ހަތް ދުވަހުގެ ތެރޭގައި ހޮރްމޫޒް ކަނޑުއޮޅި ވިޔަފާރި އުޅަނދުފަހަރަށް އަލުން ހުޅުވާލުމަށް ހުށަހެޅި ހުށަހެޅުމެއް އެމެރިކާގެ ރައީސް ޑޮނަލްޑް ޓްރަމްޕް ބޭރުކޮށްލެއްވުމާ ގުޅިގެން، އެމެރިކާގެ މަޝްވަރާވެރިންގެ ފަރާތުން ރަސްމީ ޖަވާބެއް ލިބެންދެން މަޑުކުރާނެ ކަމަށް އީރާނުން ބުނެފި އެވެ.
ޓެލެގްރާމްގައި ކުރެއްވި ޕޯސްޓެއްގައި އީރާނުގެ ފޮރިން މިނިސްޓަރު އައްބާސް އަރާގްޗީ ވަނީ ޓްރަމްޕް އެ ހުށަހެޅުން ގަބޫލުނުކުރެއްވިކަން ފާހަގަކުރައްވައި، މީގެ ކުރިން ވެސް ޓްރަމްޕް އިދިކޮޅު ވާހަކަފުޅުތައް ދައްކަވާފައިވާ ކަމަށް ތުހުމަތުކުރައްވާފަ އެވެ.
މީގެ ކުރިން ވައިޓް ހައުސްގައި ނޫސްވެރިންނާ ވާހަކަދައްކަވަމުން ޓްރަމްޕް ވިދާޅުވީ، އީރާނުގެ ހުށަހެޅުމަކީ "ގަބޫލުކުރެވޭނެ" ހުށަހެޅުމެއް ނޫން ކަމަށެވެ. އަދި އީރާނަށް ވަރަށް ބޮޑެތި ގެއްލުންތަކެއް ވަމުންދާތީ، އެ ގައުމުން ބޭނުންވަނީ ވަގުތުން ވަގުތަށް ކަނޑުއޮޅި ހުޅުވާލުމުގެ އެއްބަސްވުމެއް ގާއިމުކުރަން ކަމަށް ވެސް ޓްރަމްޕް ވިދާޅުވި އެވެ.
މިދިޔަ ހުކުރު ދުވަހު އދ. ގައި ނޫސްވެރިންނާ ވާހަކަދައްކަވަމުން އަރާގްޗީ ވިދާޅުވީ، ދެ ގައުމުގެ ދެމެދުގައި "ފުރިހަމަވާންޖެހޭ ޝަރުތުތައް ފުރިހަމަވެއްޖެ ނަމަ" އެއްބަސްވުމަކަށް އާދެވިދާނެ ކަމަށެވެ.
އަރާގްޗީ ވިދާޅުވި ގޮތުގައި ކަނޑުއޮޅި ހުޅުވާލުމަށް ހުށަހެޅި ޝަރުތުތަކަކީ، މިދިޔަ ޖޫން މަހު އެމެރިކާ އާއި އީރާނާ ދެމެދު ސޮއިކުރި ފަހުމުނާމާގައި ހިމެނޭ ޝަރުތުތަކެވެ.
މިދިޔަ ހަފުތާގައި ނިއު ޔޯކްގައި ބޭއްވި އދ. ގެ އާންމު މަޖިލީހުގެ ހަވާސާގައި ކުރިއަށްދިޔަ މަޝްވަރާތަކުގައި، ކަނޑުއޮޅި އަލުން ހުޅުވާލުމަށާއި ހަނގުރާމަވެރި އަމަލުތައް ހުއްޓާލުމާ ގުޅޭގޮތުން ވާހަކަދައްކާފައިވާނެ ކަމަށް އީރާނުން ބުނެ އެވެ.
ދުނިޔޭގެ ގޭސް އަދި ތެލުގެ ސަޕްލައިގެ ގާތްގަނޑަކަށް ފަސްބައިކުޅަ އެއްބައި ދަތުރުކުރާ މި މުހިންމު ކަނޑުގެ ސަރަހައްދު އޮތީ، ފެބްރުއަރީ މަހު ހަނގުރާމަ ފެށުނީއްސުރެ ބަންދުކޮށްފަ އެވެ.
