ހޯރްމޫޒް ކަނޑުއޮޅި އެއް ހަފުތާގެ ތެރޭގައި އަލުން ހުޅުވާލުމަށް އެމެރިކާއަށް ހުށަހެޅުމެއް ހުށަހަޅާފައިވާ ކަމަށް އީރާނުގެ ފޮރިން މިނިސްޓަރު އައްބާސް އަރަގްޗީ ވިދާޅުވެއްޖެ އެވެ.
ނިއުޔޯކުގައި ހުންނަ އދ. ގެ މައި މަރުކަޒުގައި ނޫސްވެރިންނާ ވާހަކަދައްކަވަމުން އަރަގްޗީ ވިދާޅުވީ، "ބޭނުންވާ ޝަރުތުތައް ފުރިހަމަވެއްޖެ ނަމަ" ކަނޑުއޮޅި ހުޅުވާލެވިދާނެ ކަމަށެވެ. އަދި އެ ޝަރުތުތަކަކީ މިދިޔަ ޖޫން މަހު ސޮއިކުރި ފަހުމުނާމާ (އެމްއޯޔޫ) ގައި ހިމެނޭ ކަންކަން ކަމަށް ވެސް އޭނާ ފާހަގަކުރެއްވި އެވެ.
"މިހާރު ގޮތެއް ނިންމުމުގެ އިޚުތިޔާރު އޮތީ އެމެރިކާއަށް،" ގަތަރު މެދުވެރިކޮށް އެމެރިކާއަށް އެ ހުށަހެޅުން ފޮނުވާފައިވާކަން ހާމަކުރައްވަމުން އަރަގްޗީ ވިދާޅުވި އެވެ.
އީރާނުގެ މި ހުށަހެޅުމާ ގުޅޭގޮތުން އެމެރިކާގެ އޮފިޝަލަކު ވިދާޅުވީ، މެދުވެރިން މެދުވެރިކޮށް ނިއުކްލިއާ މައްސަލަތަކާ ގުޅޭގޮތުން ވެސް އުންމީދީ މަޝްވަރާތަކެއް ކުރިއަށްދާ ކަމަށެވެ.
އީރާނުގެ ހުށަހެޅުމަށް އެމެރިކާގެ ސަރުކާރުން ރަސްމީ ޖަވާބެއް އަދި ދީފައި ނުވި ނަމަވެސް، އެމެރިކާގެ އޮފިޝަލުންނާ ހަވާލާދީ ވޯލް ސްޓްރީޓް ޖާނަލް އިން ރިޕޯޓުކޮށްފައިވާ ގޮތުގައި ރައީސް ޑޮނަލްޑް ޓްރަމްޕް ވަނީ އެ ހުށަހެޅުން ބޭރުކޮށްލައްވާފަ އެވެ.
އެ ނޫހުން ރިޕޯޓުކޮށްފައިވާ ގޮތުގައި، އީރާނުން އެމެރިކާގެ ޝަރުތުތަކަށް އަމަލުކުރާނެ ކަމާމެދު ޓްރަމްޕް އަމިއްލަފުޅަށް ޝައްކު ކުރައްވަ އެވެ. އަދި އީރާނަށް އަލުން ބޮން އެޅުމުގެ ކެމްޕޭނެއް ފެށުމުގެ ފުރުސަތު ބޮޑު ކަމަށް ޓްރަމްޕް އޭނާގެ މުވައްޒަފުން ގާތު ވިދާޅުވެފައިވާ ކަމަށް ވެސް އެ ނޫހުގައިވެ އެވެ.
މިދިޔަ ފެބްރުއަރީ 28 ވަނަ ދުވަހު އެމެރިކާ އާއި އިސްރާއީލުން ވަނީ އީރާނަށް ވައިގެ ހަމަލާތަކެއް ދީފަ އެވެ. އީރާނުން އެ ހަމަލާތަކަށް ރައްދުދިނީ އިސްރާއީލަށާއި، ފާރިސީ ކަނޑުއޮޅީގައި ހުރި އެމެރިކާގެ އަސްކަރީ މަރުކަޒުތަކަށާއި، އެ ސަރަހައްދުގައި ތިބި އެމެރިކާގެ އަރަބި ބައިވެރިންނަށް ހަމަލާދީ، ހޯރްމޫޒް ކަނޑުއޮޅި ބަންދުކޮށްގެންނެވެ.
ދުނިޔޭގައި ބޭނުންކުރާ ތެލާއި ގުދުރަތީ ގޭސް (އެލްއެންޖީ) ގެ 20 އިންސައްތަ އުފުލަނީ ހޯރްމޫޒް ކަނޑުއޮޅި މެދުވެރިކޮށެވެ. އެ ކަނޑުއޮޅި ބަންދުކުރުމާ ގުޅިގެން ދުނިޔޭގެ ބާޒާރުގައި ހަކަތައިގެ އަގުތަކަށް ވަނީ ބޮޑެތި ލޮޅުންތަކެއް އަރާފަ އެވެ.
