އެމެރިކާގެ ރައީސް ޑޮނަލްޑް ޓްރަމްޕް، ސީއެންއެން އާއި އެމްއެސް ނައު އަދި ޕޮލިޓިކޯގެ ނޫސްވެރިން ވައިޓް ހައުސްއަށް ވަނުން މަނާކުރެއްވި މަނާކުރުމަކީ ގާނޫނުއަސާސީއާ ހިލާފު ކަމަކަށް ވުމުގެ ފުރުސަތު ބޮޑު ކަމަށް ނިންމަވައި، އެ ނޫސްވެރިންނަށް އަލުން ވައިޓް ހައުސްއަށް ވަދެވޭނެ އިންތިޒާމު ހަމަޖެއްސުމަށް ފެޑަރަލް ފަނޑިޔާރަކު ބުރާސްފަތި ދުވަހު އަމުރުކުރައްވައިފި އެވެ.
ޔޫއެސް ޑިސްޓްރިކްޓް ފަނޑިޔާރު ޓިމް ކެލީ މި އަމުރު ނެރުއްވީ، ރިޕަބްލިކަން ޕާޓީއަށް ނިސްބަތްވާ ރައީސް ސެޕްޓެމްބަރު 18 ގައި އިއުލާން ކުރެއްވި މަނާކުރުމާ ދެކޮޅަށް އެ ނޫސް އިދާރާތަކުން ހުށަހެޅި މައްސަލައެއް ބެއްލެވުމަށްފަހު އެވެ.
ފަނޑިޔާރު ކެލީ ވަނީ އެ ނޫސް އިދާރާތަކުގެ ޕްރެސް ޕާސްތައް ވަގުތުން އަނބުރާ ދިނުމަށް ޓްރަމްޕްގެ ސަރުކާރަށް އަމުރުކުރައްވައި، ކުރިއަށް އޮތް 14 ދުވަހަށް އެ މަނާކުރުން ތަންފީޒުކުރުން ހުއްޓުވާފަ އެވެ. މީގެ އިތުރުން، އެ ނޫސްވެރިން މަނާކުރީ ގައުމީ ސަލާމަތަށް ނުރައްކާވާތީ ކަމަށް ބުނެ ސަރުކާރުން ދެއްކި އުޒުރުތައް ވެސް ފަނޑިޔާރު ވަނީ ބޭރުކޮށްލައްވާފަ އެވެ.
މި މައްސަލައިގެ ޝަރީއަތް ކުރިއަށްދާއިރު، ނޫސްވެރިންގެ ޕާސްތައް އަލުން ދިނުމަށް ކޯޓުން އަމުރުކޮށްފިނަމަ ގައުމީ ސަލާމަތަށް ނުރައްކާވާނެ ކަމަށް ބުނެ ދައުވާ ލިބޭ ފަރާތްތަކުން ދައްކާ ވާހަކައަށް ބާރުދޭ އެއްވެސް ހެއްކެއް ފެންނަން ނެތް ކަމަށް ފަނޑިޔާރު ވިދާޅުވި އެވެ.
ޓްރަމްޕް މީގެކުރިން ސޯޝަލް މީޑިއާގައި ވިދާޅުވެފައިވަނީ އެ ތިން ނޫސް އިދާރާއަކީ "އަބަދު ހިޔާލީ ވާހަކަތަކާއި ދޮގު ފެތުރުމުގެ ފުރުސަތު އޮންނަންޖެހޭނެ" ބައެއް ނޫން ކަމަށެވެ. އަދި ޖަސްޓިސް ޑިޕާޓްމަންޓުގެ ވަކީލުން ވެސް ވަނީ ގައުމީ ސަލާމަތުގެ ބަހަނާ ދައްކައި އެ ނިންމުން ދިފާއުކުރަން މަސައްކަތް ކޮށްފަ އެވެ.
އެ ތިން ނޫސް އިދާރާއިން ޓްރަމްޕާއި އޭނާގެ ސަރުކާރުގެ އިސް ބޭފުޅުންނާ ދެކޮޅަށް ވޮޝިންޓަންގެ ފެޑަރަލް ކޯޓަށް މިދިޔަ ހޯމަ ދުވަހު މައްސަލަ ހުށަހެޅީ، އެ މަނާކުރުމަކީ އެމެރިކާގެ ގާނޫނުއަސާސީގެ ފުރަތަމަ އިސްލާހުން ކަށަވަރުކޮށްދޭ ހިޔާލުފާޅުކުރުމުގެ މިނިވަންކަމާއި ނޫސްވެރިކަމުގެ މިނިވަންކަމުގެ ހައްގަށް އަރައިގަތުން ކަމަށް ބުނެ އެވެ. އެ ފަރާތްތަކުން އެދުނީ ގާނޫނީ ހަނގުރާމަ ކުރިއަށްދާއިރު، ވަގުތުން ވައިޓް ހައުސްއަށް ވަދެވޭނެ ގޮތް ހެދުމަށް ވަގުތީ އަމުރެއް ނެރެދިނުމަށެވެ.
