ސަރުކާރުން ވުޖޫދުކުރަން މަސައްކަތް ކުރަމުން އަންނަ ރިއަލް އެސްޓޭޓު ގާނޫނާ އެކީ ރާއްޖޭގެ ހުރިހާ ސަރަހައްދެއްގައި ވެސް ރަސްމާލެ ފަދަ ޕްރޮޖެކްޓުތައް ހިންގޭނެ ކަމަށް ބަންޑާރަނައިބު އަހުމަދު އުޝާމް އިއްޔެ ވިދާޅުވެއްޖެ އެވެ.
ރަސްމާލެ ވޯޓާފްރަންޓް ޕްރޮޖެކްޓުގެ ބައެއް ކަންކަން ހިއްސާކުރައްވަމުން ޕީއެސްއެމްއިން ގެނެސްދިން "އަހާ" ފޯރަމްގައި އުޝާމް ވިދާޅުވީ، މި ޕްރޮޖެކްޓު ހިންގަން ޔޫއޭއީގެ އީގަލް ހިލްސް ކުންފުންޏާއެކީ މިހާތަަނަށް ސޮއިކޮށްފައި އޮތީ "ލެޓާ އޮފް އިންޓެންޓް" ނުވަތަ ކޮމާޝަލް ޓާމްސް އެއްބަސްވުމެއްގައި ކަމަށެވެ.
މި އެއްބަސްވުމުގެ ދަށުން ދެން އޮތް މަސައްކަތަކީ މިހާރު އެއްބަސްވެފައިވާ ކަންތައްތަކުގެ މައްޗަށް މާސްޓާ ޑިވެލޮޕްމަންޓް އެގްރީމަންޓެއްގައި ސޮއިކުރުން ކަމަށް އުޝާމް ވިދާޅުވި އެވެ. އޭގެ ކުރިން މަޖިލީހުން ބައެއް ގާނޫނުތައް ފާސްކޮށް، އެހެން ބައެއް ގާނޫނުތަކަށް ބަދަލު ގެންނަން ޖެހޭ ކަމަށް އޭނާ ވިދާޅުވި އެވެ.
މީގެ ތެރެއިން އެންމެ މުހިންމު ކަމަށް ސަރުކާރުން ބުނަމުން އަންނަނީ ރިއަލް އެސްޓޭޓު ގާނޫނެވެ. އުޝާމް ވިދާޅުވީ މި ގާނޫނު ބޭނުން ވަނީ މިހާރު ރާއްޖޭގައި ނެތް ސިނާއަތެއް ތައާރަފުކުރަން މަސައްކަތް ކުރަމުން ދާތީ ކަމަށެވެ.
"ސަރުކާރު[ން] މަސައްކަތް މި ކުރަނީ، ރާއްޖޭގައި މިހާރު ނެތް ސިނާއަތެއް ކުރުމަށް ޓަކައި. މާނައަކީ ޓޫރިޒަމް ޕްރޮޑަކްޓަކަށް ނުވާ ރިއަލް އެސްޓޭޓް މާކެޓެއް އަޅުގަނޑުމެން ރާއްޖޭގައި އުފެއްދެވުމުގެ މަސައްކަތް މި ކުރަން މި އުޅެނީ،" އުޝާމް ވިދާޅުވި އެވެ.
އުޝާމް ވިދާޅުވި ގޮތުގައި، ރިއަލް އެސްޓޭޓު ގާނޫނެއް ވުޖޫދުކުރަން ޖެހެނީ މިހާރު އޮތް ގާނޫނީ ފްރޭމްވޯކްގެ ތެރޭގައި، ސަރުކާރުން އެ ބުނާ ޓޫރިޒަމް ޕްރޮޑަކްޓަކަށް ނުވާ ރިއަލް އެސްޓޭޓް މާކެޓެއް، އުފެއްދުން ނެތުމުންނެވެ.
