ކިއޭވް، ޔޫކްރެއިން (ނޮވެމްބަރު 21) - މަނާބޭސް ބޭނުންކުރި މައްސަލައެއްގައި 21 މަސް ދުވަސް ކުޅުމާ ދުރުގައި ހުންނަން ޖެހުމުން ޔޫކްރެއިންގެ ތަރި، މިހައިލޯ މުޑްރިކް، ޔޫކްރެއިންގެ ފުޓްބޯޅަ އެސޯސިއޭޝަންގެ މައްޗަށް ކުރި ތުހުމަތުގެ މައްސަލަ ހޫނުވެއްޖެ އެވެ.
މުޑްރިކް، 25، ގެ ސަސްޕެންޝަންގެ މައްސަލައިގައި ހައްލެއް ލިބި، 21 މަސް ދުވަސް ފަހުން، އަލުން ކުޅުމުގެ ތެރެއަށް އަންނަން ފުރުސަތު ފަހިވީ މިދިޔަ ސެޕްޓެމްބަރު މަހު ކުރީކޮޅުގަ އެވެ.
މުޑްރިކްގެ ކެރިއަރު ހަމަމަަގަށް އަޅުވަން ޓޮޓެންހަމް އަށް
މަނާބޭހުގެ މައްސަލައެއްގައި ސަސްޕެންޝަނެއް ތަންފީޒުކުރުމަށްފަހު، ޗެލްސީގެ ވިންގަރ މިހައިލޯ މުޑްރިކް ލޯނު އެއްބަސްވުމެއްގެ ދަށުން ޓޮޓެންހަމްއަށް ބަދަލުވެއްޖެ. އޭނާ މި ބަދަލުވުން އިޚްތިޔާރުކުރީ ކުރީގެ ކޯޗު ރޮބާޓޯ ޑި ޒާބީގެ އިރުޝާދުގެ ދަށުން ގަވާއިދުން ކުޅުމުގެ ފުރުސަތު ހޯދައި، ކެރިއަރު އަލުން ކޮޅަށް ޖެހުމުގެ މަގްސަދުގައި
މުޑްރިކް މަނާބޭހެއް ބޭނުންކުރި މައްސަލަ ދިގުލައިދާތީވެ، އޭނާ ވަނީ މި އަހަރު ކުރީކޮޅުގައި، އެކަމަށް ހައްލެއް ހޯދަން، ކުޅިވަރުގެ އެންމެ މަތީ ކޯޓު، ކޯޓް އޮފް އާބިޓްރޭޝަން ފޯ ސްޕޯޓްސް (ކާސް) އަށް ހުށަހަޅައިފަ އެވެ. ކާސް އިން ރަނގަޅަށް މައްސަލަ ނުފަށަނީސް، އިނގިރޭސި އެފްއޭ އިން ނިންމާފައިވަނީ، މުޑްރިކްގެ މައްސަަލަ މިހާރު ނިމިފައިވާ ކަމަށެވެ. އެއީ، މި މައްސަލައިގައި މުޑްރިކް އަށް އަންނަން ޖެހޭ ވަރުގެ އަދަބަކާ އެއްވަރުގެ މުއްދަތެއް ކުޅުމާ ދުރުގައި އޭނާ މިހާތަނަށް ވެސް ހުރެފައިވާތީ އެވެ.
ފުޓްބޯޅައިގެ ހުރިހާ ހަރަކާތަކުން 2024 ވަނަ އަހަރުގެ ނޮވެމްބަރުން ފެށިގެން މި އަހަރުގެ ޖުލައިގެ ނިޔަަލަށް މުޑްރިކް ހުރީ ދުރުގަ އެވެ.
