ޕެރިސް (މެއި 28) - މި ފަހަރުގެ ފްރެންޗް އޯޕަންގެ ދެ ވަނަ ބުރުން، މުބާރާތުގެ ފޭވަރިޓެއްގެ ގޮތުގައި ބެލެވުނު، ދުނިޔޭގެ ރޭންކިން އެއް ވަނަ ކުޅުންތެރިޔާ، ޖަނިކް ސިނާ، މުބާރާތުގެ ދެ ވަނަ ބުރުން ކަޓައިފި އެވެ.
ސިނާ ބަލިވީ ދުނިޔޭގެ 56 ވަނައިގައި އޮތް އާޖެންޓީނާގެ މަނުއަލް ސެރުންޑޯލޯ އަތުންނެވެ.
އުމުރުން 24 އަހަރުގެ ސިނާ، ފުރަތަަމަ ދެ ސެޓު ނިމުނުއިރު ކުރީގައި އޮތް ނަމަވެސް، ގަދަ ހޫނުގައި ކުޅުނު މި މެޗުގެ ފަހު ބައިގައި އަނިޔާގެ މައްސަަލަ ދިމާވެ، ފިޓްނަސް ވެސް ނުހިފެހެއްޓިގެން މެޗުން ބަލިވީ އެވެ. މެޗުގެ ސެޓުތައް ދިޔައީ، 3-6 2-6 7-5 6-1 6-1 އިންނެވެ. މިއީ، ސެރުންޑޯލޯ އަށް ގްރޭންޑް ސްލޭމް ޓެނިސް މުބާރާތެއްގެ ތިން ވަނަ ބުރުން ފުރުސަތ ލިބުނު ފުރަތަމަ ފަަހަރެވެ.
މި މެޗުން ބަލިވެ، ސިނާ ދަމަހައްޓަމުން އައި މޮޅުވުމުގެ ރެކޯޑަށް ވަނީ 30 މެޗަށް ފަހު ނިމުން އަތުވެފަ އެވެ. މި މެޗާ ހަމައަށް އައިއިރު، ސިނާ ވަނީ މާސްޓާސް 1000 ގެ ފަސް މުބާރާތް ޖެހިޖެހިގެން މޮޅުވެފަ އެވެ. އަދި، މިއީ، ފެބްރުއަރީ މަހުގެ ފަހުން ކްލޭ ކޯޓުގައި ސިނާ މެޗަކުން ބަލިވި ފުރަތަމަ ފަހަރެވެ.
ފްރެންޗް އޯޕަން އަކީ ސިނާގެ ކެރިއަރުގައި މަދުވާ ހަމައެކަނި ގްރޭންޑް ސްލޭމް މުބާރާތެެވެ. އެކަމަކު، މި ފަހަރުގެ މުބާރާތް ވެސް ކާމިޔާބު ނުކުރެވި، ސިނާ އަށް ކެރިއަރުގައި ހަތަރު ގްރޭންޑް ސްލޭމް ތަށި ހަމަކުރަން ކުރާ މަސައްކަތުގައި އިތުރު އަހަރެއް ވަނީ މަޑުކުރަން ޖެހިފަ އެވެ.
ފްރެންޗް އޯޕަންގެ އެންމެ ފަހުގެ ޗެމްޕިއަން، ސްޕެއިނުގެ ކާލޯސް އަލްކަރާޒަށް މި ފަަހަރުގެ މުބާާރާތުގައި އަނިޔާގެ ސަބަބުން ނުކުޅެވޭތީވެ، މި މުބާރާތް ކާމިޔާބުކުރާނެ ކަމަށް ގިނަ ބަޔަކު ގަބޫލުކުރީ ސިނާ އެވެ. އެކަމަކު، ސިނާ އަށް މުބާރާތް ގެއްލުމާ އެކު، މިހާރު މުބާރާތުގެ ފޭވަރިޓަކީ، ސާބިއާގެ ތަރި، ނޮވަކް ޖޮކޮވިޗް އެެވެ.
ދުނިޔޭގެ ރޭންކިންގެ އެއް ވަނައިގައި އޮވެފައި، ފްރެންޗް އޯޕަން އަކާ ކުރިމަތިލައި، މުބާރާތުގެ ސެމީގެ ކުރިން އެންމެ ފަހުން ކެޓީ މީގެ 10 ކުރިން ޖޮކޮވިޗް އެވެ. އެއީ، އެ މުބާރާތުގެ ކުއާޓާ ފައިނަލުގައި، ތޯމަސް ބާޑިޗް އަތުން ބަލިވެ، ޖޮކޮވިޗް ކެޓި ފަހަރެވެ.
ޖޮކޮވިޗް އަންނަނީ ކެރިއަރުގެ 25 ވަނަ ގްރޭންޑް ސްލޭމް ކާމިޔާބުކުރުމަށްޓަކައި، އިންތިޒާރު ކުރަމުންނެވެ. ސިނާ އާއި އަލްކަރާޒް ނެތުމުން، މި ފަހަރުގެ ފްރެންޗް އޯޕަން ކާމިޔާބުކުރުމުގެ ފުރުސަތު ޖޮކޮވިޗަށް އޮތީ ހުޅުވިފަ އެވެ.
