އިޒްރޭލަށް ވާގިވެރިވާ ޔޫއޭއީގެ އީގަލް ހިލްސް ކުންފުންޏާއެކު ދިވެހި ސަރުކާރުން ސޮއިކުރި ކޮމާޝަލް ޓާމްސް އެގްރީމެންޓުގައި ހުރި ކަންކަން ދިވެހި ރައްޔިތުންނަށް އެނގެން ނުޖެހޭ ކަމަށާއި ކޮމާޝަލް ޓާމްސް އެގްރީމެންޓެއް އަދި ވުޖޫދުގައި ވެސް ނެތް ކަމަށް ދާންދޫ ދާއިރާގެ މެންބަރު، މުހައްމަދު ފަޒީލް ވިދާޅުވެއްޖެ އެވެ.
ފަޒީލް އެހެން ވިދާޅުވީ ރަސްމާލެ މަޝްރޫއުއާ ގުޅޭގޮތުން މަޝްވަރާ ކުރުމަށް ރައްޔިތުންގެ މަޖިލީހުގެ މެންބަރުންނާއި ސަރުކާރުގެ މިނިސްޓަރުން މުލީއާގެއަށް ހާޒިރުކޮށްގެން މިއަދު ރައީސުލްޖުމްހޫރިއްޔާ ބޭއްވެވި ބައްދަލުވުމަށްފަހު ބޭރަށް ނުކުމެވަޑައިގެން، އަދަދު ނޫހުން ކުރި ސުވާލަކަށް ޖަވާބުދެއްވަމުންނެވެ.
ރަސްމާލެ މަޝްރޫއު ހިންގަން އީގަލް ހިލްސްއާއެކު ދާއިމީ އެއްބަސްވުމެއްގައި ސޮއިކުރުމުގެ ކުރިން އާންމު ރައްޔިތުންގެ ހިޔާލާއި މަޝްވަރާ ހޯދަންޖެހޭ ކަމަށް ގަބޫލު ނުކުރަންތޯ އާއި ސަރުކާރުން ސޮއިކޮށްފައިވާ ކޮމާޝަލް ޓާމްސް އެގްރީމެންޓުގައި ހުރި މައުލޫމާތު ހާމަކުރަން ނުޖެހޭތޯ ސުވާލުކުރުމުން އޭނާ އެ އެގްރިމެންޓު ސިފަކުރެއްވީ ދޭދޭ ފަރުދުންގެ މެދުގައި ވާ އެއްބަސްވުމެއްގެ ގޮތުގަ އެވެ.
"ދޭދޭ ފަރުދުންގެ މެދުގައި ކުރާ ކަންތައްތަކަކަށް ވާހަކައަކީ ނުޖެހޭ ކޮންމެހެން ނުޖެހޭ އާންމު ފަރުދުންނަކަށް ވާހަކައަކީ އެނގޭކަށް، އިންނާނެ މަޖިލީހުގައި 241 ކޮމިޓީ ކިޔާފައި ކޮމިޓީއެއް، އެ ކޮމިޓީއަށް ގެންދާނެ ވާހަކައަކީ، އެ ކޮމިޓީއަށް ދާނެ، އަދި، އަންނާކަށް ނުޖެހޭ، 241 އާ ހަމައަށް އަދި އަންނާކަށް ނުޖެހޭ، އަންނަ ގަޑިއެއްގައި އެ މައުލޫމާތު ހިއްސާކުރާނެ،" ފަޒީލް ވިދާޅުވި އެވެ.
ރައްޔިތުންގެ މަޖިލީހުގައި އޮތީ ވެރިކަން ކުރާ ޕީއެންސީގެ މެޖޯރިޓީއެއް ކަމަށްވާއިރު، އީގަލް ހިލްސްއާއެކު ސަރުކާރުން ސޮއިކުރި ކޮމާޝަލް ޓާމްސް އެގްރީމެންޓުގައި ހުރި ކަންކަން 241 ކޮމިޓީއާ ހިއްސާ ނުކުރެއްވީ ކީއްވެތޯ ސުވާލުކުރުމުން އޭނާ ވިދާޅުވީ އެއީ ވުޖޫދުގައި ވެސް ނެތް އެގްރީމެންޓެއް ކަމަށެވެ.
"އަދި، އެގްރީމެންޓެއް ނެތް، ވުޖޫދުގައި ނެތް އެއްޗެއް ކިހިނެއް؟ ކޮމާޝަލް ޓާމްސް އެގްރީމެންޓެއް ވެސް އަދި ނެތް، ނެތި ތިބޭފުޅުންނަކަށް އެ އެއްޗެހި ވާހަކައަކީ ދޭކަށް، ކިހިނެއް ދެނީ؟ ވުޖޫދުގައި ނެތް އެއްޗެއް ކިހިނެއް ދެނީ؟،" ފަޒީލް ވިދާޅުވި އެވެ.
ފަޒީލް އެހެން ވިދާޅުވި ނަމަވެސް، ސަރުކާރުން ވަނީ ރަސްމާލޭގެ 500 ހެކްޓަރުގެ ބިން އީގަލް ހިލްސްއަށް ދިނުމާ ގުޅޭ ކޮމާޝަލް ޓާމްސް އެގްރީމެންޓުގައި ސެޕްޓެމްބަރު 21، ގަައި ސޮއިކޮށްފަ އެވެ. އަދި، އެ އެގްރީމެންޓުގައި ހުރި ބައެއް މައުލޫމާތު ހިމަނައިގެން ސަރުކާރުން ނޫސްބަޔާނެއް ވެސް އެ ދުވަހު ނެރުނެވެ.
ނަމަވެސް، މިއަދާ ހަމައަށް އެ އެގްރީމެންޓު ސަރުކާރުން ހާމަކޮށްފައެއް ނުވެ އެވެ. އެ އެގްރީމެންޓުގެ ތަފުސީލު ހާމަކުރަން ގޮވާލައި އިދިކޮޅު އެމްޑީޕީން މަޖިލީހަށް ހުށަހެޅި ގަރާރު ވެސް މަޖިލީހުން ވަނީ ބޭރުކޮށްލައިފަ އެވެ.
ސަރުކާރުން ބުނަނީ ރަސްމާލެ ދޫކޮށްލަނީ 99 އަހަރަށް ކަމަށެވެ. އެކަމަކު އަލައްބާރުގެ އީގަލް ހިލްސް ކުންފުނިން ބުނީ ރަސްމާލެއިން ފުރަތަމަ ލިބޭ 99 އަހަރުގެ ކުލީގެ މުއްދަތު ހަމަވުމުގެ ކުރިން އެތަން ވިއްކާލައިފި ނަމަ 99 އަހަރުގެ ކުލީގެ އާ މުއްދަތެއް ފެށޭނެ ކަމަށެވެ.
