ސަރުކާރުން ފަށާފައިވާ ތިލަފުށީ ޕޯޓުގެ މަޝްރޫއަކީ މި ސަރުކާރުން އެންމެ އިސްކަމެއް ދީގެން ކުރިއަށް ގެންދާ މަޝްރޫއު ކަމަށާއި އިގުތިސޯދު ފުޅާކުރަން އެންމެ މުހިންމީ އެ ޕޯޓުގެ މަސައްކަތް ކަމަށް ރައީސް މުހައްމަދު މުއިއްޒު އިއްޔެ ވިދާޅުވެއްޖެ އެވެ.
ތިލަފުށީގައި ތަރައްގީކުރަމުން އަންނަ ބައިނަލްއަގުވާމީ ވިޔަފާރި ބަނދަރުގެެ މަސައްކަތް ބައްލަވާލެއްވުމަށް ފަހު، ޕީއެސްއެމްއަށް ދެއްވި އިންޓަވިއުއެއްގައި މުއިއްޒު ވިދާޅުވީ، ބަނދަރުގެ މަސައްކަތް ކުރިއަށްދާ ގޮތާ މެދު ހިތްހަމަޖެހިވަޑައިގަންނަވާ ކަމަށެވެ. އަދި، އަމާޒަކީ ކުރިން ވެސް ރާވާފައިވާ ގޮތަށް އަންނަ އަހަރުގެ ނޮވެމްބަރު 11 ގައި، ތިލަފުށީ ބަނދަރު ބޭނުންކުރަން ފެށުން ކަަމަށް އެމަނިކުފާނު ވިދާޅުވި އެވެ.
ތިލަފުށީ ޕޯޓު ތަރައްގީކުރުމުގެ މަސައްކަތުގެ ދަށުން މިހާރު ކުރިއަށް ދަނީ ފުރަތަމަ ފިޔަވައްސެވެ.
މި ފިޔަވަހީގައި ހިމެނެނީ ބޭރުން އަންނަ އާގުބޯޓުތަކަށް ކައިރިކުރެވޭ ވަރުގެ ވާޓަރެއް (ކީވޯލްއެއް) ތަރައްގީކުރުމާއި، ބަނދަރަށް ކޮންމެހެން ބޭނުންވާ އެހެނިހެން އުމްރާނީ ވަސީލަތްތައް ގާއިމުކުރުުމުގެ އިތުރުން މާލޭ ސައުތު ވެސްޓު ހާބަރު ސަރަހައްދު ތަރައްގީކުރުމެވެ. ސަރުކާރުން ބުނެފައި ވަނީ މި ފިޔަވަހި ނިމުމުން މާލޭގައި ހުންނަ ވިޔަފާރި ބަނދަރު (މާލޭ ކޮމާޝަލް ހާބަރު) ބޭނުންކުރުން ހުއްޓާލާނެ ކަމަށެވެ.
ރާއްޖޭގެ ވިޔަފާރި ބަނދަރު 2027 ގައި ތިލަފުށްޓަށް ބަދަލު ކުރައްވާނެ ކަމަށް މުއިއްޒު ވައުދުވެވަޑައިގެންފި
މުއިއްޒު ވިދާޅުވީ މާލޭ ވިޔަފާރި ބަނދަރު ތިލަފުށްޓަށް ބަދަލު ކުރުމުގެ ފުރަތަމަ ފިޔަވަހީގެ އަމަލީ މަސައްކަތް މިއަދު ބަޔަކާ ހަވާލު ކުރައްވާނެ ކަމަށެވެ.
މުއިއްޒު ވިދާޅުވީ ސަރުކާރުން ތިލަފުށީ ބަނދަރު ތަރައްގީކުރަން ފެށީ މާލޭގައި އޮތް ޕޯޓު ސަރަހައްދަކީ، ސަރުކާރުން ބޭނުންވާ މިންވަރަށް އިގުތިސޯދު ކުރިއަރުވަން އެކަށީގެންވާ ތަނަކަށް ނުވާތީ ކަމަށެވެ.
އެ ގޮތުން މިހާރު މަސައްކަތް ހިނގަމުންދާ ފިޔަވަހި ނިމުމުން މާލޭގައި އޮތް ބަނދަރަށް ވުރެ ޖާގައިގެ ގޮތުންތާއި ވަސީލަތުގެ ގޮތުން މާ ތަނަވަސް ޕޯޓެއް އޮންނާނެ ކަމަށް މުއިއްޒު ވިދާޅުވި އެވެ. އެއާއެކީ، ވިޔަފާރިތަކަށް ވަރަށް ބޮޑު ދޮރެއް ހުޅުވިގެން ދާނެ ކަމަށް އެމަނިކުފާނު ވިދާޅުވި އެވެ.