މިދިޔަ ބުދަ ދުވަހު ދިން އިންޓަވިއުއެއްގައި މުޑްރިކް ބުނީ، މަނާބޭހެއް ގޮތުގައި ވޯލްޑް އެންޓި ޑޯޕިން އެޖެންސީ (ވާޑާ) އިން ލިސްޓު ކޮށްފައިވާ މެލްޑޯނިއަމް ހުރި ބޭހެއް ބޭނުންކުރި ސާމްޕަލެއް އޭނާ ނަގަން ޖެހުނުއިރު، އެކަމުގައި ޔޫކްރެއިން ފުޓްބޯޅަ އެސޯސިއޭޝަންގެ އިހުމާލެއް އެބައޮތެވެ. މުޑްރިކް ބުނީ، ސަސްޕެންޝަނުގައި ހުރި މުއްދަތުގައި އެ ކަމަށް އެސޯސިއޭޝަނުން ލިބެން ޖެހޭ އެއްބާރުލުން ނުލިބި ދިއުމުން ބޮޑު ގެއްލުމެއް ލިބުނު ކަމަށެވެ.

އެ އަށް ރައްދުދެމުން، ޔޫކްރެއިން އެފްއޭގެ ރައީސް އަދި ކުރީގެ ފޯވާޑް، އަންޑްރީ ޝެވްޗެންކޯ ވިދާޅުވީ، މުޑްރިކް ހަދަނީ ދޮގު ކަމަށާއި އޭނާގެ އޭޖެންޓް، ޔޫކްރެއިން އެފްއޭގައި އެދެމުން ދިޔައީ އެ ކަމުގެ ޒިންމާއާ އެސޯސިއޭޝަނުން ހަވާލުވުމަށް ކަމަށެވެ. އަދި، މުޑްރިކްގެ މި ތުހުމަތުގެ ސަބަބުން ޕްރޮފެޝަނަލް އުސޫލުން އަމަލުކުރަމުން އަންނަ ބަޔެއްގެ ޒިންމާއާ މެދު ބޭކާރު ގޮތެއްގައި ސުވާލު އުފައްދައި، ބައެއްގެ އަގުވައްޓާލުން ހިމެނޭ ކަމަށް ޝެވްޗެންކޯ ވަނީ ވިދާޅުވެފަ އެވެ.
ޝެވްޗެންކޯ ދެއްކެވި އެ ވާހަކަތަކަށް ވެސް މުޑްރިކް ވަނީ ރައްދުދީފަ އެވެ. މުޑްރިކް ބުނީ، ޝެވްޗެންކޯ އެ ފާހަގަކުރި ފަދަ ކަމެއް ކުރަން އެސޯސިއޭޝަންގެ ކިބައިން ނޭދޭ ކަަމަށެވެ. އަދި، އެއީ އޭނާ ވެސް އަދި އޭޖެންޓް ވެސް ކުރާނެ ފަދަ ކަމެއް ނޫން ކަމަށް މުޑްރިކް ވަނީ ބުނެފަ އެވެ.
އާސެނަލްގެ ޑީލެއް، 2023 ވަނަ އަހަރު، ހައިޖެކްކުރުމަށް ފަހު، ޗެލްސީން މުޑްރިކްގެ ސޮއި ހޯދީ ޔޫކްރެއިންގެ ޝަހުތަރު ޑޮނެސްކަށް 100 މިލިއަން ޑޮލަރު ދައްކައިފަ އެވެ. ޗެލްސީ އަށް ކުޅުނު 73 މެޗުން މުޑްރިކަށް ޖެހުނީ އެންމެ 10 ގޯލެވެ. ސަސްޕެންޝަންގައި ހުރި ނަމަވެސް، ޗެލްސީން ދިޔައީ ބަރާބަރަށް މުޑްރިކްގެ މުސާރަ ދެމުންނެވެ. އެއީ، އަހަރަކަށް ގާތްގަނޑަކަށް ހަތް މިލިއަން ޑޮލަރެވެ.
މުޑްރިކް ވަނީ ކުޅުމުގެ ފުރުސަތު އިތުރަށް ހޯދުމުގެ ގޮތުން، ލޯން އެއްބަސްވުމެއްގެ ދަށުން ޓޮޓެންހަމް ހޮޓްސްޕާސް އަށް ބަދަލުވެފަ އެވެ. ޓޮޓެންހަމްގެ. ކޯޗަކަށް ހުރި ރޮބާޓޯ ޑި ޒާބީ ވަނީ މުޑްރިކާ އެކު، ޝަހުތަރު ޑޮނެސްކްގައި މަސައްކަތްކޮށްފަ އެވެ.








