އެމެރިކާގެ ރައީސް ޑޮނަލްޑް ޓްރަމްޕާއި ޗައިނާގެ ރައީސް ޝީ ޖިންޕިން ވޮޝިންޓަނުގައި ބާއްވާ ތިން ދުވަހުގެ ސަމިޓް ފެށުމުގެ ގޮތުން، އަސްކަރީ މަތިންދާބޯޓުތަކުގެ ފްލައިޕާސްޓަކާއި 100 ފޫޓުގެ ރަތް ދޫލައިގެ މަރުހަބާއަކުން ޝީއަށް މަރުހަބާ ދަންނަވައިފި އެވެ.
އާންމުކޮށް އަމަލުކުރާ އުސޫލާ ހިލާފަށް، ޓްރަމްޕް ވަނީ އެއާޕޯޓަށް ވަޑައިގެން ޝީގެ ވަފުދަށް މަރުހަބާ ދަންނަވާފަ އެވެ. އެ ވަގުތު އެމެރިކާގެ އެއާ ފޯސް ބޭންޑުން މިއުޒިކް ކުޅެމުންދިޔައިރު، އެއާޕޯޓުގައި އެމެރިކާ އާއި ޗައިނާގެ ދިދަ ވަނީ ނަގާފަ އެވެ.
ބުދަ ދުވަހުގެ ހަވީރު މެރީލޭންޑްގެ ޖޮއިންޓް ބޭސް އެންޑްރޫޒްއަށް ޝީ އާއި އެމަނިކުފާނުގެ އަނބިކަނބަލުން ޕެންގް ލިޔުއާން ވަޑައިގަތުމުން، ޓްރަމްޕާއި ފަސްޓް ލޭޑީ މެލަނިއާ ޓްރަމްޕް ވަނީ އެ ދެބޭފުޅުންނަށް މަރުހަބާ ދަންނަވާފަ އެވެ.
މިއީ 2015 ވަނަ އަހަރަށްފަހު ޝީ ވޮޝިންޓަނަށް ކުރައްވާ ފުރަތަމަ ދަތުރުފުޅެވެ. ނުހަނު މުހިންމު މި ދަތުރުފުޅުގައި ބާއްވާ ބައްދަލުވުންތަކުގައި އާޓިފިޝަލް އިންޓެލިޖެންސް (އޭއައި) އާއި، އީރާން ހަނގުރާމަ އާއި، ޓައިވާންގެ މައްސަލައިގެ އިތުރުން ދެ ގައުމުގެ ދެމެދުގައި އޮތް ވިޔަފާރި މެދުކެނޑުމާ ގުޅޭގޮތުން ފުޅާ ދާއިރާއެއްގައި މަޝްވަރާކުރާނެ ކަމަށް ބެލެވެ އެވެ.
ޗައިނާގެ ކޮމިއުނިސްޓް ޕާޓީގެ ލީޑަރު ދަތުރުކުރެއްވި އެއާ ޗައިނާގެ މަތިންދާބޯޓު އެއާޕޯޓަށް ޖެއްސީ އެ ގައުމުގެ ގަޑިން 17:39 ގައެވެ. ބޯޓު ކައިރިއަށް ދެ ލިމޯޒިން ކާރު މަޑުކޮށްލުމާއެކު، އަސްކަރީ ޝަރަފުގެ ގާޑުން ވަނީ ރަތް ދޫލައިގެ ދެފަރާތުގައި ސަފުތައް އަތުރާލާފަ އެވެ.
ޝީ އާއި ޕެންގް ބޯޓުން ފައިބައިވަޑައިގަތުމުން ދެ ގައުމުގެ ރައީސުންނާއި އަނބިކަނބަލުން ވަނީ ސަލާމް ކުރައްވާފަ އެވެ. އަދި ކުޑަވަގުތުކޮޅަކު ވާހަކަދެއްކެވުމަށް ފަހު، ރަތް ދޫލައިގެ މަތީގައި ހިންގަވާފައި ވަޑައިގެން ފޮޓޯއަށް މަޑުކޮށްލެއްވި އެވެ.
އެމެރިކާގެ އަސްކަރީ ބޭންޑުން އެ ގައުމުގެ ގައުމީ ސަލާމް ކުޅެމުންދިޔައިރު، އެމެރިކާގެ އަސްކަރިއްޔާގެ މުހިންމު ހަތިޔާރެއް ކަމަށްވާ ސުޕަސޯނިކް ބީ-1 މަރުކާގެ ދެ ބޯޓު ވަނީ އެ ސަރަހައްދު މަތިން އުދުހިފަ އެވެ.
މަރުހަބާ ދެންނެވުމުގެ ރަސްމިއްޔާތަށް ފަހު، ދެ ގައުމުގެ ރައީސުންނާއި އަނބިކަނބަލުން ވަނީ ވަކިވަކި އުޅަނދުތަކުގައި ވޮޝިންޓަނަށް ވަޑައިގެންފަ އެވެ.
މިއީ 1962 ވަނަ އަހަރަށްފަހު އެމެރިކާގެ ރައީސަކު އަމިއްލަފުޅަށް އެއާޕޯޓަށް ވަޑައިގެން ބޭރު ގައުމެއްގެ ލީޑަރަކަށް މަރުހަބާ ދެންނެވި ފުރަތަމަ ފަހަރެވެ. މީގެއިން ދޭހަވަނީ މި ދަތުރުފުޅަށް ޓްރަމްޕް ދެއްވާ އަހަންމިއްޔަތުކަމެވެ.
1962 ވަނަ އަހަރު އޭރުގެ ރައީސް ޖޯން އެފް ކެނެޑީ ވަނީ އިނގިރޭސި ބޮޑުވަޒީރު ހެރަލްޑް މެކްމިލަންއަށް އެއާޕޯޓުން މަރުހަބާ ދަންނަވާފަ އެވެ.
