ޔަހޫދީން ވަޒަންވެރިކުރުވުމަށް ރަސްމާލެ ދޫކޮށްލުމަކީ ނުރައްކަލަކަށް ގައުމު ވައްޓާލުން ކަމަށާއި މި މުއާމަލާތް ހިންގުމުގައި ރައީސް މުހައްމަދު މުއިއްޒު އާއި މިނިސްޓަރު އަބްދުﷲ މުއްތޮލިބު އަދި ބަންޑާރަ ނައިބު އަހުމަދު އުޝާމް ބައިވެރިވެފައިވާތީ އެއީ ކުށްވެރިން ކަމަށް ކުރީގެ ރައީސް އަބްދުﷲ ޔާމީން ވިދާޅުވެއްޖެ އެވެ.
ޕީއެންއެފްއިން މިރޭ ބޭއްވި ޖަލްސާގައި ޔާމީން ވިދާޅުވީ ޔަހޫދީންނަކީ ދުނިޔޭގައި އެންމެ ގިނަ މީހުން ރުޅިއަންނަ ބަޔަކަށް ވުމުން، ރާއްޖޭގައި އެ މީހުން ވަޒަންވެރިކުރުވުމަކީ ދިވެހިރާއްޖޭގެ ސަލާމަތާއި ރައްކާތެރިކަމަށް ނުރައްކާވެދާނެ ކަމެއް ކަމަށެވެ.
ޔަހޫދީން ދެކެ އަންނަ ރުޅީގެ ސަބަބުން އެހެން ގައުމުތަކުގައި ހަމަލާތައް ދެމުންދާކަން ފާހަގަ ކުރައްވައި ޔާމީން ވިދާޅުވީ ރަސްމާލޭގައި ޔަހޫދީން އާބާދުކޮށްފި ނަމަ އެފަދަ ކަންކަން ހިނގުމަކީ ދުރުގައި އޮތް ކަމެއް ނޫން ކަމަށެވެ.
ރަސްމާލެ މަޝްރޫއަކީ ދިގު މުއްދަތަކަށް ދިވެހިންނަށް ފައިދާވާނެ މަޝްރޫއެއް ނޫން ކަމަށާއި، މުއިއްޒުގެ ވެރިކަން ނިމުމާއެކު މި މަޝްރޫއު ހުއްޓުވާނެ ކަމަށް ޔާމީން ވިދާޅުވިއެވެ.
"މިވަރުގެ ކަންތައްތަކުގައި [ރަސްމާލެ މަޝްރޫއު] ސަލާމަތީ ދެ ބާރަށް ބުނަން ކެރެންވާނެ، ގާނޫނުން އެ މީހުންނަށް ލާޒިމުކުރޭ ރައީސުލްޖުމްހޫރިއްޔާ ކައިރީގައި ބުނަން ތިކަން ކޮށްގެން ނުވާނެއޭ. އެ މީހުން ކުރަންޖެހޭނެ އެކަން. އެއީ އެ މީހުންގެ ގާނޫނީ ޒިންމާއެއް،" ޔާމީން ވިދާޅުވި އެވެ.
އދ. ގެ އާންމު ޖަލްސާގައި ނައިބު ރައީސް ފަލަސްތީނުގެ ދިފާއުގައި ވާހަކަދެއްކެވިއިރު، އަދި ފަލަސްތީނަށްޓަކައި މުއިއްޒު ކަރުނައަޅައި ރޯއިރު، ޔަހޫދީންނަށް ރަސްމާލެއިން ބިން ވިއްކައި ވަޒަންވެރިކުރުވުމަށް މަސައްކަތް ކުރުމަކީ ދެކޮޅުޖެހޭ ކަމެއް ނޫން ކަމަށެވެ.
ރަސްމާލޭގައި ޔަހޫދީން ވަޒަންވެރިކޮށްފައި، ބާކީ ބައިގައި ދިވެހިން ވަޒަންވެރިކުރުވިޔަސް އެ ތަނުގައި ދިރިއުޅެން ދާނެ ދިވެއްސަކު ނުވާނެ ކަމަށް ވެސް ޔާމީން ވިދާޅުވި އެވެ.