ރިއަލް އެސްޓޭޓު ގާނޫނެއް ވުޖޫދުކުރަންޖެހޭ ވާހަކަ އުޝާމް އިއުލާންކުރެއްވުމާއެކީ ގިނަ ބަޔަކު ވަނީ ރަސްމާލެ ޕްރޮޖެކްޓަށް ހާއްސަކޮށްގެން ގާނޫނެއް ވުޖޫދު ކުރާތީ ކަންބޮޑުވުން ފާޅުކޮށްފަ އެވެ.
މިހެން ނަމަވެސް އުޝާމް ވަނީ ރިއަލް އެސްޓޭޓު ގާނޫނަކީ ވަކި ޕްރޮޖެކްޓަކަށް އަމާޒުކޮށްގެން އެކުލަވާލާ ގާނޫނެއް ނޫން ކަމަށް ވިދާޅުވެފަ އެވެ. އޭނާ ވިދާޅުވި، މި ގާނޫނާއެކީ ރާއްޖޭގައި ރިއަލް އެސްޓޭޓު ޕްރޮޖެކްޓުތައް ހިންގުމުގެ ފުރުސަތު ބިދޭސީ އަދި ދޭސީ ވިޔަފާރިތަކަށް ވެސް ހުޅުވިގެން ދާނެ ކަމަށެވެ.
"މި ގާނޫނުގެ ދަށުން ރާއްޖޭގެ އެ ހުރިހާ ސަރަހައްދެއްގައި ވެސް މިފަދަ ރިއަލްސްޓޭޓް ޕްރޮޖެކްޓް ހިންގުމުގެ ފުރުސަތު އޮންނާނެ. ބޭރު ކުންފުނިތަކަށް ވެސް އޮންނާނެ. އަދި ރާއްޖޭގެ ކުންފުނިތަކަށް ވެސް އޮންނާނެ. އެ ގޮތަށް މި ރާވަން، މި ގާނޫނު އެކުލަވާލަނީ،" އުޝާމް ވިދާޅުވި އެވެ.
ރަސްމާލެ ޕްރޮޖެކްޓަކީ ޓޫރިޒަމް ނޫން ރިއަލް އެސްޓޭޓު ޕްރޮޑަކްޓެއް ކަމަށް ސަރުކާރުން ބުނާއިރު، ޓޫރިޒަމް ގާނޫނުން އޮންނަނީ ރިއަލް އެސްޓޭޓު ތަރައްގީކޮށްގެން، އެ ތަންތަން ދިގުމުއްދަތަކަށް ކުއްޔަށް ދެވޭ ގޮތަށެވެ.
އޭގެ އިތުރުން، ސަރުކާރަށް މިއަދާ ހަމައަށް ވެސް ބުނަމުން އަންނަނީ މި ޕްރޮޖެކްޓަކީ ޓީޖީއެސްޓީގެ ގޮތުގައި ބޮޑު އާމްދަނީއެއް ވަންނާނެ ގޮތަށް ފަރުމާކޮށްފައިވާ ޕްރޮޖެކްޓެއް ކަމަށެވެ. ސަރުކާރުން އެއްވެސް އަގެއް ނުނަގާ ރަސްމާލޭގެ 500 އަށް ވުރެ ބޮޑު ހެކްޓަރުގެ ސަރަހައްދެއް ދޫކޮށްލި ސަބަބަކީ ވެސް މި ގޮތުން ލިބެން އޮތް އާމްދަނީ އެވެ.
މިހެންކަމުން، ރަސްމާލެ ޕްރޮޖެކްޓަކީ ޓޫރިޒަމް ނޫން ރިއަލް އެސްޓޭޓް މާކެޓެއް ތައާރަފުކުރާ ޕްރޮޖެކްޓެއް ކަމަށް ސަރުކާރުން ދައްކާ ވާހަކަ ދެކޮޅެއް ނުޖެހެ އެވެ.
