އިޒްރޭލާއި ޒަޔަނިސްޓުންނަށް ވާގިވެރިވާ ޔޫއޭއީގެ މުހައްމަދު އަލައްބާރަށް ރަސްމާލެ ވިއްކާލުމުގެ ރޭވުމުގެ ތެރެއިން، ދުނިޔޭގެ ހުރިހާ ދީނެއް ދިވެހިރާއްޖޭގައި ހިމާޔަތް ކުރަން ހުށަހެޅި ބިލަށް ސޯޝަލް މީޑިއާގައި މަގްބޫލު ޝަހުސިއްޔަތެއް ކަމަށްވާ އަލީ ރަމީޒް ފާޑުކިޔައިފި އެވެ.
ދީނީ ހޭލުންތެރިކަން އިތުރު ކުރަން މަސައްކަތް ކުރާ އަލީ ރަމީޒު އޭނާގެ ސޯޝަލް މީޑިއާގައި ކުރި ޕޯސްޓެއްގައި ބުނީ، ޔަހޫދީންގެ ނުބައި ވާހަކަ ދެއްކުން ހުއްޓުވޭނީ މުސްލިމުން ގަތުލުކޮށްގެން ކަމަށެވެ.
"ޔަހޫދީންގެ ނުބައި ވާހަކަ ދެއްކުން މުސްލިމުންގެ ދޫތަކުން ހުއްޓުވޭނެ އޮތީ އެންމެ ގޮތެއް. އެއީ އެމީހުންގެ [މުސްލިމުންގެ] ބޯތައް ކަނދުރާއިން ވަކި ކުރުން،" އަލީ ރަމީޒް ބުނެފައިވެ އެވެ.
ގާނޫނުލް އުގޫބާތަށް ގެންނަ އިސްލާހުތަކަކުން ހުރިހާ ދީންތަކެއް ހިމާޔަތް ކުރަން މަޖިލީހަށް ބިލެއް ހުށަހެޅީ ސަރުކާރުގެ ފަރާތުން މާފަންނު ދެކުނު ދާއިރާގެ މެންބަރު އަބްދުﷲ ރިފާއު އެވެ. އެ ބިލު ތައްޔާރު ކުރެއްވީ ބަންޑާރަނައިބު އަހުމަދު އުޝާމް އެވެ.
އެ ބިލުގައިވާ ގޮތުން، އެއްވެސް ދީނަކަށް ގެއްލުން ދިނުން ނުވަތަ ގެއްލުންދޭން ގޮވާލުމަކީ ކުށެކެވެ. އަދި ވަކި ދީނެއްގެ ކުޑަކުއްޖަކު އެހެން އެއްވެސް ދީނަކަށް ބަދަލު ކުރަން މަސައްކަތް ކުރުމަކީ ވެސް އެ ބިލުގައިވާ ގޮތުން ކުށެކެވެ.
އެ ބިލުގެ ފުރަތަމަ ކިޔުން ދެ ފަހަރަކަށް މަޖިލީހުގައި އެޖެންޑާ ކުރުމަށްފަހު ކެންސަލް ކުރި އެވެ. އެންމެފަހުން ރޭގެ ވަގުތެއްގައި އެ ބިލު ވަނީ މަޖިލީހުން ނަގައިފަ އެވެ. އެ ބިލު ނެގީ ކީއްވެގެންތޯ އަދަދު އިން ބަންޑާރަނައިބުގެ އޮފީހާ ސުވާލު ކުރުމުން މިހާތަނަށް އަދި ޖަވާބެއް ނުދެ އެވެ.
ސަރުކާރުން ބުނަނީ ރަސްމާލެ ދޫކޮށްލަނީ 99 އަހަރަށް ކަމަށެވެ. އެކަމަކު އަލައްބާރުގެ އީގަލް ހިލްސް ކުންފުނިން ބުނީ ރަސްމާލެއިން ފުރަތަމަ ލިބޭ 99 އަހަރުގެ ކުލީގެ މުއްދަތު ހަމަވުމުގެ ކުރިން އެތަން ވިއްކާލައިފި ނަމަ 99 އަހަރުގެ ކުލީގެ އާ މުއްދަތެއް ފެށޭނެ ކަމަށެވެ.
ދައުލަތުގެ ފައިސާއިން ފުށިދިއްގަރުފަޅު ހިއްކައިގެން ހަދަމުން އަންނަ ރަސްމާލޭގެ 500 ހެކްޓަރު އީގަލް ހިލްސްއަށް ވިއްކާލުމުގެ ކޮމާޝަލް ޓާމްސްގައި ސޮއި ކުރީ ސެޕްޓެމްބަރު 21، ގަ އެވެ. އެ ޕްރޮޖެކްޓުގެ ދާއިމީ އެގްރިމެންޓުގައި ސޮއި ކުރަން މަސައްކަތް ކުރަނީ ނޮވެމްބަރު 17، ގެ ކުރިންނެވެ.
ރަސްމާލެ ވިއްކާލަން ސަރުކާރުން ޑީލެއް ހެދީ، އެތަނުގެ ވެލިފުކެއް އެންމެ ދުވަހަކަށް ނަމަވެސް ބޭރުގެ ބަޔަކަށް ކުއްޔަށް ނުވަތަ ހިލޭ ވެސް ނުދޭން ރައީސް މުހައްމަދު މުއިއްޒު ވައުދުވެވަޑައިގެންނެވުމަށްފަހު އެވެ.
"އެތަނުން [ރަސްމާލެއިން] ހިއްކާ ކޮންމެ ބިމެއްގެ، ކޮންމެ ވެލިފުކަކީ ދިވެހި ރައްޔިތުންނަށް މިލްކުވާ ވެލިފުކެއް. އެއްވެސް ބޭރު ފަރާތަކަށް އެންމެ ދުވަހަކަށް ވެސް ކުއްޔަށް ދޭން، ނޫނީ ހިލޭ ވެސް ލިބޭނެ ބިމެއްނޫން، ދެން އެތަނުން ހިކިގެން ދާނީކީއެއް،" މުއިއްޒު ވިދާޅުވެފައިވެ އެވެ.