"އެ ތަނަށް ޔަހޫދީންނާއެކު ކޯހެބިޓްކުރަން، ވަޒަންވެރިވާން އެ ތަނަށް ދާނެ ހަމަ އެއްވެސް މީހެއް ނުހުންނާނެ،" އެމަނިކުފާނު ވިދާޅުވި އެވެ.
ރައީސް މުއިއްޒު ބުނި ގޮތަކަށް، ބުނި ކަމެއް ކޮށްދޭން ތިބި އިސް ވަޒީރުންގެ ތެރޭގައި އެންމެ ގާތް ދެ މީހުންނަކީ އުޝާމް އާއި މުއްތޮލިބު ކަމަށާއި، މި މުއާމަލާތް ހިންގުން "މި ކަމުގައި މި މީހުންނާ ގާނޫނު އަރާހަމަކުރާނެ" ކަމަށް ޔާމީން ވިދާޅުވިއެވެ.
"އޭގައި ހަމަ މުއިއްޒާ އެއްވަރަށް ބައިވެރިވާ ކުށްވެރިން މި މީހުންނަކީ އިނގޭތޯ. އެއީ ގާނޫނުއަސާސީގައި މި އޮންނަނީ މިވަރުގެ ބޮޑެތި ކަންތައްތައް ނިންމާއިރު ކެބިނެޓަށް ގެންދިއުމުގެ އިތުރަށް ހާއްސަކޮށް ބަންޑާރަ ނައިބުގެ ލަފާ ހޯދަންވާނެ،"ރަސްމާލެ ދޫކޮށްލާއިރު ރައްޔިތުންގެ ހިޔާލު ހޯދުމުގެ ވޯޓެއް ވެސް އަހަންޖެހޭނެ ކަމަށް ޔާމީން ވިދާޅުވިއެވެ.
"ރައީސުލްޖުމްހޫރިއްޔާއަށް މި ދީފައި އޮންނަ އިހުތިޔާރުތަކުގެ ތެރޭގައި އެބައޮވޭ މި ކަހަލަ ކަންކަމުގައި ރައްޔިތުންގެ ފެންނަ ނުފެންނަ ވޯޓަކަށް އެރުމުގެ ބާރު އެބައޮވޭ އިނގޭތޯ،"
މި މަޝްރޫއުއާ ދެކޮޅަށް ދިވެހިންގެ ތެރެއިން ގިނަ އަދަދެއްގެ ބަޔަކު ޝުއޫރު ފާޅުކުރަމުން ދަނިކޮށް، އީގަލް ހިލްސް ވަނީ އެ ކުންފުނިން ޕްރޮޖެކްޓާ ގުޅޭ ގޮތުން ނެރުނު ނޫސް ބަޔާން ބަދަލުކޮށްފަ އެވެ.
ސަރުކާރުން ބުނަނީ ރަސްމާލެ ދެނީ ކުއްޔަށް ކަމަށާއި ދެނީ 99 އަހަރަށް ކަމަށެވެ. ނަމަވެސް ރަސްމާލޭގެ ހުރިހާ ޕްރޮޕަޓީއެއް ޓްރާންސްފާ އަދި ވާރުތަ ކުރެވޭނެ ކަމަށާއި އެއިން ކޮންމެ ފަހަރަކު 99 އަހަރުގެ އާ ލީސް މުއްދަތެއް ފެށޭނެ ކަމަށް އީގަލް ހިލްސް އިން ވެސް ބުނެ އެވެ.
އީގަލް ހިލްސް އިން މިއަދު ބަދަލު ކުރީ ރަސްމާލެ ޕްރޮޖެކްޓުގައި ސޮއި ކުރި ދުވަހު ސެޕްޓެމްބަރު 21، ގައި ނެރުނު ނޫސް ބަޔާނެވެ. ބަދަލު ކުރީ 99 އަހަރަށް ބިން ލިބުމާއި ކޮންމެ ޓްރާންސްފާއަކާއެކު 99 އަހަރުގެ އާ ކުލީގެ މުއްދަތެއް ފެށޭނެ ކަމަށް ބުނާ ބަޔެވެ.
