑިވިޝަނުން ޖޮޑާ އަށް ފުރުސަތު ލިބެން ފެށި އެވެ. އެ ހިސާބުން ރަނގަޅު ފޯމާ އެކު ކުރިއެރުން ހޯދަމުން އައި ޖޮޑާ، މި ވަގުތު ދުނިޔޭގެ 11 ވަނައިގައި އޮތްއިރު، މިހާރު ކުރިއަށްދާ ސިންސިނާޓީ އޯޕަންގެ ކުއާޓާ އަށް ދިޔަ ކަމުގައި ވިޔަސް ޖޮޑާ އަށް ދުނިޔޭގެ ގަދަ 10 ތެރެއިން ޖާގަ ލިބޭނެ އެވެ.
ސިންސިނާޓީ އޯޕަން އަށް އައުމުގެ ކުރިން ޖޮޑާ ވަނީ މި އަހަރު މިހާތަނަށް ކުޅުނު އަށް މުބާރާތުގެ ތެރެއިން ހަތް މުބާރާތުގެ ކުއާޓާ ފައިނަލަށް ދަތުރުކޮށްފަ އެވެ. އެއީ، މި އަހަރުގެ އޭޕްރީލް މަހުން ފެށިގެންނެވެ. ޖޮޑާ ވާދަކުރި މުބާރާތްތަކުގެ ތެރޭގައި ފްރެންޗް އޯޕަން އާއި މެޑްރިޑް އާއި ރޯމް އަދި މޮންޓްރެއަލްގައި ކުރިއަށްދިޔަ އޭޓީޕީ މާސްޓާސް 1000 ގެ މުބާރާތްތައް ހިމެނެ އެވެ. ޖޮޑާގެ މި ސީޒަނުގެ މިހާތަނަށް ހުސް އައްޔަކީ މޮރޮޮކޯގައި ކުރިއަށްދިޔަ މުބާރާތުގެ ތަށި ހޯދައި، މުބާރާތުގެ ތާރީހުގައި ވެސް ޗެމްޕިއަންކަން ހޯދި ފުރަަތަމަ ޓީނޭޖް ކުޅުންތެރިޔާގެ ޝަރަފް ހޯދުމެވެ. މި ފަހުން، އޭނާ ވަނީ ވޮޝިންޓަންގައި ކުޅުނު މުބާރާތުގެ ފައިނަލުގައި ވެސް ވާދަކޮށްފަ އެވެ.
މި ވަގުތު ސިންސިނާޓީ އޯޕަންގެ ގަދަ 16 ގައި ވާދަކުރަން ތައްޔާރުވަމުން އަންނަ ޖޮޑާ އަކީ މިދިޔަ 10 އަހަރު ތެރޭ މި މުބާރާތުގެ މިހާ ހިސާބަށް ދަތުރުކުރި، 20 އަަހަރުން ދަށުގެ ތިން ވަނަ ކުޅުންތެރިޔާ އެވެ. މީގެ ކުރިން އެ ރެކޯޑް އޮތީ އަލްކަރާޒް އާއި ބެން ޝެލްޓަން އަތުގަ އެވެ.
ޖޮޑާ އަށް ސިންސިނާޓީ އޯޕަންގެ ކުއާޓާ ފައިނަލުން ޖާގަ ހޯދާނަމަ ކުރިއަށް އޮތީ އުނދަގޫ ޗެލެންޖެކެވެ. އެއީ، ގަދަ 16 ބުރުގަައި، މި މުބާރާތުގައި 12 ވަނަ އަށް ސީޑްކޮށްފައިވާ އިޓަލީގެ ފްލަވިއޯ ކޮބޯލީއާ ކުޅޭ މެޗެވެ. ޖޮޑާ ބުނީ މި ސީޒަނުގަައި މިހާ ހިސާބަށް ވެސް ގިނަ ކަންތައްތަކެއް ހާސިލްކުރެވިއްޖެ ކަމަށާއި ކުރިއަށް އޮތްތަނުގައި ވެސް ބުރަކޮށް މަސައްކަތް ކުރާނެ ކަމަށެވެ.
