އޯހައިއޯ، ޔުނައިޓެޑް ސްޓޭޓްސް (އޮގަސްޓް 5) - ސްޕެއިނުގެ ޓެނިސް ތަރި، ކާލޯސް އަލްކަރާޒްގެ އަތުގެ ކުޑަ ހުޅަށް ލިބުނު އަނިޔާއާ ހެދި ކުޅުމާ ދުރުގައި ހުންނަން ޖެހިފައިވާ މުއްދަތު އިތުރަށް ދިގުލައިފި އެވެ.
ދުނިޔޭގެ ރޭންކިންގެ ދެ ވަނައިގައި އޮތް އުމުރުން 23 އަަހަރުގެ އަލްކަރާޒްގެ އަތުގެ ކުޑަ ހުޅަށް އަނިޔާވީ މިދިޔަ އޭޕްރީލް މަހު އެވެ. އެ މަހުގައި ބޭއްވި ބާސެލޯނާ އޯޕަންގައި ކުޅުމުގެ ފުރުސަތު ގެއްލުނު އަލްކަރާޒަށް އެންމެ ފަހުން ކުޅުނު ގްރޭންޑް ސްލޭމް ޓެނިސް ދެ މުބާރާތް ކަމަށްވާ ފްރެންޗް އޯޕަން އާއި ވިމްބަލްޑަން ވެސް ވަނީ ގެއްލިފަ އެވެ. އަލްކަރާޒް، އަމާޒު ކަނޑައަޅައިގެން ހުރީ ފްރެންޗް އޯޕަންގެ ތަށި ދިފާއުކުރުމަށް ނަމަވެސް އެ ފުރުސަތު ނުލިބުނެވެ.
މި މަހު 30 ވަނަ ދުވަހު ފަށަން ތާވަލުކޮށްފައިވާ އަހަރުގެ ފަހު ގްރޭންޑް ސްލޭމް ޓެނިސް މުބާރާތް ޔޫއެސް އޯޕަން އަށް ތައްޔާރުވާން ސިންސިނާޓީ އޯޕަންގައި އަލްކަރާޒް ކުޅޭނެ ކަމަށް ބެލެވުނެވެ. މިދިޔަ އަހަރުގެ ސިންސިނާޓީ އޯޕަންގެ ތަށި ހޯދި އަލްކަރާޒް އަށް މި މަހު 11 ވަނަ ދުވަހު ފަށާ މި އަހަރުގެ މުބާރާތުގައި ނުކުޅެވޭނެކަން ވަނީ ކަށަވަރުވެފަ އެވެ.
"އަހަރެެމެންނަށް އެނގޭ ކާލޯސް (އަލްކަރާޒް) އަށް ކުރެވުނު ހުރިހާ ކަމެއް ކުރަމުން އަންނަކަން މުބާރާތްތަކަށް ފިޓްވާން. އެކަމަކު މި ވަގުތަށް ބަލާއިރު ފިޓްނަަސް އެންމެ ރަނގަޅު ނޫންވީމަ އެނބުރި އާދެވެން ނެތީ. އަހަރެމެން އެދެނީ އަލްކަރާޒް ވީ އެންމެ އަވަަހަކަށް އެނބުރި އައުމަށް،" ސިންސިނާޓީ އޯޕަންގެ ޑިރެކްޓަރު، ބޮބް މޯރަން ބުނެފައިވެ އެވެ.
ޖުމްލަ އެކު ކެރިއަރުގައި އަލްކަރާޒް ވަނީ ކެރިއަރުގައި 26 ތަށި ހޯދައިފަ އެވެ. އޭގެ ތެރޭގައި، ހަތް ގްރޭންޑް ސްލޭމް މުބާރާތް ހިމެނެ އެވެ. އޭނާ ވަނީ ޔޫއެސް އޯޕަން، ވިމްބަލްޑަން އަދި ފްރެންޗް އޯޕަން، ކޮންމެ. މުބާރާތެއް ދެ ފަހަރު ކާމިޔާބުކޮށްފަ އެވެ. އޭނާ އެއް ފަހަރު ހޯދި އޮސްޓްރޭލިއަން އޯޕަންގެ ތަށި ހޯދީ މި ސީޒަނުގަ އެވެ.
މިދިޔަ ސީޒަނުގައި އަލްކަރާޒް ވަނީ ޔޫއެސް އޯޕަން ކާމިޔާބުކޮށްފަ އެވެ. އެއީ، ފައިނަލުގައި އިޓަލީގެ ޖަނިކް ސިނާ ބަލިކޮށްފަ އެވެ. އަލްކަރާޒް ރަނގަޅު މޮޅެއް ހޯދި މި މެޗުގެ ސެޓުތައް ދިޔައީ، 6-2 3-6 6-1 6-4 އިންނެވެ.