"ހަގީގަތުގައި މިހާރު ރާއްޖެ އިގުތިސޯދު ފުޅާކުރުމަށްޓަކައި އަޅުގަނޑުމެންގެ އުފެއްދުންތެރިކަން މައްޗަށް ގެންދިއުމުގައި، އަޅުގަނޑުމެންގެ ރާއްޖޭގެ ވިޔަފާރިތައް ކުރިއަށް ގެންދިއުމަށް، ހުރިހާ ގޮތަކުން ބަލާއިރުވެސް މިހާރު އެންމެ މުހިންމު މަޝްރޫއޫ،" މުއިއްޒު ވިދާޅުވި އެވެ.
ގާތްގަނޑަކަށް 225 މިލިއަން ޑޮލަރު (3.4 ބިލިއަން ރުފިޔާ) ހަރަދު ވާނެ ކަމަށް ލަފާކުރެވޭ ތިލަފުށީ ޕޯޓު ފަރުމާކުރުމުން ފެށިގެން މައިގަނޑު މަސައްކަތްތައް ހަވާލުކޮށްފައިވަނީ ޗައިނާ ހާބާ އިންޖިއަރިން ކޯޕަރޭޝަން (ސީއެޗްއީސީ)އާ އެވެ.
ތިލަފުށީ ވިޔަފާރި ބަނދަރުގެ ކީ ވޯލްގެ ބައިތަކެއް ހަދަން ސީއެޗްއީސީއާ ހަވާލުކޮށްފި
ތިލަފުށީ ވިޔަފާރި ބަނދަރުގެ ބައިނަލްއަގުވާމީ އަދި ދާޚިލީ ކީ ވޯލް ހެދުމުގެ މަސައްކަތް ޗައިނާ ހާބާ އިންޖިނިއަރިން ކޮމްޕެނީ (ސީއެޗްއީސީ) އާ އެމްޕީއެލް އިން ހަވާލުކޮށްފިއެވެ. މި މަޝްރޫއުގެ ދަށުން ބޮޑެތި ބޯޓުފަހަރާއި އަތޮޅުތެރޭގެ އުޅަނދުތަކަށް ޚާއްސަ ފުން ބަނދަރެއް ތަރައްގީކޮށް، މުދާ އުފުލުމުގެ ނިޒާމު ހަރުދަނާކުރުމަށް ވަނީ ރޭވިފައެވެ. އަންނަ އަހަރުގެ ނޮވެމްބަރު މަހު ބޭނުންކުރަން ފަށާނެ ކަމަށް ބެލެވޭ މި ބަނދަރުގެ އެކި މަސައްކަތްތައް ސީއެޗްއީސީގެ އިތުރުން އެމްޓީސީސީއާ ވެސް ވަނީ ހަވާލުކޮށްފައެވެ.
އެހެން ބައެއް މަސައްކަތްތައް ކުރަމުން އަންނަނީ މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ) އިންނެވެ. އަދި، ބަނދަރުގެ އެހެން ބައެއް އިމާރާތްތައް ތަރައްގީކުރަން ޝައުގުވެރިކަން ހުރި ބަޔަކު އެކަމަށް އެދި ހުށަހަޅަން ވެސް ވަނީ ފުރުސަތު ހުޅުވާލާފަ އެވެ.
ތިލަފުށީ ޕޯޓު ޕްރޮޖެކްޓުގައި އިސްކޮށް އުޅޭ މޯލްޑިވްސް ޕޯޓްސް ލިމިޓެޑް (އެމްޕީއެލް) އިން ބުނީ 10 ހެކްޓަރުގެ ބިމެއްގައި ތަރައްގީކުރަމުން އަންނަ ބަނދަރުގެ ހުރިހާ ފިޔަވަހިތަކެއް ނިމުމުން، އެންމެ ބޮޑެތި އާގުބޯޓުފަހަރަށް ވެސް މަގަތުފާލަމާ ކައިރި ކުރެވޭނެ ކަމަށެވެ. އޭރުން ބޭރު އެންކަރުގައި ބާއްވައިގެން ކޮންޓޭނަރުތައް ބޭލުން ނިމުމަކަށް ގެނެސް، ބޯޓު ހުސްކުރަން ނަގާ މުއްދަތު ހަތް ދުވަހުން ދެ ދުވަހަށް މަދު ކުރެވޭނެ ކަމަށް އެ ކުންފުނިން ލަފާކުރެ އެވެ.
މި ބަނދަރާއެކީ، މިހާރު ބޭނުންކުރަމުން އަންނަ 40 އަހަރު ވާން ގާތްވެފައިވާ މާލޭ ވިޔަފާރި ބަނދަރަށް ދިމާވެފައިވާ ތޮއްޖެހުމުގެ މައްސަލައަށް ދާއިމީ ހައްލެއް ލިބޭނެ ކަމަށް ސަރުކާރުން ވަނީ ބުނެފަ އެވެ.
